ਵੈੱਬ ਡੈਸਕ - ਗਰਮੀਆਂ ਦੇ ਦਿਨਾਂ 'ਚ ਸੂਰਜ ਦੀ ਤੇਜ਼ ਤਪਸ਼ ਅਤੇ ਪਸੀਨੇ ਕਾਰਨ ਸਰੀਰ ਬਹੁਤ ਜਲਦੀ ਥੱਕ ਜਾਂਦਾ ਹੈ ਅਤੇ ਊਰਜਾ ਦਾ ਪੱਧਰ ਡਿੱਗਣ ਲੱਗਦਾ ਹੈ। ਅਜਿਹੇ 'ਚ ਸਵੇਰ ਦੇ ਨਾਸ਼ਤੇ 'ਚ ਇਕ ਗਲਾਸ Banana Shake ਪੀਣਾ ਸਿਹਤ ਲਈ ਕਿਸੇ ਵਰਦਾਨ ਤੋਂ ਘੱਟ ਨਹੀਂ ਹੈ। ਕੇਲਾ ਅਤੇ ਦੁੱਧ ਦਾ ਇਹ ਸੁਮੇਲ ਨਾ ਸਿਰਫ਼ ਪੇਟ ਨੂੰ ਲੰਬੇ ਸਮੇਂ ਤੱਕ ਭਰਿਆ ਰੱਖਦਾ ਹੈ, ਬਲਕਿ ਸਰੀਰ ਨੂੰ ਦਿਨ ਭਰ ਚੁਸਤ-ਦਰੁਸਤ ਵੀ ਰੱਖਦਾ ਹੈ।

ਜੇਕਰ ਤੁਸੀਂ ਵੀ ਬਾਜ਼ਾਰ ਵਰਗਾ ਗਾੜ੍ਹਾ, ਕ੍ਰੀਮੀ ਅਤੇ ਸੁਆਦੀ ਬਨਾਨਾ ਸ਼ੇਕ ਘਰ ਵਿੱਚ ਮਿੰਟਾਂ 'ਚ ਤਿਆਰ ਕਰਨਾ ਚਾਹੁੰਦੇ ਹੋ, ਤਾਂ ਆਓ ਜਾਣਦੇ ਹਾਂ ਇਸਦੀ ਸਭ ਤੋਂ ਆਸਾਨ ਰੈਸਿਪੀ ਅਤੇ ਇਸਦੇ ਬੇਮਿਸਾਲ ਫਾਇਦੇ:

Banana Shake ਬਣਾਉਣ ਲਈ ਲੋੜੀਂਦੀ ਸਮੱਗਰੀ :-

ਪੱਕੇ ਹੋਏ ਕੇਲੇ - 2 (ਟੁਕੜਿਆਂ ਵਿੱਚ ਕੱਟੇ ਹੋਏ)
ਠੰਢਾ ਦੁੱਧ - 1 ਵੱਡਾ ਗਲਾਸ (ਉਬਲਿਆ ਹੋਇਆ)
ਖੰਡ ਜਾਂ ਸ਼ਹਿਦ - 1 ਤੋਂ 2 ਚੱਮਚ (ਸਵਾਦ ਅਨੁਸਾਰ)
ਬਾਰੀਕ ਕੱਟੇ ਡ੍ਰਾਈ ਫਰੂਟਸ - 1 ਚੱਮਚ (ਬਦਾਮ, ਕਾਜੂ, ਪਿਸਤਾ)
ਇਲੈਕਚੀ ਪਾਊਡਰ -  1 ਚੁਟਕੀ (ਵਧੀਆ ਖੁਸ਼ਬੂ ਲਈ)
ਬਰਫ਼ ਦੇ ਟੁਕੜੇ -  3-4

Banana Shake ਬਣਾਉਣ ਦੀ ਸਰਲ ਵਿਧੀ :-

- ਕੇਲਿਆਂ ਨੂੰ ਛਿੱਲ ਕੇ ਉਨ੍ਹਾਂ ਦੇ ਛੋਟੇ-ਛੋਟੇ ਗੋਲ ਟੁਕੜੇ ਕਰ ਲਓ।
- ਇਕ ਮਿਕਸੀ ਜਾਰ 'ਚ ਕੱਟੇ ਹੋਏ ਕੇਲੇ, ਖੰਡ ਜਾਂ ਸ਼ਹਿਦ , ਇਲੈਕਚੀ ਪਾਊਡਰ ਅਤੇ ਸਿਰਫ਼ ਅੱਧਾ ਗਲਾਸ ਠੰਢਾ ਦੁੱਧ ਪਾਓ। ਪਹਿਲਾਂ ਘੱਟ ਦੁੱਧ ਪਾਉਣ ਨਾਲ ਕੇਲੇ ਚੰਗੀ ਤਰ੍ਹਾਂ ਪੀਸ ਜਾਂਦੇ ਹਨ ਅਤੇ ਸ਼ੇਕ ਵਿੱਚ ਗੰਢਾਂ ਨਹੀਂ ਰਹਿੰਦੀਆਂ।
- ਮਿਕਸੀ ਨੂੰ 1 ਮਿੰਟ ਲਈ ਚਲਾਓ ਜਦੋਂ ਤੱਕ ਇਹ ਇਕ ਵਧੀਆ ਗਾੜ੍ਹਾ ਪੇਸਟ ਨਾ ਬਣ ਜਾਵੇ।
- ਹੁਣ ਜਾਰ 'ਚ ਬਾਕੀ ਬਚਿਆ ਅੱਧਾ ਗਲਾਸ ਦੁੱਧ ਅਤੇ ਬਰਫ਼ ਦੇ ਟੁਕੜੇ ਪਾ ਕੇ 30 ਸੈਕਿੰਡ ਲਈ ਦੁਬਾਰਾ ਮਿਕਸੀ ਚਲਾਓ। ਇਸ ਨਾਲ ਸ਼ੇਕ ਬਿਲਕੁਲ ਝੱਗਦਾਰ ਬਣੇਗਾ।
- ਤਿਆਰ ਸ਼ੇਕ ਨੂੰ ਕੱਚ ਦੇ ਗਲਾਸ 'ਚ ਕੱਢੋ ਅਤੇ ਉੱਪਰੋਂ ਬਾਰੀਕ ਕੱਟੇ ਹੋਏ ਬਦਾਮ-ਪਿਸਤੇ ਪਾ ਕੇ ਠੰਢਾ-ਠੰਢਾ ਸਰਵ ਕਰੋ।