ਪੁਤਿਨ ਨਾਲ ''ਦੋ-ਦੋ ਹੱਥ'' ਕਰੇਗੀ ਇਹ ਖੂਬਸੂਰਤ ਰੂਸੀ ਪੱਤਰਕਾਰ
12/27/2017 9:23:01 PM
ਮਾਸਕੋ— ਰੂਸ ਦੀ ਪੱਤਰਕਾਰ ਤੇ ਟੀਵੀ ਜਗਤ ਦੀ ਮਸ਼ਹੂਰ ਹਸਤੀ ਤੇ ਸਮਾਜਸੇਵੀ ਸੇਨੀਆ ਸੋਬਚਕ ਨੇ ਮੰਗਲਵਾਰ ਨੂੰ ਆਉਣ ਵਾਲੀਆਂ ਰਾਸ਼ਟਰਪਤੀ ਚੋਣਾਂ ਲਈ ਆਪਣੇ ਦਾਅਵੇਦਾਰੀ ਪੇਸ਼ ਕੀਤੀ ਹੈ, ਜਿਸ ਨੂੰ ਦੇਸ਼ ਦੇ ਕੇਂਦਰੀ ਚੋਣ ਕਮਿਸ਼ਨ ਨੇ ਮਨਜ਼ੂਰੀ ਦੇ ਦਿੱਤੀ ਹੈ। ਚੋਣ ਕਮਿਸ਼ਨ ਨੇ ਇਕ ਦਿਨ ਪਹਿਲਾਂ ਹੀ ਮੁੱਖ ਵਿਰੋਧੀ ਨੇਤਾ ਦੀ ਦਾਅਵੇਦਾਰੀ ਖਾਰਿਜ ਕਰ ਦਿੱਤੀ ਸੀ।
ਰਾਸ਼ਟਰਪਤੀ ਵਲਾਦੀਮੀਰ ਪੁਤਿਨ ਦੇ ਸਾਬਕਾ ਸਲਾਹਕਾਰ ਅਨਾਤੋਲੀ ਸੋਬਚਕ ਦੀ 36 ਸਾਲਾਂ ਬੇਟੀ ਸੇਨੀਆ ਸੋਬਚਕ ਨੂੰ ਅਕਤੂਬਰ 'ਚ ਰਾਸ਼ਟਰਪਤੀ ਅਹੁਦੇ ਦੇ ਦਾਅਵੇਦਾਰ ਵਜੋਂ ਪੇਸ਼ ਕੀਤਾ ਗਿਆ ਸੀ। ਉਨ੍ਹਾਂ ਨੂੰ ਸਿਵਲ ਇਨੀਸ਼ੀਏਟਿਵ ਪਾਰਟੀ ਦਾ ਸਮਰਥਨ ਪ੍ਰਾਪਤ ਹੈ। ਪਾਰਟੀ ਰੂਸ ਦੇ ਸਾਬਕਾ ਅਰਥਵਿਵਸਥਾ ਮੰਤਰੀ ਐਂਡ੍ਰੀ ਨੇਚਯੇਵ ਦੀ ਅਗਵਾਈ 'ਚ ਗਠਿਤ ਹੋਈ ਸੀ। ਇਸ ਸਮਰਥਨ ਦਾ ਮਤਲਬ ਹੈ ਕਿ ਸੋਬਚਕ ਆਪਣੀ ਦਾਅਵੇਦਾਰੀ ਨੂੰ ਰਸਮੀ ਬਣਾਉਣ ਲਈ ਲਾਜ਼ਮੀ ਇਕ ਲੱਖ ਸਮਰਥਕਾਂ ਦੇ ਦਸਤਖਤ ਹਾਸਲ ਕਰਨ ਲਈ ਪ੍ਰਚਾਰ ਸ਼ੁਰੂ ਕਰ ਸਕਦੀ ਹੈ। ਅਸਲ 'ਚ ਚੋਣ ਲੜਨ ਵੇਲੇ ਜੇਕਰ ਕਿਸੇ ਉਮੀਦਵਾਰ ਨੂੰ ਕਿਸੇ ਪਾਰਟੀ ਦਾ ਸਮਰਥਨ ਹਾਸਲ ਨਾ ਹੋਵੇ ਤਾਂ ਉਸ ਨੂੰ ਆਪਣਾ ਅਧਿਕਾਰਿਕ ਅਭਿਆਨ ਸ਼ੁਰੂ ਕਰਨ ਲਈ ਤਿੰਨ ਲੱਖ ਦਸਤਖਤਾਂ ਦੀ ਲੋੜ ਹੁੰਦੀ ਹੈ।
ਸੋਮਵਾਰ ਨੂੰ ਵਿਰੋਧੀ ਧਿਰ ਦੇ ਨੇਤਾ ਐਲੇਕਸੀ ਨੇਵਲਨੀ ਦੀ ਰਾਸ਼ਟਰਪਤੀ ਦਾਅਵੇਦਾਰੀ ਦੇ ਦਸਤਾਵੇਜ਼ਾਂ ਨੂੰ ਚੋਣ ਕਮਿਸ਼ਨ ਨੇ ਨੇਵਲਨੀ ਨੂੰ ਹੋਈ ਪੰਜ ਸਾਲ ਦੀ ਸਜ਼ਾ ਦੇ ਅਧਾਰ 'ਤੇ ਖਾਰਿਜ ਕਰ ਦਿੱਤਾ ਸੀ। ਨੇਵਲਨੀ ਨੂੰ ਬਾਅਦ 'ਚ ਪਾਰਟੀ ਤੋਂ ਵੀ ਬਰਖਾਸਤ ਕਰ ਦਿੱਤਾ ਗਿਆ ਸੀ।
