ਲੇਖਕ ਰਣਜੀਤ ਸਿੰਘ ਰਾਣਾ ਦੀ "ਭਾਈ ਬੁੱਧੂ ਜੀ ਪਰਜਾਪਤਿ" ਪੁਸਤਕ ਨਾਲ ਸਾਹਿਤਕ ਪਿੜ ''ਚ ਨਵੀਂ ਦਸਤਕ

ਗਲਾਸਗੋ (ਮਨਦੀਪ ਖੁਰਮੀ ਹਿੰਮਤਪੁਰਾ)—ਸਿੱਖ ਇਤਿਹਾਸ ਦੇ ਅਣਗੌਲੇ ਨਾਇਕਾਂ ਬਾਰੇ ਲਿਖਣ ਵਾਲੇ ਮਾਸਿਕ ਪੱਤਰ ਸਾਹਿਬ ਦੇ ਸੰਪਾਦਕ ਰਣਜੀਤ ਸਿੰਘ ਰਾਣਾ ਆਪਣੀ ਨਵੀਂ ਪੁਸਤਕ ‘ਭਾਈ ਬੁੱਧੂ ਜੀ ਪਰਜਾਪਿਤ’ ਨਾਲ ਪਾਠਕਾਂ ਦੇ ਰੁਬਰੂ ਹੋਏ ਹਨ। ਇਸ ਪੁਸਤਕ ਦਾ ਟਾਈਟਲ ਨਾਮਵਰ ਚਿੱਤਰਕਾਰ ਜਰਨੈਲ ਸਿੰਘ ਦਾ ਬਣਾਇਆ ਹੋਇਆ ਹੈ ਅਤੇ ਭਾਈ ਚਤਰ ਸਿੰਘ ਜੀਵਨ ਸਿੰਘ ਅੰਮ੍ਰਿਤਸਰ ਵਾਲੇ ਇਸ ਪੁਸਤਕ ਦੇ ਪ੍ਰਕਾਸ਼ਕ ਹਨ।

ਲੇਖਕ ਰਣਜੀਤ ਸਿੰਘ ਰਾਣਾ ਨੇ ਇਸ ਪ੍ਰਤੀਨਿਧ ਨਾਲ ਗੱਲਬਾਤ ਦੌਰਾਨ ਕਿਹਾ ਕਿ ਭਾਈ ਗੁਰਦਾਸ ਜੀ ਨੇ ਭਾਈ ਬੁੱਧੂ ਜੀ ਪਰਜਾਪਤਿ ਦਾ ਜ਼ਿਕਰ ਪੰਜਵੇਂ ਪਾਤਸ਼ਾਹ ਸ੍ਰੀ ਗੁਰੂ ਅਰਜਨ ਦੇਵ ਜੀ ਦੇ ਸ਼ਰਧਾਲੂ ਸਿੱਖਾਂ ਵਿੱਚ ਕੀਤਾ ਹੈ ਪਰ ਉਸ ਦਾ ਜੀਵਨ ਬਿਰਤਾਂਤ ਅਤੇ ਪਰਿਵਾਰਕ ਪਿਛੋਕੜ ਅੱਜ ਤੱਕ ਅਣਗੌਲਿਆ ਹੀ ਸੀ। ਇਸ ਕਿਤਾਬ ਵਿੱਚ ਭਾਈ ਬੁੱਧੂ ਜੀ ਸਿੱਖੀ ਸਿਦਕ ਦੇ ਨਾਲ ਨਾਲ ਉਸ ਦੇ ਵਡੇਰਿਆਂ ਅਤੇ ਵਾਰਸਾਂ ਦਾ ਵਰਣਨ ਵੀ ਵਿਸਥਾਰ ਸਹਿਤ ਕਰਦਿਆਂ ਢੁਕਵੇਂ ਇਤਿਹਾਸਿਕ ਤੱਥ ਦਿੱਤੇ ਗਏ ਹਨ।
ਜ਼ਿਕਰਯੋਗ ਹੈ ਕਿ ਰਣਜੀਤ ਸਿੰਘ ਰਾਣਾ ਦੀਆਂ ਸਿੱਖ ਇਤਿਹਾਸ ਬਾਰੇ ਯਾਦਗਾਰੀ ਕਿਤਾਬਾਂ ਵਿੱਚ ਬਾਬਾ ਹਰਦਾਸ ਸਿੰਘ, ਕਰਤਾਰਪੁਰਿ ਕਰਤਾ ਵਸੈ, ਅਮਰ ਸ਼ਹੀਦ ਬਾਬਾ ਮੋਤੀ ਰਾਮ ਮਹਿਰਾ, ਹਜ਼ੂਰੀ ਸ਼ਹੀਦ, ਫਤਹਿਗੜ੍ਹ ਸਾਹਿਬ, ਭਾਈ ਬੁੱਧੂ ਜੀ ਪਰਜਾਪਤਿ ਸਿੱਖ ਇਤਿਹਾਸ ਦੇ ਦਸਤਾਵੇਜ ਬਣ ਚੁੱਕੀਆਂ ਹਨ।