ਲੈਂਡਿੰਗ ਤੋਂ ਮਹਿਜ਼ 11 ਮਿੰਟ ਪਹਿਲਾਂ ਰਡਾਰ ਤੋਂ ਗਾਇਬ ਹੋਇਆ ਜਹਾਜ਼, 15 ਜਿੰਦਗੀਆਂ ਦਾਅ ''ਤੇ
Thursday, Jan 29, 2026 - 05:45 AM (IST)
ਬੋਗੋਟਾ : ਕੋਲੰਬੀਆ ਅਤੇ ਵੈਨੇਜ਼ੁਏਲਾ ਦੀ ਸਰਹੱਦ ਦੇ ਨੇੜੇ ਇਕ ਮੰਦਭਾਗੀ ਖ਼ਬਰ ਸਾਹਮਣੇ ਆਈ ਹੈ, ਜਿੱਥੇ 15 ਲੋਕਾਂ ਨੂੰ ਲੈ ਕੇ ਜਾ ਰਿਹਾ ਇਕ ਕਮਰਸ਼ੀਅਲ ਜਹਾਜ਼ ਰਡਾਰ ਤੋਂ ਲਾਪਤਾ ਹੋ ਗਿਆ ਹੈ। ਜਾਣਕਾਰੀ ਮੁਤਾਬਕ ਇਹ ਜਹਾਜ਼ ਲੈਂਡਿੰਗ ਤੋਂ ਮਹਿਜ਼ ਕੁਝ ਮਿੰਟ ਪਹਿਲਾਂ ਹੀ ਸੰਪਰਕ ਤੋੜ ਗਿਆ, ਜਿਸ ਕਾਰਨ ਕਿਸੇ ਵੱਡੇ ਹਾਦਸੇ ਦਾ ਖ਼ਦਸ਼ਾ ਜਤਾਇਆ ਜਾ ਰਿਹਾ ਹੈ।
ਲੈਂਡਿੰਗ ਤੋਂ 11 ਮਿੰਟ ਪਹਿਲਾਂ ਟੁੱਟਿਆ ਸੰਪਰਕ
ਲਾਪਤਾ ਜਹਾਜ਼ Beechcraft 1900 (ਰਜਿਸਟ੍ਰੇਸ਼ਨ HK4709) ਹੈ, ਜਿਸ ਨੂੰ SEARCA ਕੰਪਨੀ ਵੱਲੋਂ ਚਲਾਇਆ ਜਾ ਰਿਹਾ ਸੀ। ਫਲਾਈਟ ਨੰਬਰ NSE 8849 ਨੇ ਸਥਾਨਕ ਸਮੇਂ ਅਨੁਸਾਰ ਸਵੇਰੇ 11:42 ਵਜੇ ਕੁਕੂਟਾ (Cúcuta) ਤੋਂ ਓਕਾਣਾ (Ocaña) ਲਈ ਉਡਾਣ ਭਰੀ ਸੀ। ਇਸ ਨੇ ਦੁਪਹਿਰ 12:05 ਵਜੇ ਲੈਂਡ ਕਰਨਾ ਸੀ, ਪਰ ਸਵੇਰੇ 11:54 ਵਜੇ ਹੀ ਏਅਰ ਟ੍ਰੈਫਿਕ ਕੰਟਰੋਲ ਨਾਲ ਇਸ ਦਾ ਸੰਪਰਕ ਟੁੱਟ ਗਿਆ। ਜਹਾਜ਼ ਦਾ ਆਖਰੀ ਰਡਾਰ ਸੰਪਰਕ 'ਕੈਟਾਟੁੰਬੋ' (Catatumbo) ਖੇਤਰ ਦੇ ਉੱਪਰ ਦਰਜ ਕੀਤਾ ਗਿਆ ਸੀ।
ਜਹਾਜ਼ 'ਚ ਸੰਸਦ ਮੈਂਬਰ ਅਤੇ ਚੋਣ ਉਮੀਦਵਾਰ ਵੀ ਸੀ ਮੌਜੂਦ
ਜਹਾਜ਼ ਵਿੱਚ ਕੁੱਲ 15 ਲੋਕ ਸਵਾਰ ਸਨ, ਜਿਨ੍ਹਾਂ ਵਿੱਚ 13 ਯਾਤਰੀ ਅਤੇ 2 ਕਰੂ ਮੈਂਬਰ ਸ਼ਾਮਲ ਹਨ। ਦੱਸਿਆ ਜਾ ਰਿਹਾ ਹੈ ਕਿ ਸਵਾਰੀਆਂ ਵਿੱਚ ਕੋਲੰਬੀਆ ਦੇ ਸੰਸਦ ਮੈਂਬਰ ਡਿਓਜੇਨਿਸ ਕਿੰਤੇਰੋ ਅਤੇ ਆਉਣ ਵਾਲੀਆਂ ਚੋਣਾਂ ਦੇ ਉਮੀਦਵਾਰ ਕਾਰਲੋਸ ਸਾਲਸੇਡੋ ਆਪਣੀ ਟੀਮ ਸਮੇਤ ਸਫਰ ਕਰ ਰਹੇ ਸਨ। ਸਥਾਨਕ ਸੰਸਦ ਮੈਂਬਰ ਵਿਲਮਰ ਕੈਰਿੱਲੋ ਨੇ ਇਸ ਘਟਨਾ 'ਤੇ ਡੂੰਘੀ ਚਿੰਤਾ ਪ੍ਰਗਟਾਈ ਹੈ।
ਖ਼ਰਾਬ ਮੌਸਮ ਕਾਰਨ ਬਚਾਅ ਕਾਰਜਾਂ 'ਚ ਮੁਸ਼ਕਲ
ਕੋਲੰਬੀਆਈ ਏਅਰੋਸਪੇਸ ਫੋਰਸ ਅਤੇ ਨਾਗਰਿਕ ਉਡਾਣ ਅਥਾਰਟੀ ਨੇ ਤੁਰੰਤ ਖੋਜ ਅਤੇ ਬਚਾਅ ਕਾਰਜ ਸ਼ੁਰੂ ਕਰ ਦਿੱਤੇ ਹਨ। ਪ੍ਰਸ਼ਾਸਨ ਵੱਲੋਂ ਪੀੜਤ ਪਰਿਵਾਰਾਂ ਦੀ ਸਹਾਇਤਾ ਲਈ ਇੱਕ ਹੈਲਪਲਾਈਨ ਨੰਬਰ (601) 919 3333 ਵੀ ਜਾਰੀ ਕੀਤਾ ਗਿਆ ਹੈ। ਹਾਲਾਂਕਿ, ਅਧਿਕਾਰੀਆਂ ਨੇ ਦੱਸਿਆ ਕਿ ਪਿਛਲੇ ਕਈ ਹਫ਼ਤਿਆਂ ਤੋਂ ਖੇਤਰ ਵਿੱਚ ਲਗਾਤਾਰ ਛਾਏ ਬੱਦਲਾਂ ਅਤੇ ਖ਼ਰਾਬ ਮੌਸਮ ਕਾਰਨ ਬਚਾਅ ਕਾਰਜਾਂ ਵਿੱਚ ਭਾਰੀ ਦਿੱਕਤਾਂ ਆ ਰਹੀਆਂ ਹਨ। ਫਿਲਹਾਲ ਜਹਾਜ਼ ਦਾ ਕੋਈ ਸੁਰਾਗ ਨਹੀਂ ਮਿਲ ਸਕਿਆ ਹੈ।
