ਪਾਕਿ : ਸ਼ੇਰ ਦੇ ਪਿੰਜ਼ਰੇ ''ਚ ਮਿਲੀ 4 ਦਿਨ ਤੋਂ ਲਾਪਤਾ ਮੁੰਡੇ ਦੀ ਲਾਸ਼
02/27/2020 11:03:41 AM
ਲਾਹੌਰ (ਬਿਊਰੋ): ਪਾਕਿਸਤਾਨ ਦੇ ਲਾਹੌਰ ਸ਼ਹਿਰ ਦੇ ਇਕ ਚਿੜੀਆਘਰ ਵਿਚ ਸ਼ੇਰ ਦੇ ਪਿੰਜ਼ਰੇ ਦੇ ਅੰਦਰ ਇਕ 18 ਸਾਲਾ ਮੁੰਡਾ ਮ੍ਰਿਤਕ ਪਾਇਆ ਗਿਆ। ਇਸ ਮੁੰਡੇ ਦੀ ਇਸ ਹਫਤੇ ਦੇ ਸ਼ੁਰੂ ਵਿਚ ਮਤਲਬ ਸੋਮਵਾਰ ਨੂੰ ਲਾਪਤਾ ਹੋਣ ਦੀ ਸੂਚਨਾ ਮਿਲੀ ਸੀ। ਮੁੰਡੇ ਦੀ ਪਛਾਣ ਬਿਲਾਲ ਦੇ ਰੂਪ ਵਿਚ ਹੋਈ ਹੈ। ਨਿਊਜ਼ ਇੰਟਰਨੈਸ਼ਨਲ ਨੇ ਸਫਾਰੀ ਪਾਰਕ ਲਾਹੌਰ ਪ੍ਰਸ਼ਾਸਨ ਦੇ ਹਵਾਲੇ ਨਾਲ ਦੱਸਿਆ ਕਿ ਉਸ ਦੇ ਪਰਿਵਾਰ ਨੇ ਬੁੱਧਵਾਰ ਨੂੰ ਉਸ ਨੂੰ ਪਾਰਕ ਵਿਚ ਲੱਭਿਆ, ਜਿੱਥੇ ਸ਼ੇਰ ਦੇ ਪਿੰਜ਼ਰੇ ਦੇ ਅੰਦਰ ਉਸ ਦੀ ਲਾਸ਼ ਮਿਲੀ।
ਸਫਾਰੀ ਪਾਰਕ ਲਾਹੌਰ ਦੇ ਨਿਦੇਸ਼ਕ ਚੌਧਰੀ ਸ਼ਫਕਤ ਦੇ ਮੁਤਾਬਕ ਬੁੱਧਵਾਰ ਸਵੇਰੇ ਇਸ ਸੰਬੰਧ ਵਿਚ ਪਰਿਵਾਰ ਵੱਲੋਂ ਪਾਰਕ ਪ੍ਰਸ਼ਾਸਨ ਨਾਲ ਸੰਪਰਕ ਕੀਤੇ ਜਾਣ ਦੇ ਬਾਅਦ ਮੁੰਡੇ ਦੀ ਲਾਸ਼ ਮਿਲੀ। ਪੁਲਸ ਜਾਂਚ ਵਿਚ ਪਤਾ ਚੱਲਿਆ ਕਿ ਮੁੰਡਾ ਵਾੜ ਟੱਪ ਕੇ ਘਾਹ ਕੱਟਣ ਲਈ ਅੰਦਰ ਦਾਖਲ ਹੋਇਆ ਸੀ। ਬਿਲਾਲ ਦੇ ਚਾਚਾ ਪਾਰਕ ਦੇ ਇਕ ਕਰਮਚਾਰੀ ਸਨ। ਪੁਲਸ ਨੇ ਕਿਹਾ ਕਿ ਜਦੋਂ ਉਹ ਘਾਹ ਕੱਟ ਰਿਹਾ ਸੀ ਉਦੋਂ ਸ਼ੇਰਾਂ ਨੇ ਉਸ 'ਤੇ ਹਮਲਾ ਕੀਤਾ। ਪੁਲਸ ਦਾ ਦਾਅਵਾ ਹੈ ਕਿ ਮੌਕੇ ਤੋਂ ਇਕ ਦਾਤਰੀ, ਘਾਹ ਅਤੇ ਮਨੁੱਖੀ ਅਵਸ਼ੇਸ਼ ਮਿਲੇ ਹਨ। ਉਹਨਾਂ ਨੇ ਇਹ ਵੀ ਦੱਸਿਆ ਕਿ ਘਟਨਾ ਸੋਮਵਾਰ ਨੂੰ ਵਾਪਰੀ ਸੀ।
