ਵਧਿਆ ਸੰਕਟ! ਓਮਾਨ ਦੇ ਸਲਾਲਾਹ ਪੋਰਟ ''ਤੇ ਵੱਡਾ ਹਮਲਾ, ਲੱਖਾਂ ਲੀਟਰ ਕੱਚਾ ਤੇਲ ਸੜ ਕੇ ਸੁਆਹ

ਮਸਕਟ : ਈਰਾਨ ਅਤੇ ਅਮਰੀਕਾ-ਇਜ਼ਰਾਈਲ ਵਿਚਾਲੇ ਚੱਲ ਰਹੀ ਜੰਗ ਹੁਣ ਗੁਆਂਢੀ ਦੇਸ਼ਾਂ ਤੱਕ ਫੈਲਦੀ ਜਾ ਰਹੀ ਹੈ। ਬੁੱਧਵਾਰ, 11 ਮਾਰਚ 2026 ਨੂੰ ਈਰਾਨ ਨੇ ਓਮਾਨ ਦੇ ਰਣਨੀਤਕ ਤੌਰ 'ਤੇ ਮਹੱਤਵਪੂਰਨ ਸਲਾਲਾਹ ਪੋਰਟ (Salalah Port) 'ਤੇ ਡਰੋਨਾਂ ਨਾਲ ਭਿਆਨਕ ਹਮਲਾ ਕੀਤਾ। ਇਸ ਹਮਲੇ ਤੋਂ ਬਾਅਦ ਪੋਰਟ 'ਤੇ ਸਥਿਤ ਤੇਲ ਭੰਡਾਰਾਂ ਵਿੱਚ ਭਿਆਨਕ ਅੱਗ ਲੱਗ ਗਈ ਹੈ, ਜਿਸ ਕਾਰਨ ਪੂਰੇ ਇਲਾਕੇ ਵਿੱਚ ਦਹਿਸ਼ਤ ਦਾ ਮਾਹੌਲ ਹੈ।

ਸੂਤਰਾਂ ਅਨੁਸਾਰ, ਈਰਾਨੀ ਡਰੋਨਾਂ ਨੇ ਪੋਰਟ ਦੇ ਘੱਟੋ-ਘੱਟ 3 ਤੇਲ ਸਟੋਰੇਜ ਕੇਂਦਰਾਂ ਨੂੰ ਨਿਸ਼ਾਨਾ ਬਣਾਇਆ। ਇਸ ਹਮਲੇ ਕਾਰਨ ਉੱਥੇ ਮੌਜੂਦ ਲੱਖਾਂ ਲੀਟਰ ਕੱਚਾ ਤੇਲ ਧੂ-ਧੂ ਕਰਕੇ ਬਲ ਰਿਹਾ ਹੈ। ਅੱਗ ਇੰਨੀ ਭਿਆਨਕ ਹੈ ਕਿ ਨਿਕਲਣ ਵਾਲੇ ਕਾਲੇ ਧੂਏਂ ਦੇ ਗੁਬਾਰ ਨੇ ਕਈ ਮੀਲਾਂ ਤੱਕ ਅਸਮਾਨ ਨੂੰ ਪੂਰੀ ਤਰ੍ਹਾਂ ਕਾਲਾ ਕਰ ਦਿੱਤਾ ਹੈ। ਸੁਰੱਖਿਆ ਦੇ ਮੱਦੇਨਜ਼ਰ ਸਲਾਲਾਹ ਪੋਰਟ ਨੂੰ ਤੁਰੰਤ ਖਾਲੀ ਕਰਵਾ ਲਿਆ ਗਿਆ ਹੈ।

ਓਮਾਨੀ ਸਟੇਟ ਮੀਡੀਆ ਅਨੁਸਾਰ, ਦੇਸ਼ ਦੇ ਏਅਰ ਡਿਫੈਂਸ ਸਿਸਟਮ ਨੇ ਕਈ ਈਰਾਨੀ ਡਰੋਨਾਂ ਨੂੰ ਮਾਰ ਗਿਰਾਇਆ, ਪਰ ਬਦਕਿਸਮਤੀ ਨਾਲ ਕੁਝ ਡਰੋਨ ਸਿੱਧੇ ਤੇਲ ਟੈਂਕਾਂ 'ਤੇ ਜਾ ਡਿੱਗੇ, ਜਿਸ ਨਾਲ ਇਹ ਧਮਾਕਾ ਹੋਇਆ। ਰਾਹਤ ਦੀ ਗੱਲ ਇਹ ਰਹੀ ਕਿ ਇਸ ਹਮਲੇ ਵਿੱਚ ਹੁਣ ਤੱਕ ਕਿਸੇ ਦੇ ਜ਼ਖ਼ਮੀ ਹੋਣ ਦੀ ਖ਼ਬਰ ਨਹੀਂ ਹੈ, ਪਰ ਪੋਰਟ ਦੇ ਦੱਖਣੀ ਹਿੱਸੇ ਵਿੱਚ ਸਾਰੇ ਕੰਮਕਾਜ ਅਸਥਾਈ ਤੌਰ 'ਤੇ ਰੋਕ ਦਿੱਤੇ ਗਏ ਹਨ।

ਇਸ ਹਮਲੇ ਤੋਂ ਬਾਅਦ ਓਮਾਨ ਦੇ ਸੁਲਤਾਨ ਹੈਥਮ ਬਿਨ ਤਾਰਿਕ ਅਲ-ਸਈਦ ਨੇ ਈਰਾਨ ਦੇ ਰਾਸ਼ਟਰਪਤੀ ਮਸੂਦ ਪੇਜੇਸ਼ਕੀਅਨ ਨਾਲ ਫ਼ੋਨ 'ਤੇ ਗੱਲਬਾਤ ਕੀਤੀ। ਸੁਲਤਾਨ ਨੇ ਓਮਾਨੀ ਖੇਤਰ 'ਤੇ ਹੋਏ ਹਮਲੇ ਦੀ ਸਖ਼ਤ ਨਿੰਦਾ ਕਰਦਿਆਂ ਆਪਣੀ ਨਰਾਜ਼ਗੀ ਜ਼ਾਹਿਰ ਕੀਤੀ ਹੈ। ਉਨ੍ਹਾਂ ਸਪੱਸ਼ਟ ਕੀਤਾ ਕਿ ਇਸ ਜੰਗ ਵਿੱਚ ਓਮਾਨ ਨਿਰਪੱਖ ਹੈ ਅਤੇ ਆਪਣੀ ਸੁਰੱਖਿਆ ਲਈ ਹਰ ਜ਼ਰੂਰੀ ਕਦਮ ਚੁੱਕੇਗਾ।

ਮਾਹਿਰਾਂ ਅਨੁਸਾਰ, ਇਹ ਹਮਲਾ ਅਮਰੀਕਾ ਅਤੇ ਇਜ਼ਰਾਈਲ ਵੱਲੋਂ ਈਰਾਨ 'ਤੇ ਕੀਤੇ ਗਏ ਹਮਲਿਆਂ ਦਾ ਜਵਾਬ ਮੰਨਿਆ ਜਾ ਰਿਹਾ ਹੈ। ਈਰਾਨ ਹੁਣ ਖਾੜੀ ਖੇਤਰ ਦੇ ਊਰਜਾ ਅਤੇ ਲੌਜਿਸਟਿਕਸ ਢਾਂਚੇ ਨੂੰ ਨਿਸ਼ਾਨਾ ਬਣਾ ਰਿਹਾ ਹੈ। ਸਲਾਲਾਹ ਪੋਰਟ ਅਰਬ ਸਾਗਰ ਦਾ ਇੱਕ ਪ੍ਰਮੁੱਖ ਹੱਬ ਹੈ ਜੋ ਹੋਰਮੂਜ਼ ਸਟ੍ਰੇਟ ਨੂੰ ਬਾਈਪਾਸ ਕਰਨ ਵਾਲੇ ਮਹੱਤਵਪੂਰਨ ਵਪਾਰਕ ਰੂਟ 'ਤੇ ਸਥਿਤ ਹੈ। ਜ਼ਿਕਰਯੋਗ ਹੈ ਕਿ ਪਿਛਲੇ ਹਫ਼ਤੇ ਓਮਾਨ ਦੇ ਦੁਕਮ ਪੋਰਟ (Duqm Port) 'ਤੇ ਵੀ ਅਜਿਹਾ ਹੀ ਡਰੋਨ ਹਮਲਾ ਹੋਇਆ ਸੀ।
 

#BREAKING
An explosion in fuel tanks was reported at Salalah Port, Oman. pic.twitter.com/d6p150N2j9

— Tehran Times (@TehranTimes79) March 11, 2026