ਇਟਲੀ ਦੇ ਪ੍ਰਧਾਨ ਮੰਤਰੀ ਡਰਾਗੀ ਨੇ ਦਿੱਤਾ ਅਸਤੀਫ਼ਾ

ਰੋਮ (ਭਾਸ਼ਾ)- ਇਟਲੀ ਦੇ ਪ੍ਰਧਾਨ ਮੰਤਰੀ ਮਾਰੀਓ ਡਰਾਗੀ ਨੇ ਮੁੱਖ ਗੱਠਜੋੜ ਭਾਈਵਾਲਾਂ ਵੱਲੋਂ ਭਰੋਸੇ ਦੇ ਵੋਟ ਵਿੱਚ ਹਿੱਸਾ ਨਾ ਲੈਣ ਤੋਂ ਬਾਅਦ ਅਸਤੀਫਾ ਦੇ ਦਿੱਤਾ ਹੈ। ਉਨ੍ਹਾਂ ਨੇ ਆਪਣੇ ਅਸਤੀਫ਼ੇ ਰਾਹੀਂ ਦੇਸ਼ ਵਿੱਚ ਜਲਦੀ ਹੀ ਚੋਣਾਂ ਕਰਾਉਣ ਦੀ ਸੰਭਾਵਨਾ ਦੇ ਸੰਕੇਤ ਦਿੱਤੇ ਹਨ। ਇਸ ਦੇ ਨਾਲ ਹੀ ਇਸ ਨਾਜ਼ੁਕ ਸਮੇਂ ਵਿੱਚ ਇਟਲੀ ਅਤੇ ਯੂਰਪ ਲਈ ਅਨਿਸ਼ਚਿਤਤਾ ਦਾ ਇੱਕ ਨਵਾਂ ਦੌਰ ਸ਼ੁਰੂ ਹੋ ਗਿਆ ਹੈ। ਡਰਾਗੀ ਨੇ ਕੁਇਰੀਨਲੇ ਪੈਲੇਸ ਵਿਖੇ ਸਵੇਰ ਦੀ ਮੀਟਿੰਗ ਦੌਰਾਨ ਰਾਸ਼ਟਰਪਤੀ ਸਰਜੀਓ ਮੈਟਾਰੇਲਾ ਨੂੰ ਆਪਣਾ ਅਸਤੀਫ਼ਾ ਸੌਂਪਿਆ। ਮੈਟਰੇਲਾ ਦੇ ਦਫ਼ਤਰ ਨੇ ਕਿਹਾ ਕਿ ਰਾਸ਼ਟਰਪਤੀ ਨੇ ਇਸ ਘਟਨਾਕ੍ਰਮ ਤੋਂ ਬਾਅਦ ਇੱਕ ਡਰਾਗੀ ਸਰਕਾਰ ਨੂੰ  ਕਾਰਜਕਾਰੀ ਸਰਕਾਰ ਦੇ ਤੌਰ 'ਤੇ ਕੰਮ ਕਰਨ ਲਈ ਕਿਹਾ ਹੈ। 

ਪੜ੍ਹੋ ਇਹ ਅਹਿਮ ਖ਼ਬਰ- ਨਿਊਜ਼ੀਲੈਂਡ ਨੇ ਨਵੀਂ 'ਇਮੀਗ੍ਰੇਸ਼ਨ ਵੀਜ਼ਾ ਸ਼੍ਰੇਣੀ' ਕੀਤੀ ਲਾਂਚ, ਸਤੰਬਰ ਤੋਂ ਹੋਵੇਗੀ ਸ਼ੁਰੂ

ਡਰਾਗੀ ਦਾ ਅਸਤੀਫ਼ਾ ਰਾਸ਼ਟਰਪਤੀ ਨੇ ਪਿਛਲੇ ਹਫ਼ਤੇ ਰੱਦ ਕਰ ਦਿੱਤਾ ਸੀ। ਡਰਾਗੀ ਦੀ ਰਾਸ਼ਟਰੀ ਏਕਤਾ ਸਰਕਾਰ ਵੀਰਵਾਰ ਨੂੰ ਉਸ ਸਮੇਂ ਟੁੱਟ ਗਈ ਜਦੋਂ ਉਸ ਦੇ ਸੱਜੇ-ਪੱਖੀ, ਖੱਬੇਪੱਖੀ ਅਤੇ ਲੋਕਪ੍ਰਿਅ ਪਾਰਟੀਆਂ ਦੇ ਗੱਠਜੋੜ ਭਾਈਵਾਲਾਂ ਨੇ ਵਿਧਾਨ ਸਭਾ ਨੂੰ ਆਪਣਾ ਕਾਰਜਕਾਲ ਪੂਰਾ ਕਰਨ ਅਤੇ ਕੋਵਿਡ-19 ਮਹਾਮਾਰੀ ਤੋਂ ਉਭਰਨ ਦੀ ਆਗਿਆ ਦੇਣ ਲਈ ਯੂਰਪੀਅਨ ਯੂਨੀਅਨ ਫੰਡਿੰਗ ਲਈ ਇਕੱਠੇ ਆਉਣ ਲਈ ਪ੍ਰਧਾਨ ਮੰਤਰੀ ਦੀ ਅਪੀਲ ਠੁਕਰਾ ਦਿੱਤੀ। ਇਸ ਦੀ ਬਜਾਏ ਕੇਂਦਰੀ-ਸੱਜੇ ਪਾਰਟੀਆਂ ਫੋਰਜ਼ਾ ਇਟਾਲੀਆ ਅਤੇ ਲੀਗ ਅਤੇ ਲੋਕਪ੍ਰਿਯ 5-ਸਟਾਰ ਮੂਵਮੈਂਟ ਨੇ ਸੈਨੇਟ ਵਿੱਚ ਭਰੋਸੇ ਦੀ ਵੋਟ ਦਾ ਬਾਈਕਾਟ ਕੀਤਾ, ਜੋ ਡਰਾਗੀ ਦੀ 17 ਮਹੀਨਿਆਂ ਦੀ ਸਰਕਾਰ ਨਾਲ ਉਨ੍ਹਾਂ ਦੇ ਗਠਜੋੜ ਦੇ ਅੰਤ ਦਾ ਸਪੱਸ਼ਟ ਸੰਕੇਤ ਹੈ। 

ਡਰਾਗੀ ਨੇ ਅਸਤੀਫ਼ਾ ਦੇਣ ਤੋਂ ਪਹਿਲਾਂ ਸੰਸਦ ਦੇ ਹੇਠਲੇ ਸਦਨ ਚੈਂਬਰ ਆਫ ਡੈਪੂਟੀਜ਼ ਵਿਚ ਮੈਟਾਰੇਲਾ ਨੂੰ ਕਿਹਾ ਕਿ ਇਸ ਸਮੇਂ ਦੌਰਾਨ ਇਕੱਠੇ ਕੀਤੇ ਗਏ ਸਾਰੇ ਕੰਮ ਲਈ ਤੁਹਾਡਾ ਧੰਨਵਾਦ। ਜਦਕਿ ਇਤਾਲਵੀ ਅਖ਼ਬਾਰਾਂ ਨੇ ਮਹਿੰਗਾਈ, ਊਰਜਾ ਦੀਆਂ ਕੀਮਤਾਂ ਵਧਣ ਦੀ ਰਿਪੋਰਟ 'ਚ ਲੋੜੀਂਦੇ ਸੁਧਾਰਾਂ ਦੀ ਕਮੀ, ਯੂਕ੍ਰੇਨ ਖ਼ਿਲਾਫ਼ ਰੂਸ ਦੇ ਯੁੱਧ ਅਤੇ ਅਰਥਚਾਰੇ ਨੂੰ ਮੁੜ ਸੁਰਜੀਤ ਕਰਨ ਲਈ 200 ਅਰਬ ਯੂਰੋ ਦੇ ਯੂਰਪੀ ਸੰਘ ਦੇ ਫੰਡ ਦੇ ਬਾਕੀ ਹਿੱਸੇ ਨੂੰ ਹਾਸਲ ਕਰਨ ਲਈ ਲੋੜੀਂਦੇ ਸੁਧਾਰਾਂ ਨੂੰ ਲੈ ਕੇ ਇਕ ਆਵਾਜ਼ ਵਿਚ ਆਪਣੀ ਨਾਰਾਜ਼ਗੀ ਜ਼ਾਹਰ ਕੀਤੀ। ਅਖਬਾਰ 'ਲਾ ਸਟੈਂਪਾ' ਨੇ ਸਿਰਲੇਖ 'ਚ ਲਿਖਿਆ, ''ਸ਼ਰਮਨਾਕ''। ਲਾ ਰਿਪਬਲਿਕਾ ਨੇ ਲਿਖਿਆ "ਇਟਲੀ ਨੂੰ ਧੋਖਾ ਦਿੱਤਾ ਗਿਆ ਹੈ," । ਕੋਰੇਰਾ ਡੇਲਾ ਸੇਰਾ ਨੇ ਕਿਹਾ, "ਕੱਟੜ ਸਰਕਾਰ ਨੂੰ ਅਲਵਿਦਾ"।

ਨੋਟ- ਇਸ ਖ਼ਬਰ ਬਾਰੇ ਕੁਮੈਂਟ ਕਰ ਦਿਓ ਰਾਏ।