ਨੇਪਾਲ ਦੇ ਮਸਤਾਂਗ ਜ਼ਿਲ੍ਹੇ ''ਚ ਭਾਰਤੀ ਸ਼ਰਧਾਲੂ ਤੇ ਅਮਰੀਕੀ ਸੈਲਾਨੀ ਦੀ ਮੌਤ

ਕਾਠਮੰਡੂ : ਨੇਪਾਲ ਦੇ ਉੱਤਰੀ-ਪੱਛਮੀ ਮੁਸਤਾਂਗ ਜ਼ਿਲੇ 'ਚ ਸ਼ੁੱਕਰਵਾਰ ਨੂੰ ਦੋ ਵੱਖ-ਵੱਖ ਘਟਨਾਵਾਂ 'ਚ ਇਕ ਭਾਰਤੀ ਔਰਤ ਤੇ ਇਕ ਅਮਰੀਕੀ ਨਾਗਰਿਕ ਦੀ ਮੌਤ ਹੋ ਗਈ। ਪੁਲਸ ਨੇ ਇਹ ਜਾਣਕਾਰੀ ਦਿੱਤੀ। ਪੁਲਸ ਨੇ ਦੱਸਿਆ ਕਿ ਮੁੰਬਈ ਦੇ 69 ਸਾਲਾ ਸ਼ਾਰਦਾ ਮਹਾਦੇਵ ਲਗਾਡੇ ਦੀ ਪ੍ਰਸਿੱਧ ਹਿੰਦੂ-ਬੌਧੀ ਤੀਰਥ ਸਥਾਨ ਮੁਕਤੀਨਾਥ ਮੰਦਰ ਤੋਂ ਵਾਪਸ ਪਰਤਦੇ ਸਮੇਂ ਮੌਤ ਹੋ ਗਈ।

ਪੁਲਸ ਨੇ ਦੱਸਿਆ ਕਿ ਮੰਦਰ 'ਚ ਪੂਜਾ ਕਰਨ ਤੋਂ ਬਾਅਦ ਹੋਟਲ ਪਰਤਦੇ ਸਮੇਂ ਉਹ ਬੇਹੋਸ਼ ਹੋ ਗਈ, ਜਿਸ ਤੋਂ ਬਾਅਦ ਉਸ ਨੂੰ ਸਥਾਨਕ ਹਸਪਤਾਲ ਲਿਜਾਇਆ ਗਿਆ, ਜਿੱਥੇ ਉਸ ਨੂੰ ਮ੍ਰਿਤਕ ਐਲਾਨ ਦਿੱਤਾ ਗਿਆ। ਪੁਲਸ ਨੇ ਦੱਸਿਆ ਕਿ ਇੱਕ ਵੱਖਰੀ ਘਟਨਾ 'ਚ, ਮਿਲੋ ਗੋਲਸੇਗਰ, ਇੱਕ ਅਮਰੀਕੀ ਸੈਲਾਨੀ, ਪੇਂਡੂ ਥੰਗਸਰ 'ਚ ਆਪਣੇ ਹੋਟਲ ਦੇ ਕਮਰੇ 'ਚ ਬੇਹੋਸ਼ ਪਾਇਆ ਗਿਆ। ਜਦੋਂ ਉਸ ਨੂੰ ਇਲਾਜ ਲਈ ਜੋਮਸੋਮ ਹਸਪਤਾਲ ਲਿਜਾਇਆ ਗਿਆ ਤਾਂ ਡਾਕਟਰਾਂ ਨੇ ਉਸ ਨੂੰ ਮ੍ਰਿਤਕ ਐਲਾਨ ਦਿੱਤਾ। ਪੁਲਸ ਨੇ ਦੱਸਿਆ ਕਿ ਅਜਿਹਾ ਲੱਗਦਾ ਹੈ ਕਿ ਨਹਾਉਂਦੇ ਸਮੇਂ ਦਮ ਘੁਟਣ ਨਾਲ ਉਸਦੀ ਮੌਤ ਹੋਈ ਹੈ।