ਭਾਰਤੀ-ਅਮਰੀਕੀ ਡਾ. ਮੂਰਤੀ ਫਿਰ ਤੋਂ ਅਮਰੀਕਾ ਦੇ ਸਰਜਨ ਜਨਰਲ ਵਜੋਂ ਦੇਣਗੇ ਸੇਵਾਵਾਂ

ਵਾਸ਼ਿੰਗਟਨ- ਸੰਯੁਕਤ ਰਾਜ ਅਮਰੀਕਾ ਦੇ ਨਵੇਂ ਚੁਣੇ ਗਏ ਰਾਸ਼ਟਰਪਤੀ ਜੋਅ ਬਾਈਡੇਨ ਨੇ ਭਾਰਤੀ-ਅਮਰੀਕੀ ਡਾ. ਵਿਵੇਕ ਮੂਰਤੀ ਨੂੰ ਸਰਜਨ ਜਨਰਲ ਨਿਯੁਕਤ ਕੀਤਾ ਹੈ। ਬਾਈਡੇਨ ਨੇ ਵਿਸ਼ਵਾਸ ਜ਼ਾਹਰ ਕੀਤਾ ਹੈ ਕਿ ਮਸ਼ਹੂਰ ਭਾਰਤੀ-ਅਮਰੀਕੀ ਡਾਕਟਰ ਕੋਵਿਡ -19 ਮਹਾਮਾਰੀ ਨਾਲ ਨਜਿੱਠਣ ਅਤੇ ਵਿਗਿਆਨ ਅਤੇ ਦਵਾਈ ਪ੍ਰਤੀ ਲੋਕਾਂ ਦੇ ਵਿਸ਼ਵਾਸ ਨੂੰ ਬਹਾਲ ਕਰਨ ਵਿਚ ਅਹਿਮ ਭੂਮਿਕਾ ਅਦਾ ਕਰਨਗੇ।

ਡਾ. ਮੂਰਤੀ (43) ਓਬਾਮਾ ਪ੍ਰਸ਼ਾਸਨ ਵਿਚ ਅਮਰੀਕਾ ਦੇ ਸਰਜਨ ਜਨਰਲ ਸਨ ਅਤੇ ਡੋਨਾਲਡ ਟਰੰਪ ਦੇ ਰਾਸ਼ਟਰਪਤੀ ਬਣਨ ਤੋਂ ਬਾਅਦ ਅਚਾਨਕ ਉਨ੍ਹਾਂ ਨੂੰ ਅਹੁਦਾ ਛੱਡਣਾ ਪਿਆ। ਬਾਈਡੇਨ ਨੇ ਮੰਗਲਵਾਰ ਨੂੰ ਕਿਹਾ, “ਡਾ. ਮੂਰਤੀ ਜਨਤਕ ਸਿਹਤ ਅਤੇ ਡਾਕਟਰੀ ਮਾਮਲਿਆਂ ਵਿਚ ਮੇਰੇ ਸਭ ਤੋਂ ਭਰੋਸੇਮੰਦ ਸਲਾਹਕਾਰ ਹੋਣਗੇ ਅਤੇ ਮੈਂ ਜਨਤਕ ਸੇਵਾ ਜਾਰੀ ਰੱਖਣ ਲਈ ਉਨ੍ਹਾਂ ਦਾ ਧੰਨਵਾਦੀ ਹਾਂ।

ਬਾਈਡੇਨ ਨੇ ਕਿਹਾ, "ਆਪਣੇ ਪਹਿਲੇ ਕਾਰਜਕਾਲ ਵਿਚ ਉਨ੍ਹਾਂ ਨਸ਼ਾਖੋਰੀ ਤੋਂ ਮਾਨਸਿਕ ਸਿਹਤ ਵਰਗੇ ਸਭ ਤੋਂ ਵੱਡੇ ਮੁੱਦਿਆਂ ਨਾਲ ਨਜਿੱਠਣ ਵਿਚ ਸਹਾਇਤਾ ਕੀਤੀ ਸੀ। ਬਾਈਡੇਨ ਨੇ ਕਿਹਾ, "ਸਭ ਤੋਂ ਵੱਡੀ ਗੱਲ ਇਹ ਹੈ ਕਿ ਉਹ ਸੰਭਾਵਨਾਵਾਂ ਨਾਲ ਭਰਪੂਰ ਸਥਾਨ ਤੋਂ ਇਸ ਦੇਸ਼ ਵਿਚ ਲੋਕਾਂ ਦੇ ਵਿਸ਼ਵਾਸ ਨੂੰ ਬਹਾਲ ਕਰਨ ਵਿਚ ਸਹਾਇਤਾ ਕਰਨਗੇ। ਉਹ ਭਾਰਤੀ ਪ੍ਰਵਾਸੀਆਂ ਦੇ ਪੁੱਤ ਹਨ, ਜਿਨ੍ਹਾਂ ਸੰਯੁਕਤ ਰਾਜ ਦੇ ਵਾਅਦੇ 'ਤੇ ਭਰੋਸਾ ਕਰਦਿਆਂ ਆਪਣੇ ਬੱਚਿਆਂ ਦਾ ਪਾਲਣ ਪੋਸ਼ਣ ਕੀਤਾ। ”

ਜ਼ਿਕਰਯੋਗ ਹੈ ਕਿ ਡਾ. ਮੂਰਤੀ ਇਸ ਤੋਂ ਪਹਿਲਾਂ 2014 ਤੋਂ 2017 ਤੱਕ ਇਸ ਅਹੁਦੇ' ਤੇ ਸੇਵਾ ਨਿਭਾਅ ਚੁੱਕੇ ਹਨ ਅਤੇ ਇਸ ਸਮੇਂ ਸੱਤਾ ਦੇ ਤਬਾਦਲੇ ਦੇ ਸਮੇਂ, ਬਾਈਡੇਨ ਕੋਵਿਡ-19 ਸਲਾਹਕਾਰੀ ਬੋਰਡ ਦੇ ਸਹਿ-ਚੇਅਰਮੈਨ ਹਨ।"