ਸਾਵਧਾਨ!  ਭਰੂਣ ਅਤੇ 2 ਸਾਲ ਤੱਕ ਦੇ ਬੱਚਿਆਂ 'ਤੇ ਪੈਂਦਾ ਹੈ ਉੱਚ ਤਾਪਮਾਨ ਦਾ ਪ੍ਰਭਾਵ

ਨਵੀਂ ਦਿੱਲੀ (ਭਾਸ਼ਾ)- ਉੱਚ ਤਾਪਮਾਨ ਬੱਚਿਆਂ ਨੂੰ ਵੱਡੇ ਪੱਧਰ 'ਤੇ ਪ੍ਰਭਾਵਿਤ ਕਰ ਸਕਦਾ ਹੈ। ਪੱਛਮੀ ਅਫਰੀਕੀ ਦੇਸ਼ ਗਾਂਬੀਆ ਵਿਚ ਗਰਭਧਾਰਨ ਦੇ 600 ਤੋਂ ਵੱਧ ਮਾਮਲਿਆਂ ਦੇ ਵਿਸ਼ਲੇਸ਼ਣ ਤੋਂ ਇਹ ਗੱਲ ਸਾਹਮਣੇ ਆਈ ਹੈ ਕਿ ਉੱਚ ਤਾਪਮਾਨ ਦੇ ਸੰਪਰਕ ਵਿਚ ਗਰਭ ਵਿਚ ਪਲ ਰਹੇ ਭਰੂਣ ਅਤੇ ਦੋ ਸਾਲ ਦੀ ਉਮਰ ਤੱਕ ਦੇ ਬੱਚਿਆਂ ਦੇ ਵਿਕਾਸ 'ਤੇ ਅਸਰ ਪੈ ਸਕਦਾ ਹੈ। 'ਦਿ ਜਰਨਲ 'ਦਿ ਲੈਂਸੇਟ ਪਲੈਨੇਟਰੀ ਹੈਲਥ' ਵਿੱਚ ਪ੍ਰਕਾਸ਼ਿਤ ਖੋਜਾਂ ਅਨੁਸਾਰ ਗਰਭ ਅਵਸਥਾ ਦੀ ਪਹਿਲੀ ਤਿਮਾਹੀ ਵਿੱਚ ਔਸਤ ਰੋਜ਼ਾਨਾ ਤਾਪਮਾਨ ਵਿੱਚ ਹਰੇਕ ਡਿਗਰੀ ਸੈਲਸੀਅਸ ਦੇ ਵਾਧੇ ਕਾਰਨ ਗਰਭ ਅਵਸਥਾ ਦੀ ਮਿਆਦ ਅਨੁਸਾਰ ਜਨਮ ਦੇ ਸਮੇਂ ਬੱਚੇ ਦਾ ਭਾਰ ਘੱਟ ਪਾਇਆ ਗਿਆ। 

668 ਬੱਚਿਆਂ 'ਤੇ 1,000 ਦਿਨਾਂ ਤੱਕ ਰੱਖੀ ਨਜ਼ਰ 

ਇੱਕ ਵਿਅਕਤੀ ਨੂੰ ਗਰਮੀ ਦੇ ਤਣਾਅ ਦਾ ਅਨੁਭਵ ਉਦੋਂ ਹੁੰਦਾ ਹੈ ਜਦੋਂ ਉਸਦੇ ਸਰੀਰ ਦੇ ਤਾਪਮਾਨ ਨੂੰ ਕੰਟਰੋਲ ਕਰਨ ਦੀ ਸਮਰੱਥਾ ਪ੍ਰਭਾਵਿਤ ਹੋ ਜਾਂਦੀ ਹੈ। ਬ੍ਰਿਟੇਨ ਦੇ 'ਲੰਡਨ ਸਕੂਲ ਆਫ਼ ਹਾਈਜੀਨ ਐਂਡ ਟ੍ਰੋਪਿਕਲ ਮੈਡੀਸਨ' (ਐਲ.ਐਸ.ਐਚ.ਟੀਐ.ਮ) ਦੀ ਅਗਵਾਈ ਵਿੱਚ ਖੋਜੀਆਂ ਨੇ ਕੁੱਲ 668 ਬੱਚਿਆਂ 'ਤੇ ਉਨ੍ਹਾਂ ਦੇ ਜੀਵਨ ਦੇ ਪਹਿਲੇ 1,000 ਦਿਨਾਂ ਤੱਕ ਨਜ਼ਰ ਰੱਖੀ, ਜਿਨ੍ਹਾਂ ਵਿੱਚੋਂ ਅੱਧੇ ਮੁੰਡੇ ਅਤੇ ਅੱਧੀਆਂ ਕੁੜੀਆਂ ਸਨ। ਜਨਮ ਦੇ ਸਮੇਂ 66 ਬੱਚਿਆਂ (10 ਪ੍ਰਤੀਸ਼ਤ) ਦਾ ਵਜ਼ਨ 2.5 ਕਿਲੋਗ੍ਰਾਮ ਤੋਂ ਘੱਟ ਸੀ, ਜਿਸ ਨੂੰ ਖੋਜੀਆਂ ਨੇ ਜਨਮ ਦੇ ਸਮੇਂ ਘੱਟ ਵਜ਼ਨ ਵਜੋਂ ਦਰਸਾਇਆ। ਅਧਿਐਨ ਕੀਤੇ ਗਏ ਬੱਚਿਆਂ ਵਿੱਚੋਂ ਲਗਭਗ ਇੱਕ ਤਿਹਾਈ (218) ਗਰਭਕਾਲ ਮੁਤਾਬਕ ਛੋਟੇ ਪਾਏ ਗਏ, ਜਦੋਂ ਕਿ ਨੌਂ ਬੱਚਿਆਂ ਦਾ ਜਨਮ ਸਮੇਂ ਤੋਂ ਪਹਿਲਾਂ ਹੋਇਆ। 

ਪੜ੍ਹੋ ਇਹ ਅਹਿਮ ਖ਼ਬਰ- ਦੁਨੀਆ ਨਾਲ ਇੰਝ connect ਹੁੰਦੀ ਹੈ ਨੰਨ੍ਹੀ ਜਾਨ.... AI ਨੇ ਕੀਤਾ ਖੁਲਾਸਾ

ਖੋਜੀਆਂ ਨੇ ਇਹ ਵੀ ਪਾਇਆ ਕਿ ਭਰੂਣ ਦੁਆਰਾ ਅਨੁਭਵ ਕੀਤੀ ਗਈ ਗਰਮੀ ਦਾ ਤਣਾਅ ਜਨਮ ਤੋਂ ਬਾਅਦ ਵੀ ਉਨ੍ਹਾਂ ਨੂੰ ਪ੍ਰਭਾਵਿਤ ਕਰ ਸਕਦਾ ਹੈ - ਉੱਚ ਗਰਮੀ ਦੇ ਸੰਪਰਕ ਵਿੱਚ ਆਉਣ ਵਾਲੇ ਦੋ ਸਾਲ ਤੱਕ ਦੀ ਉਮਰ ਦੇ ਬੱਚਿਆਂ ਦਾ ਵਜ਼ਨ ਅਤੇ ਲੰਬਾਈ ਉਨ੍ਹਾਂ ਦੀ ਉਮਰ ਦੇ ਹਿਸਾਬ ਨਾਲ ਘੱਟ ਹੁੰਦੀ ਹੈ। ਅਧਿਐਨ ਵਿੱਚ ਪਾਇਆ ਗਿਆ ਕਿ 6-18 ਮਹੀਨਿਆਂ ਦੀ ਉਮਰ ਦੇ ਉਹ ਬੱਚੇ, ਜਿਨ੍ਹਾਂ ਨੇ ਪਿਛਲੇ ਤਿੰਨ ਮਹੀਨਿਆਂ ਦੀ ਮਿਆਦ ਵਿੱਚ ਰੋਜ਼ਾਨਾ ਗਰਮੀ ਦੇ ਤਣਾਅ ਦੇ ਉੱਚ ਪੱਧਰ ਦਾ ਅਨੁਭਵ ਕੀਤਾ ਸੀ, ਸਭ ਤੋਂ ਵੱਧ ਪ੍ਰਭਾਵਿਤ ਪਾਏ ਗਏ ਸਨ। ਖੋਜੀਆਂ ਨੇ ਕਿਹਾ ਕਿ ਇਹ ਆਪਣੀ ਕਿਸਮ ਦਾ ਪਹਿਲਾ ਅਧਿਐਨ ਹੈ ਜੋ ਇਹ ਦਰਸਾਉਂਦਾ ਹੈ ਕਿ ਗਰਮੀ ਕਾਰਨ ਤਣਾਅ ਜਨਮ ਤੋਂ ਬਾਅਦ ਬੱਚਿਆਂ ਦੇ ਵਿਕਾਸ ਵਿੱਚ ਰੁਕਾਵਟ ਬਣ ਸਕਦਾ ਹੈ। ਉਨ੍ਹਾਂ ਕਿਹਾ ਕਿ ਜਿਵੇਂ-ਜਿਵੇਂ ਜਲਵਾਯੂ ਤਬਦੀਲੀ ਤੇਜ਼ ਹੋ ਰਹੀ ਹੈ, ਜਨਤਕ ਸਿਹਤ ਦੇ ਯਤਨਾਂ ਵਿੱਚ ਗਰਮੀ ਦੇ ਪ੍ਰਭਾਵਾਂ ਨੂੰ ਤੁਰੰਤ ਵਿਚਾਰਿਆ ਜਾਣਾ ਚਾਹੀਦਾ ਹੈ।

ਹੋਰ ਖੋਜ ਦੀ ਲੋੜ

ਮੈਡੀਕਲ ਰਿਸਰਚ ਕੌਂਸਲ ਯੂਨਿਟ ਦਿ ਗੈਂਬੀਆ, ਐਲ.ਐਸ.ਐਚ.ਟੀ.ਐਮ ਵਿਚ ਸਹਾਇਕ ਪ੍ਰੋਫੈਸਰ ਅਤੇ ਸ਼ੋਧ ਦੀ ਪ੍ਰਮੁੱਖ ਲੇਖਕਾ ਅੰਨਾ ਬੋਨੇਲ ਨੇ ਕਿਹਾ,"ਸਾਡਾ ਅਧਿਐਨ ਦਰਸਾਉਂਦਾ ਹੈ ਕਿ ਜਲਵਾਯੂ ਪਰਿਵਰਤਨ, ਭੋਜਨ ਅਸੁਰੱਖਿਆ ਅਤੇ ਕੁਪੋਸ਼ਣ ਦੇ ਆਪਸ ਵਿੱਚ ਜੁੜੇ ਸੰਕਟ ਸਭ ਤੋਂ ਵੱਧ ਕਮਜ਼ੋਰ ਲੋਕਾਂ ਨੂੰ ਪ੍ਰਭਾਵਤ ਕਰ ਰਹੇ ਹਨ।'' ਵਿਸ਼ਲੇਸ਼ਣ ਲਈ ਡੇਟਾ ਜਨਵਰੀ 2010 ਅਤੇ ਫਰਵਰੀ 2015 ਵਿਚਕਾਰ ਪੱਛਮੀ ਕੀਆਂਗ, ਗਾਂਬੀਆ ਵਿੱਚ ਕਰਵਾਏ ਗਏ ਇੱਕ ਪਰੀਖਣ ਦੇ ਹਿੱਸੇ ਵਜੋਂ ਇਕੱਤਰ ਕੀਤਾ ਗਿਆ ਸੀ। ਬੋਨੇਲ ਨੇ ਕਿਹਾ, "ਇਹ ਖੋਜਾਂ ਪਿਛਲੇ ਸਬੂਤਾਂ 'ਤੇ ਬਣਾਉਂਦੀਆਂ ਹਨ ਜੋ ਦਰਸਾਉਂਦੀਆਂ ਹਨ ਕਿ ਪਹਿਲੀ ਤਿਮਾਹੀ ਗਰਮੀ ਦੇ ਸੰਪਰਕ ਵਿਚ ਆਉਣ ਦੇ ਨਜ਼ਰੀਏ ਨਾਲ ਬਹੁਤ ਹੀ ਸੰਵੇਦਨਸ਼ੀਲ ਸਮਾਂ ਹੈ ਅਤੇ ਇਹ ਮਹੱਤਵਪੂਰਨ ਹੈ ਕਿ ਅਸੀਂ ਹੁਣ ਇਸ ਗੱਲ 'ਤੇ ਵਿਚਾਰ ਕਰੀਏ ਕਿ ਇਸ ਵਿੱਚ ਕਿਹੜੇ ਕਾਰਕ ਯੋਗਦਾਨ ਪਾ ਸਕਦੇ ਹਨ।" ਖੋਜੀਆਂ ਨੇ ਕਿਹਾ ਕਿ ਗੈਂਬੀਆ ਦੇ ਹੋਰ ਖੇਤਰਾਂ ਵਿੱਚ ਗਰਮੀ ਦੇ ਤਣਾਅ ਅਤੇ ਇਸਦੇ ਸਿਹਤ ਪ੍ਰਭਾਵਾਂ ਨੂੰ ਦੇਖਣ ਲਈ ਹੋਰ ਖੋਜ ਦੀ ਲੋੜ ਹੈ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ
For Android:- https://play.google.com/store/apps/details?id=com.jagbani&hl=en
For IOS:- https://itunes.apple.com/in/app/id538323711?mt=8

ਨੋਟ- ਇਸ ਖ਼ਬਰ ਬਾਰੇ ਕੁਮੈਂਟ ਕਰ ਦਿਓ ਰਾਏ।