ਇਗਲੈਂਡ : ਪੁਲਸ ਅਫ਼ਸਰ ਪਲਵਿੰਦਰ ਸਿੰਘ ਨੂੰ 14 ਮਹੀਨੇ ਦੀ ਜੇਲ
07/12/2019 9:50:36 AM
ਲੰਡਨ (ਮਨਦੀਪ ਖੁਰਮੀ)— ਪੰਜਾਬੀ ਭਾਈਚਾਰੇ ਦਾ ਸਿਰ ਇਕ ਵਾਰ ਫਿਰ ਸ਼ਰਮ ਨਾਲ ਝੁਕ ਗਿਆ ਹੈ। ਇੱਥੇ ਇਗਲੈਂਡ ਦੇ ਸ਼ਹਿਰ ਸਮੈਦਿਕ ਵਿਖੇ ਬਤੌਰ ਪੁਲਸ ਅਫ਼ਸਰ ਨੌਕਰੀ ਕਰਦੇ ਪਲਵਿੰਦਰ ਸਿੰਘ ਨੂੰ 14 ਮਹੀਨੇ ਦੀ ਜੇਲ ਦੀ ਸਜ਼ਾ ਸੁਣਾਈ ਗਈ ਹੈ। ਜੀ ਹਾਂ, ਆਪਣੀ ਨੌਕਰੀ ਦੌਰਾਨ ਕੁਤਾਹੀ ਅਤੇ ਸੈਕਸ ਭੁੱਖ ਪੂਰੀ ਕਰਨ ਦੇ ਝੱਸ ਦਾ ਖਮਿਆਜ਼ਾ ਪਲਵਿੰਦਰ ਸਿੰਘ ਨੂੰ ਨੌਕਰੀ ਗੁਆਉਣ ਦੇ ਨਾਲ-ਨਾਲ 14 ਮਹੀਨੇ ਦੀ ਜੇਲ ਵਜੋਂ ਭੁਗਤਣਾ ਪਵੇਗਾ।
ਬਰਮਿੰਘਮ ਕਰਾਊਨ ਕੋਰਟ ਵਿਖੇ ਚੱਲੇ ਕੇਸ ਦੌਰਾਨ ਪਲਵਿੰਦਰ ਸਿੰਘ 'ਤੇ 5 ਦੋਸ਼ ਲੱਗੇ ਹਨ। ਮੁੱਖ ਦੋਸ਼ ਇਹ ਹੈ ਕਿ ਉਹ ਆਪਣੀ ਡਿਊਟੀ ਦੌਰਾਨ ਵੀ ਮਹਿਕਮੇ ਵੱਲੋਂ ਦਿੱਤੇ ਗਏ ਫੋਨ 'ਤੇ ਸੈਕਸ ਵਰਕਰਾਂ ਨਾਲ ਹੀ ਗੱਲਾਂ ਕਰਦਾ ਰਹਿੰਦਾ ਸੀ। ਜ਼ਿਕਰਯੋਗ ਹੈ ਕਿ ਪਲਵਿੰਦਰ ਸਿੰਘ ਵਿਆਹੁਤਾ ਹੈ ਤੇ ਪਤਨੀ ਦੀ ਗ਼ੈਰਹਾਜ਼ਰੀ 'ਚ ਸੈਕਸ ਵਰਕਰਾਂ ਨੂੰ ਘਰ ਵਿੱਚ ਹੀ ਮਿਲਦਾ ਸੀ। ਇੱਥੇ ਦੱਸ ਦਈਏ ਕਿ ਪਲਵਿੰਦਰ ਸਿੰਘ ਨੂੰ ਮਹਿਕਮੇ ਵੱਲੋਂ ਨੌਕਰੀ ਦੌਰਾਨ ਵਧੀਆ ਸੇਵਾਵਾਂ ਬਦਲੇ ਬਹਾਦਰੀ ਪੁਰਸਕਾਰ ਵੀ ਮਿਲ ਚੁੱਕੇ ਹਨ।
ਹੈਰਾਨੀ ਇਸ ਗੱਲ ਦੀ ਵੀ ਹੈ ਕਿ ਜ਼ਿੰਮੇਵਾਰ ਅਫ਼ਸਰ ਹੋਣ ਦੇ ਬਾਵਜੂਦ ਪਲਵਿੰਦਰ ਸਿੰਘ ਨੇ ਮਹਿਕਮੇ ਦੇ ਫੋਨ ਦੀ ਨਿੱਜੀ ਲੋੜ ਲਈ ਦੁਰਵਰਤੋਂ ਕੀਤੀ। ਜਦੋਂਕਿ ਉਸ ਨੂੰ ਭਲੀਭਾਂਤ ਪਤਾ ਹੋਵੇਗਾ ਕਿ ਇੰਗਲੈਂਡ ਪੁਲਸ ਦੱਬੇ ਮੁਰਦੇ ਵੀ ਪੁੱਟ ਲੈਂਦੀ ਹੈ। ਜੋ ਵੀ ਹੋਵੇ ਪਲਵਿੰਦਰ ਸਿੰਘ ਦੀ ਕਰਤੂਤ ਨੇ ਭਾਈਚਾਰੇ ਨੂੰ ਤਾਂ ਸ਼ਰਮਿੰਦਗੀ ਦਿੱਤੀ ਹੀ ਹੈ ਸਗੋਂ ਆਪਣੇ ਭਵਿੱਖ 'ਤੇ ਵੀ ਸਵਾਲੀਆ ਨਿਸ਼ਾਨ ਲਾ ਲਿਆ ਹੈ।
