ਡੈਨਮਾਰਕ ਦੇ ਟਾਪੂ ''ਤੇ ਹੋਈ ਬੱਤੀ ਗੁੱਲ ! ਸਮੁੰਦਰੀ ਕੇਬਲ ''ਚ ਪੈ ਗਿਆ ਨੁਕਸ
Wednesday, Jan 21, 2026 - 05:01 PM (IST)
ਇੰਟਰਨੈਸ਼ਨਲ ਡੈਸਕ- ਡੈਨਮਾਰਕ ਦੇ ਟਾਪੂ ਬੋਰਨਹੋਮ ਵਿੱਚ ਬੁੱਧਵਾਰ ਨੂੰ ਉਸ ਸਮੇਂ ਬਿਜਲੀ ਸਪਲਾਈ ਪੂਰੀ ਤਰ੍ਹਾਂ ਠੱਪ ਹੋ ਗਈ, ਜਦੋਂ ਇੱਕ ਸਮੁੰਦਰੀ ਕੇਬਲ ਵਿੱਚ ਖ਼ਰਾਬੀ ਆ ਗਈ। ਸਥਾਨਕ ਬਿਜਲੀ ਸਪਲਾਈ ਕੰਪਨੀ, ਟ੍ਰੇਫੋਰ ਐਲ-ਨੈੱਟ ਓਸਟ ਨੇ ਪੁਸ਼ਟੀ ਕੀਤੀ ਹੈ ਕਿ ਇਹ ਸਮੱਸਿਆ ਬੋਰਨਹੋਮ ਅਤੇ ਸਵੀਡਨ ਦੇ ਵਿਚਕਾਰਲੀ ਕੇਬਲ ਵਿੱਚ ਨੁਕਸ ਪੈਣ ਕਾਰਨ ਪੈਦਾ ਹੋਈ ਹੈ।
ਜਾਣਕਾਰੀ ਅਨੁਸਾਰ ਟਾਪੂ 'ਤੇ ਬਿਜਲੀ ਸਥਾਨਕ ਸਮੇਂ ਅਨੁਸਾਰ ਸਵੇਰੇ 10:16 ਵਜੇ ਤੋਂ ਬੰਦ ਹੈ। ਹਾਲਾਂਕਿ ਕੇਬਲ ਵਿੱਚ ਨੁਕਸ ਪੈਣ ਦੇ ਅਸਲ ਕਾਰਨਾਂ ਬਾਰੇ ਅਜੇ ਤੱਕ ਕੋਈ ਸਪੱਸ਼ਟ ਜਾਣਕਾਰੀ ਨਹੀਂ ਮਿਲੀ ਹੈ। ਜ਼ਿਕਰਯੋਗ ਹੈ ਕਿ ਬੋਰਨਹੋਮ ਟਾਪੂ ਬਾਲਟਿਕ ਸਾਗਰ ਵਿੱਚ ਸਥਿਤ ਹੈ, ਜੋ ਸਵੀਡਨ ਦੇ ਦੱਖਣੀ ਤੱਟ ਦੇ ਬਿਲਕੁਲ ਨੇੜੇ ਪੈਂਦਾ ਹੈ।
ਐਮਰਜੈਂਸੀ ਸੇਵਾਵਾਂ ਨੇ ਬਿਜਲੀ ਸਪਲਾਈ ਨੂੰ ਮੁੜ ਬਹਾਲ ਕਰਨ ਲਈ ਰੌਨ ਵਿੱਚ ਇੱਕ ਪਾਵਰ ਪਲਾਂਟ ਸ਼ੁਰੂ ਕਰ ਦਿੱਤਾ ਹੈ। ਹਾਲਾਂਕਿ, ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਪੂਰੇ ਟਾਪੂ ਵਿੱਚ ਬਿਜਲੀ ਪੂਰੀ ਤਰ੍ਹਾਂ ਬਹਾਲ ਹੋਣ ਵਿੱਚ ਕੁਝ ਘੰਟਿਆਂ ਦਾ ਸਮਾਂ ਲੱਗ ਸਕਦਾ ਹੈ। ਸਥਾਨਕ ਪ੍ਰਸਾਰਕਾਂ ਦੁਆਰਾ ਸਥਿਤੀ 'ਤੇ ਲਗਾਤਾਰ ਨਜ਼ਰ ਰੱਖੀ ਜਾ ਰਹੀ ਹੈ ਤਾਂ ਜੋ ਨੁਕਸ ਦੇ ਕਾਰਨਾਂ ਦਾ ਪਤਾ ਲਗਾਇਆ ਜਾ ਸਕੇ।
