ਕੋਲੰਬੀਆ ਰਾਸ਼ਟਰਪਤੀ ਚੋਣਾਂ: ਟਰੰਪ ਦੇ ਸਮਰਥਕ ''ਦਿ ਟਾਈਗਰ'' ਨੇ ਪਹਿਲੇ ਗੇੜ ''ਚ ਬਣਾਈ ਲੀਡ

ਬੋਗੋਟਾ : ਕੋਲੰਬੀਆ ਦੀਆਂ ਰਾਸ਼ਟਰਪਤੀ ਚੋਣਾਂ ਵਿੱਚ ਦੱਖਣਪੰਥੀ ਆਗੂ ਅਤੇ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ਸਮਰਥਕ ਐਬੇਲਾਰਡੋ ਡੀ ਲਾ ਐਸਪ੍ਰੀਏਲਾ ਨੇ ਪਹਿਲੇ ਗੇੜ ਵਿੱਚ ਵੱਡੀ ਬੜ੍ਹਤ ਹਾਸਲ ਕਰਕੇ ਸਿਆਸੀ ਮਾਹਿਰਾਂ ਨੂੰ ਹੈਰਾਨ ਕਰ ਦਿੱਤਾ ਹੈ। ਐਤਵਾਰ ਨੂੰ ਹੋਈ ਵੋਟਿੰਗ ਵਿੱਚ 47 ਸਾਲਾ ਐਸਪ੍ਰੀਏਲਾ ਨੂੰ ਲਗਭਗ 44 ਫੀਸਦੀ ਵੋਟਾਂ ਮਿਲੀਆਂ ਹਨ, ਜਦਕਿ ਉਨ੍ਹਾਂ ਦੇ ਵਿਰੋਧੀ ਇਵਾਨ ਸੇਪੇਡਾ ਨੂੰ 41 ਫੀਸਦੀ ਤੋਂ ਘੱਟ ਵੋਟਾਂ ਪ੍ਰਾਪਤ ਹੋਈਆਂ ਹਨ।

ਆਪਣੇ ਸਮਰਥਕਾਂ ਵਿੱਚ 'ਦਿ ਟਾਈਗਰ' (The Tiger) ਦੇ ਨਾਮ ਨਾਲ ਮਸ਼ਹੂਰ ਇਸ ਵਕੀਲ ਨੇ ਅਜੇ ਤੱਕ ਕਦੇ ਕੋਈ ਚੁਣਿਆ ਹੋਇਆ ਅਹੁਦਾ ਨਹੀਂ ਸੰਭਾਲਿਆ ਹੈ। ਉਨ੍ਹਾਂ ਨੇ ਚੋਣ ਪ੍ਰਚਾਰ ਦੌਰਾਨ ਵਾਅਦਾ ਕੀਤਾ ਹੈ ਕਿ ਜੇਕਰ ਉਹ ਸੱਤਾ ਵਿੱਚ ਆਉਂਦੇ ਹਨ ਤਾਂ ਉਹ ਕੋਲੰਬੀਆ ਵਿੱਚ ਅਪਰਾਧਿਕ ਗਿਰੋਹਾਂ ਅਤੇ ਨਾਰਕੋ-ਅੱਤਵਾਦ ਦਾ ਪੂਰੀ ਤਾਕਤ ਨਾਲ ਸਫਾਇਆ ਕਰ ਦੇਣਗੇ। ਉਨ੍ਹਾਂ ਨੇ ਅਪਰਾਧੀਆਂ ਖਿਲਾਫ ਮਿਸਾਲੀ ਕਾਰਵਾਈ ਕਰਨ ਲਈ ਦੇਸ਼ ਵਿੱਚ 10 ਮੈਗਾ ਜੇਲ੍ਹਾਂ ਬਣਾਉਣ ਦਾ ਵਾਅਦਾ ਵੀ ਕੀਤਾ ਹੈ।

ਐਸਪ੍ਰੀਏਲਾ ਦੀ ਸਿਆਸੀ ਸੋਚ 'ਤੇ ਟਰੰਪ ਅਤੇ ਅਲ ਸਲਵਾਡੋਰ ਦੇ ਰਾਸ਼ਟਰਪਤੀ ਨਾਇਬ ਬੁਕੇਲੇ ਦੇ ਮਾਡਲ ਦਾ ਪ੍ਰਭਾਵ ਮੰਨਿਆ ਜਾਂਦਾ ਹੈ। ਹੁਣ 21 ਜੂਨ ਨੂੰ ਹੋਣ ਵਾਲੇ ਦੂਜੇ ਗੇੜ (Runoff) ਦੇ ਮੁਕਾਬਲੇ ਵਿੱਚ ਐਸਪ੍ਰੀਏਲਾ ਦਾ ਸਾਹਮਣਾ ਪ੍ਰਗਤੀਸ਼ੀਲ ਸੈਨੇਟਰ ਇਵਾਨ ਸੇਪੇਡਾ ਨਾਲ ਹੋਵੇਗਾ। ਸੇਪੇਡਾ ਮੌਜੂਦਾ ਰਾਸ਼ਟਰਪਤੀ ਗੁਸਤਾਵੋ ਪੇਤਰੋ ਦੇ ਕਰੀਬੀ ਸਹਿਯੋਗੀ ਹਨ।

ਸਿਆਸੀ ਵਿਸ਼ਲੇਸ਼ਕਾਂ ਅਨੁਸਾਰ, ਵੱਧਦੇ ਅਪਰਾਧ ਅਤੇ ਸੁਰੱਖਿਆ ਸਬੰਧੀ ਚਿੰਤਾਵਾਂ ਕਾਰਨ ਕੋਲੰਬੀਆ ਦੇ ਵੋਟਰਾਂ ਦਾ ਇੱਕ ਵੱਡਾ ਵਰਗ ਹੁਣ ਸਖ਼ਤ ਕਾਨੂੰਨ-ਵਿਵਸਥਾ ਦੀ ਨੀਤੀ ਵੱਲ ਆਕਰਸ਼ਿਤ ਹੋ ਰਿਹਾ ਹੈ। ਹਾਲਾਂਕਿ ਵਿਰੋਧੀ ਧਿਰ ਨੇ ਇਨ੍ਹਾਂ ਚੋਣ ਨਤੀਜਿਆਂ 'ਤੇ ਸਵਾਲ ਵੀ ਚੁੱਕੇ ਹਨ। ਹੁਣ ਸਾਰਿਆਂ ਦੀਆਂ ਨਜ਼ਰਾਂ 21 ਜੂਨ ਦੀਆਂ ਚੋਣਾਂ 'ਤੇ ਟਿਕੀਆਂ ਹੋਈਆਂ ਹਨ, ਜੋ ਇਹ ਤੈਅ ਕਰਨਗੀਆਂ ਕਿ ਕੋਲੰਬੀਆ ਅਮਰੀਕੀ ਰਾਸ਼ਟਰਪਤੀ ਟਰੰਪ ਦੇ ਸਮਰਥਕ ਦੀਆਂ ਦੱਖਣਪੰਥੀ ਨੀਤੀਆਂ ਨੂੰ ਅਪਣਾਏਗਾ ਜਾਂ ਨਹੀਂ।