ਪਾਕਿਸਤਾਨ ''ਚ ਇਸਾਈ ਅੱਤਿਆਚਾਰ : ਇਟਲੀ ਦੇ ਸੰਸਦ ਮੈਂਬਰਾਂ ਅਤੇ ਕਾਰਕੁਨਾਂ ਨੇ ਕਾਰਵਾਈ ਦੀ ਕੀਤੀ ਮੰਗ
Friday, Jul 26, 2024 - 06:18 PM (IST)
![](https://static.jagbani.com/multimedia/2024_7image_18_18_006980246yp.jpg)
ਰੋਮ (ਇਟਲੀ) : ਇਟਲੀ ਵਿਚ ਪਾਕਿਸਤਾਨੀ ਕ੍ਰਿਸਚੀਅਨਜ਼ ਦੀ ਐਸੋਸੀਏਸ਼ਨ ਵੱਲੋਂ ਨੀਦਰਲੈਂਡਜ਼ ਦੀ ਜੁਬਲੀ ਮੁਹਿੰਮ ਦੇ ਸਹਿਯੋਗ ਨਾਲ ਕਰਵਾਏ ਗਏ ਇਕ ਅਹਿਮ ਸਮਾਗਮ ਵਿਚ ਪੈਨਲ ਦੇ ਮੈਂਬਰਾਂ ਨੇ ਕੌਮਾਂਤਰੀ ਭਾਈਚਾਰੇ, ਯੂਰਪੀ ਸੰਸਦ ਮੈਂਬਰਾਂ ਖਾਸ ਕਰਕੇ ਇਟਾਲੀਅਨ ਵਿਧਾਇਕਾਂ ਨੂੰ ਪਾਕਿਸਤਾਨ ਵਿਚ ਇਸਾਈ ਭਾਈਚਾਰੇ 'ਤੇ ਹੋ ਰਹੇ ਜ਼ੁਲਮਾਂ ਨੂੰ ਖਤਮ ਕਰਨ ਲਈ ਬਣਦੀ ਕਾਰਵਾਈ ਕਰਨ ਦੀ ਮੰਗ ਕੀਤੀ ਹੈ। ਕੂਟਨੀਤਕ ਚੈਨਲਾਂ ਦੀ ਵਰਤੋਂ ਕਰਨ ਅਤੇ ਵਿਧਾਨਿਕ ਸੁਧਾਰਾਂ ਦੀ ਵਕਾਲਤ ਕਰਨ ਲਈ ਕਿਹਾ ਗਿਆ।
ਈਸ਼ਨਿੰਦਾ ਕਾਨੂੰਨਾਂ ਦੀ ਦੁਰਵਰਤੋਂ ਅਤੇ ਜਬਰੀ ਧਰਮ ਪਰਿਵਰਤਨ ਨੂੰ ਸਮਾਗਮ ਵਿੱਚ ਮਹੱਤਵਪੂਰਨ ਮੁੱਦਿਆਂ ਵਜੋਂ ਉਭਾਰਿਆ ਗਿਆ। ਪ੍ਰੈੱਸ ਕਾਨਫਰੰਸ ਦੌਰਾਨ ਵ੍ਹਾਈਟੇਕਰ ਹਾਊਸ ਵੱਲੋਂ ਪ੍ਰਕਾਸ਼ਿਤ ਸ਼ਗੁਫਤਾ ਕੌਸਰ ਅਤੇ ਯੂਜੀਨ ਬਾਕ ਦੁਆਰਾ ਲਿਖੀ ਗਈ ਨਵੀਂ ਕਿਤਾਬ ਅੰਡਰ ਥਰੇਟ ਆਫ ਡੈਥ: ਏ ਮਦਰਜ਼ ਫੇਥ ਇਨ ਦਾ ਫੇਸ ਆਫ ਇਨਜਸਟਿਸ, ਨੂੰ ਰਿਲੀਜ਼ ਕੀਤਾ ਗਿਆ। ਕਿਤਾਬ ਪਾਕਿਸਤਾਨ ਵਿੱਚ ਈਸ਼ਨਿੰਦਾ ਦੇ ਦੋਸ਼ਾਂ ਦਾ ਸਾਹਮਣਾ ਕਰ ਰਹੇ ਕੌਸਰ ਦੇ ਦੁਖਦਾਈ ਅਨੁਭਵਾਂ ਦਾ ਵਰਣਨ ਕਰਦੀ ਹੈ।
ਸਮਾਗਮ ਵਿੱਚ ਬੋਲਦਿਆਂ ਕੌਸਰ ਨੇ ਆਪਣੀ ਹੱਢਬੀਤੀ ਸਾਂਝੀ ਕੀਤੀ, ਜਿਸ ਵਿੱਚ ਉਸਨੇ ਕਿਹਾ ਕਿ ਉਸਨੂੰ ਸਜ਼ਾ ਤੋਂ ਬਚਣ ਲਈ ਇਸਲਾਮ ਕਬੂਲ ਕਰਨ ਦੇ ਕਈ ਮੌਕੇ ਦਿੱਤੇ ਗਏ ਸਨ। ਮੌਤ ਦੀਆਂ ਧਮਕੀਆਂ ਦੇ ਬਾਵਜੂਦ ਉਸਨੇ ਆਪਣੇ ਈਸਾਈ ਧਰਮ ਨੂੰ ਤਿਆਗਣ ਤੋਂ ਇਨਕਾਰ ਕਰ ਦਿੱਤਾ। ਉਸਨੇ ਕਿਹਾ, "ਪਾਕਿਸਤਾਨ ਵਿੱਚ ਈਸਾਈ, ਬਘਿਆੜਾਂ ਦੀਆਂ ਭੇਡਾਂ ਵਾਂਗ ਹਨ, ਜਿਨ੍ਹਾਂ ਦਾ ਕੋਈ ਰਾਖਾ ਨਹੀਂ ਹੈ।" ਉਨ੍ਹਾਂ ਨੇ ਸਮਾਗਮ ਦਾ ਆਯੋਜਨ ਕਰਨ ਅਤੇ ਆਪਣੀ ਅੱਠ ਸਾਲਾਂ ਦੀ ਕੈਦ ਦੀ ਗਵਾਹੀ ਸਾਂਝੀ ਕਰਨ ਦੀ ਆਗਿਆ ਦੇਣ ਲਈ ਲੋਰੇਂਜ਼ੋ ਮਾਲਾਗੋਲਾ ਅਤੇ ਪ੍ਰੋਫੈਸਰ ਸ਼ਾਹਿਦ ਮੋਬੀਨ ਦਾ ਧੰਨਵਾਦ ਪ੍ਰਗਟਾਇਆ।