ਹੁਣ ਪੈਟਰੋਲ ਦੀ ਲੋੜ ਨਹੀਂ! ਇਸ ਤਕਨੀਕ ਨਾਲ ਚੱਲੇਗੀ ''ਸਵਿਫਟ''

ਨਵੀਂ ਦਿੱਲੀ : ਆਟੋਮੋਬਾਈਲ ਦੇ ਖੇਤਰ ਵਿੱਚ ਇੱਕ ਵੱਡਾ ਬਦਲਾਅ ਆਉਣ ਵਾਲਾ ਹੈ। AVL ਟੈਕਨਾਲੋਜੀ ਅਤੇ ਸੁਜ਼ੂਕੀ ਨੇ ਮਿਲ ਕੇ ਹਾਈਡ੍ਰੋਜਨ ਨਾਲ ਚੱਲਣ ਵਾਲੀ Suzuki Swift ਦਾ ਇੱਕ ਪ੍ਰੋਟੋਟਾਈਪ ਪੇਸ਼ ਕੀਤਾ ਹੈ, ਜਿਸ ਵਿੱਚ ਪੈਟਰੋਲ ਪਾਉਣ ਦੀ ਬਿਲਕੁਲ ਵੀ ਲੋੜ ਨਹੀਂ ਪਵੇਗੀ।

ਕੀ ਹੈ ਖਾਸੀਅਤ?
ਇਹ ਕਾਰ ਦੂਜੀ ਜਨਰੇਸ਼ਨ ਦੀ ਸਵਿਫਟ 'ਤੇ ਆਧਾਰਿਤ ਹੈ ਅਤੇ ਇਸ ਵਿੱਚ 1.4 ਲੀਟਰ ਦਾ ਹਾਈਡ੍ਰੋਜਨ ਇੰਜਣ ਲਗਾਇਆ ਗਿਆ ਹੈ। ਖਾਸ ਗੱਲ ਇਹ ਹੈ ਕਿ ਇਹ ਕਾਰ ਫਿਊਲ ਸੈੱਲ ਦੀ ਬਜਾਏ ਹਾਈਡ੍ਰੋਜਨ ਇੰਟਰਨਲ ਕੰਬਸ਼ਨ ਇੰਜਣ ਤਕਨੀਕ 'ਤੇ ਕੰਮ ਕਰਦੀ ਹੈ, ਜੋ ਕਿ ਪੈਟਰੋਲ ਇੰਜਣ ਵਾਂਗ ਹੀ ਹੈ ਪਰ ਚੱਲਣ ਲਈ ਹਾਈਡ੍ਰੋਜਨ ਦੀ ਵਰਤੋਂ ਕਰਦੀ ਹੈ। ਮਾਹਿਰਾਂ ਦਾ ਮੰਨਣਾ ਹੈ ਕਿ ਇਹ ਤਕਨੀਕ ਫਿਊਲ ਸੈੱਲ ਸਿਸਟਮ ਦੇ ਮੁਕਾਬਲੇ ਜ਼ਿਆਦਾ ਸਸਤੀ ਅਤੇ ਆਮ ਲੋਕਾਂ ਤੱਕ ਪਹੁੰਚਾਉਣ ਵਿੱਚ ਆਸਾਨ ਹੋ ਸਕਦੀ ਹੈ।

ਦਮਦਾਰ ਤਾਕਤ ਅਤੇ ਪਰਫਾਰਮੈਂਸ
ਇਸ ਨਵੀਂ ਸਵਿਫਟ ਦਾ ਇੰਜਣ 134 hp ਦੀ ਪਾਵਰ ਅਤੇ 220 Nm ਦਾ ਟਾਰਕ ਪੈਦਾ ਕਰਦਾ ਹੈ, ਜੋ ਕਿ ਆਮ ਪੈਟਰੋਲ ਇੰਜਣ ਨਾਲੋਂ ਵੀ ਬਿਹਤਰ ਦੱਸਿਆ ਜਾ ਰਿਹਾ ਹੈ। ਜਾਣਕਾਰੀ ਅਨੁਸਾਰ, ਇਹ ਪੈਟਰੋਲ ਇੰਜਣ ਦੇ ਮੁਕਾਬਲੇ ਲਗਭਗ 13 hp ਜ਼ਿਆਦਾ ਪਾਵਰ ਪ੍ਰਦਾਨ ਕਰਦਾ ਹੈ।

ਭਵਿੱਖ ਦੀ ਗੱਡੀ
ਭਾਰਤ ਸਰਕਾਰ ਅਤੇ ਕੇਂਦਰੀ ਮੰਤਰੀ ਨਿਤਿਨ ਗਡਕਰੀ ਲਗਾਤਾਰ ਦੇਸ਼ ਵਿੱਚ ਹਾਈਡ੍ਰੋਜਨ ਅਤੇ ਹੋਰ ਸਾਫ਼ ਈਂਧਨਾਂ ਨੂੰ ਉਤਸ਼ਾਹਿਤ ਕਰ ਰਹੇ ਹਨ। ਜੇਕਰ ਮਾਰੂਤੀ ਸੁਜ਼ੂਕੀ ਇਸ ਮਾਡਲ ਨੂੰ ਭਵਿੱਖ ਵਿੱਚ ਉਤਪਾਦਨ ਲਈ ਲੈ ਕੇ ਆਉਂਦੀ ਹੈ, ਤਾਂ ਇਹ ਭਾਰਤ ਵਿੱਚ ਗ੍ਰੀਨ ਮੋਬਿਲਿਟੀ ਲਈ ਇੱਕ ਵੱਡਾ ਕਦਮ ਸਾਬਤ ਹੋਵੇਗਾ। ਹਾਲਾਂਕਿ, ਅਜੇ ਦੇਸ਼ ਵਿੱਚ ਹਾਈਡ੍ਰੋਜਨ ਸਟੇਸ਼ਨਾਂ ਵਰਗੀਆਂ ਸਹੂਲਤਾਂ ਦਾ ਵਿਸਥਾਰ ਹੋਣਾ ਬਾਕੀ ਹੈ।