ਗੈਜੇਟ ਡੈਸਕ -  ਦੇਸ਼ 'ਚ ਐਲਪੀਜੀ (LPG) ਦੀ ਸਪਲਾਈ 'ਚ ਆ ਰਹੀ ਕਿੱਲਤ ਅਤੇ ਵਧਦੀਆਂ ਕੀਮਤਾਂ ਦੇ ਵਿਚਕਾਰ ਹੁਣ ਸਾਈਬਰ ਠੱਗਾਂ ਨੇ ਆਮ ਜਨਤਾ ਨੂੰ ਨਿਸ਼ਾਨਾ ਬਣਾਉਣਾ ਸ਼ੁਰੂ ਕਰ ਦਿੱਤਾ ਹੈ। ਇਸਰਾਈਲ-ਅਮਰੀਕਾ-ਈਰਾਨ ਤਣਾਅ ਕਾਰਨ ਪੈਦਾ ਹੋਏ ਸਪਲਾਈ ਸੰਕਟ ਦਾ ਫਾਇਦਾ ਉਠਾਉਂਦੇ ਹੋਏ, ਠੱਗ ਫਰਜ਼ੀ ਐਲਪੀਜੀ ਬੁਕਿੰਗ ਲਿੰਕਾਂ ਰਾਹੀਂ ਲੋਕਾਂ ਦੇ ਬੈਂਕ ਖਾਤੇ ਖਾਲੀ ਕਰ ਰਹੇ ਹਨ। 

ਕਿਵੇਂ ਹੁੰਦੀ ਹੈ ਠੱਗੀ?

ਇੰਡੀਅਨ ਸਾਈਬਰ ਕ੍ਰਾਈਮ ਕੋਆਰਡੀਨੇਸ਼ਨ ਸੈਂਟਰ ਦੇ ਅਨੁਸਾਰ, ਸਕੈਮਰ SMS, WhatsApp ਅਤੇ ਸੋਸ਼ਲ ਮੀਡੀਆ ਇਸ਼ਤਿਹਾਰਾਂ ਰਾਹੀਂ 'ਤੁਰੰਤ LPG ਬੁਕਿੰਗ' ਦੇ ਨਾਂ 'ਤੇ ਫਰਜ਼ੀ ਲਿੰਕ ਭੇਜਦੇ ਹਨ। ਇਹ ਲਿੰਕ ਦੇਖਣ 'ਚ ਬਿਲਕੁਲ ਅਧਿਕਾਰਤ ਵੈੱਬਸਾਈਟਾਂ ਵਰਗੇ ਲੱਗਦੇ ਹਨ। ਜਿਵੇਂ ਹੀ ਕੋਈ ਯੂਜ਼ਰ ਇਨ੍ਹਾਂ ਲਿੰਕਾਂ 'ਤੇ ਕਲਿੱਕ ਕਰਦਾ ਹੈ, ਉਨ੍ਹਾਂ ਤੋਂ ਨਿੱਜੀ ਜਾਣਕਾਰੀ, ਬੈਂਕ ਵੇਰਵੇ ਜਾਂ ਓਟੀਪੀ (OTP) ਮੰਗਿਆ ਜਾਂਦਾ ਹੈ। ਕਈ ਮਾਮਲਿਆਂ 'ਚ, ਠੱਗ ਗਾਹਕਾਂ ਨੂੰ ਕਿਊਆਰ (QR) ਕੋਡ ਸਕੈਨ ਕਰਨ ਲਈ ਕਹਿੰਦੇ ਹਨ ਜਾਂ ਅਣਪਛਾਤੀਆਂ ਐਪਾਂ (APKs) ਡਾਊਨਲੋਡ ਕਰਨ ਲਈ ਉਕਸਾਉਂਦੇ ਹਨ, ਜਿਸ ਨਾਲ ਪੂਰਾ ਬੈਂਕ ਖਾਤਾ ਖਾਲੀ ਹੋ ਸਕਦਾ ਹੈ।

ਬਚਾਅ ਲਈ ਜਾਰੀ ਕੀਤੀ ਗਈ ਐਡਵਾਈਜ਼ਰੀ :-

ਸਰਕਾਰ ਅਤੇ ਸਾਈਬਰ ਮਾਹਿਰਾਂ ਨੇ ਲੋਕਾਂ ਨੂੰ ਇਨ੍ਹਾਂ ਗੱਲਾਂ ਦਾ ਖਾਸ ਧਿਆਨ ਰੱਖਣ ਦੀ ਸਲਾਹ ਦਿੱਤੀ ਹੈ:

ਫਰਜ਼ੀ ਦਾਅਵਿਆਂ ਤੋਂ ਬਚੋ
- ਗੈਸ ਦੀ ਕਮੀ ਦੌਰਾਨ ਤੁਰੰਤ ਬੁਕਿੰਗ ਦਾ ਦਾਅਵਾ ਕਰਨ ਵਾਲੇ ਸੰਦੇਸ਼ਾਂ ਤੋਂ ਸਾਵਧਾਨ ਰਹੋ।

ਅਧਿਕਾਰਤ ਸਰੋਤਾਂ ਦੀ ਵਰਤੋਂ
- ਹਮੇਸ਼ਾ ਸਿਲੰਡਰ ਬੁੱਕ ਕਰਨ ਲਈ ਸਿਰਫ਼ ਵੈਰੀਫਾਈਡ ਵੈੱਬਸਾਈਟਾਂ ਜਾਂ ਗੈਸ ਕੰਪਨੀਆਂ ਦੀਆਂ ਅਧਿਕਾਰਤ ਐਪਾਂ ਦੀ ਹੀ ਵਰਤੋਂ ਕਰੋ।

ਗੁਪਤ ਜਾਣਕਾਰੀ ਸਾਂਝੀ ਨਾ ਕਰੋ
- ਕੋਈ ਵੀ ਅਧਿਕਾਰਤ ਕੰਪਨੀ ਕਦੇ ਵੀ ਲਿੰਕ ਰਾਹੀਂ ਓਟੀਪੀ, ਪਿੰਨ ਜਾਂ ਬੈਂਕ ਵੇਰਵੇ ਨਹੀਂ ਮੰਗਦੀ।

ਕਰਾਸ-ਚੈੱਕ ਕਰੋ
- ਕਿਸੇ ਵੀ ਅਣਪਛਾਤੇ ਨੰਬਰ ਤੋਂ ਆਏ ਲਿੰਕ 'ਤੇ ਕਲਿੱਕ ਕਰਨ ਤੋਂ ਪਹਿਲਾਂ ਉਸ ਦੀ ਚੰਗੀ ਤਰ੍ਹਾਂ ਜਾਂਚ ਕਰ ਲਵੋ।

ਜਨਤਾ ਨੂੰ ਅਪੀਲ ਕੀਤੀ ਗਈ ਹੈ ਕਿ ਉਹ ਅਜਿਹੇ ਕਿਸੇ ਵੀ ਸ਼ੱਕੀ ਲਿੰਕ ਦਾ ਸ਼ਿਕਾਰ ਨਾ ਬਣਨ ਅਤੇ ਹਮੇਸ਼ਾ ਸੁਚੇਤ ਰਹਿਣ।