ਆ ਗਈ HERO ਦੀ ਪਹਿਲੀ Flex Fule ਬਾਈਕ, ਨਿਤਿਨ ਗਡਕਰੀ ਨੇ ਕੀਤੀ ਲਾਂਚ
Wednesday, Jun 03, 2026 - 08:49 PM (IST)
ਆਟੋ ਡੈਸਕ- ਦੇਸ਼ ਦੀ ਸਭ ਤੋਂ ਵੱਡੀ ਦੋਪਹੀਆ ਵਾਹਨ ਨਿਰਮਾਤਾ ਕੰਪਨੀ ਹੀਰੋ ਮੋਟੋਕੌਰਪ ਨੇ ਅੱਜ ਦਿੱਲੀ ਵਿੱਚ ਆਯੋਜਿਤ ਇੱਕ ਸ਼ਾਨਦਾਰ ਪ੍ਰੋਗਰਾਮ ਦੌਰਾਨ ਆਪਣੀਆਂ ਪਹਿਲੀਆਂ ਫਲੈਕਸ-ਫਿਊਲ ਬਾਈਕਸ ਪੇਸ਼ ਕਰਕੇ ਇੱਕ ਨਵਾਂ ਮੀਲ ਪੱਥਰ ਸਥਾਪਿਤ ਕੀਤਾ ਹੈ। ਕੰਪਨੀ ਨੇ ਆਪਣੇ ਸਭ ਤੋਂ ਪ੍ਰਸਿੱਧ ਮਾਡਲਾਂ, ਸਪਲੈਂਡਰ ਪਲੱਸ ਅਤੇ ਐੱਚ.ਐੱਫ. ਡੀਲਕਸ ਦੇ ਫਲੈਕਸ ਫਿਊਲ ਸੰਸਕਰਣ ਲਾਂਚ ਕੀਤੇ ਹਨ।
ਇਨ੍ਹਾਂ ਨਵੀਆਂ ਬਾਈਕਸ ਨੂੰ ਕੇਂਦਰੀ ਸੜਕ ਆਵਾਜਾਈ ਅਤੇ ਰਾਜਮਾਰਗ ਮੰਤਰੀ ਨਿਤਿਨ ਗਡਕਰੀ ਨੇ ਲਾਂਚ ਕੀਤਾ। ਇਸ ਮੌਕੇ 'ਤੇ ਪੈਟਰੋਲੀਅਮ ਮੰਤਰੀ ਹਰਦੀਪ ਸਿੰਘ ਪੁਰੀ ਅਤੇ ਹੀਰੋ ਮੋਟੋਕੌਰਪ ਦੇ ਸੀ.ਈ.ਓ. ਹਰਸ਼ਵਰਧਨ ਚਿਤਲੇ ਵੀ ਮੌਜੂਦ ਸਨ। ਮੰਤਰੀ ਗਡਕਰੀ ਨੇ ਪਹਿਲਾਂ ਵੀ ਵਾਹਨ ਨਿਰਮਾਤਾਵਾਂ ਨੂੰ ਫਲੈਕਸ ਫਿਊਲ ਵਾਹਨਾਂ 'ਤੇ ਧਿਆਨ ਦੇਣ ਦੀ ਅਪੀਲ ਕੀਤੀ ਸੀ ਅਤੇ ਹੀਰੋ ਮੋਟੋਕੌਰਪ 'ਮਾਸ ਮਾਰਕੀਟ' (ਆਮ ਲੋਕਾਂ ਲਈ) ਵਿੱਚ ਅਜਿਹੀ ਬਾਈਕ ਲਿਆਉਣ ਵਾਲਾ ਪਹਿਲਾ ਬ੍ਰਾਂਡ ਬਣ ਗਿਆ ਹੈ।
ਕੀ ਹੈ ਫਲੈਕਸ ਫਿਊਲ ਦੀ ਖਾਸੀਅਤ?
ਇਹ ਦੇਸ਼ ਦੀਆਂ ਪਹਿਲੀਆਂ 100cc ਫਲੈਕਸ ਫਿਊਲ ਮੋਟਰਸਾਈਕਲ ਹਨ, ਜੋ E20 ਤੋਂ ਲੈ ਕੇ E85 ਤੱਕ ਦੇ ਇਥੇਨੌਲ ਬਲੈਂਡਿਡ ਪੈਟਰੋਲ 'ਤੇ ਆਸਾਨੀ ਨਾਲ ਚੱਲ ਸਕਦੀਆਂ ਹਨ। ਕੰਪਨੀ ਦਾ ਮੰਨਣਾ ਹੈ ਕਿ ਇਸ ਤਕਨਾਲੋਜੀ ਨਾਲ ਪੈਟਰੋਲ 'ਤੇ ਨਿਰਭਰਤਾ ਘਟੇਗੀ ਅਤੇ ਵਾਤਾਵਰਣ ਵਿੱਚ ਪ੍ਰਦੂਸ਼ਣ ਨੂੰ ਘਟਾਉਣ ਵਿੱਚ ਵੀ ਮਦਦ ਮਿਲੇਗੀ।
ਕੀਮਤਾਂ ਅਤੇ ਉਪਲਬਧਤਾ
HF Deluxe Flex Fuel: 72,792 ਰੁਪਏ (ਐਕਸ-ਸ਼ੋਅਰੂਮ)।
Splendor+ Flex Fuel: 82,710 ਰੁਪਏ (ਐਕਸ-ਸ਼ੋਅਰੂਮ)।
ਇਹ ਬਾਈਕਸ ਜੁਲਾਈ 2026 ਤੋਂ ਦਿੱਲੀ ਅਤੇ ਮਹਾਰਾਸ਼ਟਰ ਦੇ ਕੁਝ ਚੁਣਿੰਦਾ ਇਲਾਕਿਆਂ ਵਿੱਚ ਉਪਲਬਧ ਹੋਣਗੀਆਂ, ਜਿਸ ਤੋਂ ਬਾਅਦ ਇਨ੍ਹਾਂ ਨੂੰ ਪੂਰੇ ਦੇਸ਼ ਵਿੱਚ ਵੇਚਿਆ ਜਾਵੇਗਾ।
ਬਾਈਕ ਦੀਆਂ ਖੂਬੀਆਂ
ਨਵੀਂ ਸਪਲੈਂਡਰ ਪਲੱਸ ਫਲੈਕਸ ਫਿਊਲ ਵਿੱਚ 97.2cc ਦਾ ਇੰਜਣ ਦਿੱਤਾ ਗਿਆ ਹੈ, ਜੋ E85 ਫਿਊਲ ਨਾਲ 6.3 kW ਦੀ ਪਾਵਰ ਅਤੇ 8.3 Nm ਦਾ ਟਾਰਕ ਪੈਦਾ ਕਰਦਾ ਹੈ। ਇਸ ਵਿੱਚ ਹੀਰੋ ਦੀ ਪੇਟੈਂਟ i3S ਸਟਾਰਟ-ਸਟਾਪ ਤਕਨਾਲੋਜੀ, ਨਵਾਂ ਡਿਜੀ-ਐਨਾਲਾਗ ਇੰਸਟ੍ਰੂਮੈਂਟ ਕਲੱਸਟਰ, ਸਾਈਡ ਸਟੈਂਡ ਇੰਜਣ ਕੱਟ-ਆਫ ਫੀਚਰ ਅਤੇ ਟਿਊਬਲੈੱਸ ਟਾਇਰ ਦਿੱਤੇ ਗਏ ਹਨ। ਬਾਈਕ ਨੂੰ ਨਵੇਂ ਬਲੈਕ ਅਤੇ ਲਾਈਮ ਯੈਲੋ ਗ੍ਰਾਫਿਕਸ ਨਾਲ ਇੱਕ ਨਵੀਂ ਦਿੱਖ ਦਿੱਤੀ ਗਈ ਹੈ।
ਫਲੈਕਸ ਫਿਊਲ ਦੇ ਖੇਤਰ ਵਿੱਚ ਆਉਣ ਵਾਲੇ ਦਿਨਾਂ ਵਿੱਚ ਹੋਰ ਵੀ ਹਲਚਲ ਦੇਖਣ ਨੂੰ ਮਿਲੇਗੀ। 5 ਜੂਨ ਨੂੰ ਮਾਰੂਤੀ ਸੁਜ਼ੂਕੀ ਆਪਣੀ ਪਹਿਲੀ ਫਲੈਕਸ ਫਿਊਲ ਕਾਰ ਪੇਸ਼ ਕਰੇਗੀ ਅਤੇ ਟਾਟਾ ਮੋਟਰਜ਼ ਵੀ 2027 ਦੀ ਸ਼ੁਰੂਆਤ ਵਿੱਚ ਇਸ ਖੇਤਰ ਵਿੱਚ ਕਦਮ ਰੱਖਣ ਦੀ ਤਿਆਰੀ ਕਰ ਰਹੀ ਹੈ।
