ਭਾਰਤ ''ਚ ਲਾਂਚ ਹੋਈ 2027 ਕਾਵਾਸਾਕੀ ਵਰਸਿਸ 650, ਨਵੇਂ ਰੰਗ ਦੇ ਨਾਲ ਮਿਲੇਗਾ ਸ਼ਾਨਦਾਰ ਅੰਦਾਜ਼

ਨਵੀਂ ਦਿੱਲੀ : ਪ੍ਰਸਿੱਧ ਮੋਟਰਸਾਈਕਲ ਨਿਰਮਾਤਾ ਕੰਪਨੀ ਕਾਵਾਸਾਕੀ (Kawasaki) ਨੇ ਭਾਰਤੀ ਬਾਜ਼ਾਰ ਵਿੱਚ ਆਪਣੀ ਮਸ਼ਹੂਰ ਐਡਵੈਂਚਰ ਬਾਈਕ ਵਰਸਿਸ 650 (Versys 650) ਦਾ 2027 ਮਾਡਲ ਲਾਂਚ ਕਰ ਦਿੱਤਾ ਹੈ। ਇਸ ਨਵੇਂ ਮਾਡਲ ਵਿੱਚ ਕੋਈ ਵੱਡਾ ਮਕੈਨੀਕਲ ਬਦਲਾਅ ਨਹੀਂ ਕੀਤਾ ਗਿਆ ਹੈ, ਪਰ ਕੰਪਨੀ ਨੇ ਬਾਈਕ ਨੂੰ ਇੱਕ ਬੇਹੱਦ ਆਕਰਸ਼ਕ ਨਵੇਂ ਰੰਗ 'Candy Lime Green' ਵਿੱਚ ਪੇਸ਼ ਕੀਤਾ ਹੈ, ਜੋ ਇਸ ਦੀ ਦਿੱਖ ਨੂੰ ਹੋਰ ਵੀ ਸ਼ਾਨਦਾਰ ਬਣਾਉਂਦਾ ਹੈ। ਬਾਈਕ ਦਾ ਬਾਕੀ ਡਿਜ਼ਾਈਨ, ਫਰੇਮ ਅਤੇ ਸਸਪੈਂਸ਼ਨ ਪਹਿਲਾਂ ਵਰਗਾ ਹੀ ਹੈ। ਰਿਪੋਰਟਾਂ ਅਨੁਸਾਰ, ਇਸ ਨਵੇਂ ਮਾਡਲ ਦੀ ਡਿਲੀਵਰੀ ਅਗਸਤ 2026 ਦੇ ਅਖੀਰ ਤੱਕ ਸ਼ੁਰੂ ਹੋਣ ਦੀ ਉਮੀਦ ਹੈ।

2027 ਕਾਵਾਸਾਕੀ ਵਰਸਿਸ 650 ਵਿੱਚ ਪਹਿਲਾਂ ਵਾਂਗ ਹੀ 649cc ਦਾ ਲਿਕਵਿਡ-ਕੂਲਡ, ਪੈਰਲਲ-ਟਵਿਨ ਇੰਜਣ ਦਿੱਤਾ ਗਿਆ ਹੈ, ਜੋ 8,500 rpm 'ਤੇ 67 hp ਦੀ ਪਾਵਰ ਅਤੇ 7,000 rpm 'ਤੇ 61 Nm ਦਾ ਟਾਰਕ ਜਨਰੇਟ ਕਰਦਾ ਹੈ। ਇਸ ਇੰਜਣ ਨੂੰ 6-ਸਪੀਡ ਗਿਅਰਬਾਕਸ ਅਤੇ ਅਸਿਸਟ-ਐਂਡ-ਸਲਿਪਰ ਕਲੱਚ ਨਾਲ ਜੋੜਿਆ ਗਿਆ ਹੈ।

ਲੰਬੇ ਸਫ਼ਰ ਨੂੰ ਧਿਆਨ ਵਿੱਚ ਰੱਖਦੇ ਹੋਏ, ਬਾਈਕ ਵਿੱਚ 21 ਲੀਟਰ ਦਾ ਵੱਡਾ ਫਿਊਲ ਟੈਂਕ ਦਿੱਤਾ ਗਿਆ ਹੈ। ਇਸ ਤੋਂ ਇਲਾਵਾ, ਇਸ ਵਿੱਚ ਐਡਜਸਟੇਬਲ ਵਿੰਡਸਕ੍ਰੀਨ, ਫੁੱਲ-LED ਲਾਈਟਿੰਗ, ਟ੍ਰੈਕਸ਼ਨ ਕੰਟਰੋਲ ਅਤੇ ਸਮਾਰਟਫੋਨ ਕਨੈਕਟੀਵਿਟੀ ਦੇ ਨਾਲ 4.3-ਇੰਚ ਦੀ TFT ਕਲਰ ਡਿਸਪਲੇਅ ਵਰਗੇ ਅਤਿ-ਆਧੁਨਿਕ ਫੀਚਰਸ ਮਿਲਦੇ ਹਨ। ਕੰਪਨੀ ਵੱਲੋਂ ਇਸ ਨਵੇਂ ਮਾਡਲ ਦੀ ਐਕਸ-ਸ਼ੋਅਰੂਮ ਕੀਮਤ ₹8.63 ਲੱਖ ਨਿਰਧਾਰਤ ਕੀਤੀ ਗਈ ਹੈ। 

ਮਿਡਲਵੇਟ ਟੂਰਿੰਗ ਅਤੇ ਐਡਵੈਂਚਰ ਬਾਈਕ ਸੈਗਮੈਂਟ ਵਿੱਚ ਕਾਵਾਸਾਕੀ ਵਰਸਿਸ 650 ਦਾ ਮੁੱਖ ਮੁਕਾਬਲਾ ਹੌਂਡਾ NX500 (Honda NX500) ਨਾਲ ਹੋਵੇਗਾ, ਜਿਸ ਦੀ ਭਾਰਤੀ ਬਾਜ਼ਾਰ ਵਿੱਚ ਕੀਮਤ ₹7.44 ਲੱਖ ਹੈ।