''ਦਿ ਇੰਡੀਆ ਸਟੋਰੀ'' ਦਾ ਦਮਦਾਰ ਟੀਜ਼ਰ ਰਿਲੀਜ਼

ਮੁੰਬਈ (ਏਜੰਸੀ)- ਬਹੁਤ ਉਡੀਕੀ ਜਾ ਰਹੀ ਫਿਲਮ 'ਦਿ ਇੰਡੀਆ ਸਟੋਰੀ: ਸਲੋ ਪੋਇਜ਼ਨ ਇਨ ਪ੍ਰੋਗਰੈਸ' ਦਾ ਦਮਜਾਰ ਟੀਜ਼ਰ ਰਿਲੀਜ਼ ਹੋ ਗਿਆ ਹੈ। ਅਦਾਕਾਰਾ ਕਾਜਲ ਅਗਰਵਾਲ ਅਤੇ ਅਦਾਕਾਰ ਸ਼੍ਰੇਅਸ ਤਲਪੜੇ ਸਟਾਰਰ ਇਹ ਫਿਲਮ ਭਾਰਤ ਵਿੱਚ ਵਧਦੀ ਕੀਟਨਾਸ਼ਕ ਖੇਤੀ ਅਤੇ ਉਸ ਨਾਲ ਸਮਾਜ ਅਤੇ ਜਨਤਕ ਸਿਹਤ 'ਤੇ ਪੈ ਰਹੇ ਇਸਦੇ ਗੰਭੀਰ ਪ੍ਰਭਾਵ 'ਤੇ ਕੇਂਦ੍ਰਿਤ ਹੈ। ਜ਼ੀ ਸਟੂਡੀਓਜ਼ ਅਤੇ ਐਮਆਈਜੀ ਪ੍ਰੋਡਕਸ਼ਨ ਐਂਡ ਸਟੂਡੀਓਜ਼ ਦੇ ਬੈਨਰ ਹੇਠ ਬਣਾਈ ਗਈ ਇਸ ਫਿਲਮ ਦਾ ਨਿਰਦੇਸ਼ਨ ਚੇਤਨ ਡੀਕੇ ਦੁਆਰਾ ਕੀਤਾ ਗਿਆ ਹੈ, ਜਿਸਦੀ ਕਹਾਣੀ, ਸਕ੍ਰੀਨਪਲੇ ਅਤੇ ਨਿਰਮਾਣ ਸਾਗਰ ਬੀ. ਸ਼ਿੰਦੇ ਨੇ ਕੀਤਾ ਹੈ। ਇਹ ਫਿਲਮ 24 ਜੁਲਾਈ 2026 ਨੂੰ ਦੁਨੀਆ ਭਰ ਦੇ ਸਿਨੇਮਾਘਰਾਂ ਵਿੱਚ ਹਿੰਦੀ, ਤੇਲਗੂ ਅਤੇ ਤਾਮਿਲ ਭਾਸ਼ਾਵਾਂ ਵਿੱਚ ਰਿਲੀਜ਼ ਕੀਤੀ ਜਾਵੇਗੀ। 

ਫਿਲਮ ਦੇ ਟੀਜ਼ਰ ਵਿੱਚ ਕਾਜਲ ਅਗਰਵਾਲ ਅਤੇ ਸ਼੍ਰੇਅਸ ਤਲਪੜੇ ਦੇ ਕਿਰਦਾਰਾਂ ਨੂੰ ਨਿਆਂ ਲਈ ਲੜਦੇ ਹੋਏ, ਕੀਟਨਾਸ਼ਕ ਖੇਤੀ ਦੇ ਭਿਆਨਕ ਸੱਚ ਨੂੰ ਉਜਾਗਰ ਕਰਨ ਦੀ ਕੋਸ਼ਿਸ਼ ਕਰਦੇ ਹੋਏ ਦਰਸਾਇਆ ਗਿਆ ਹੈ। ਟੀਜ਼ਰ ਇਹ ਸੰਦੇਸ਼ ਦਿੰਦਾ ਹੈ ਕਿ ਜ਼ਹਿਰੀਲੇ ਰਸਾਇਣ ਹੌਲੀ-ਹੌਲੀ ਸਾਡੇ ਰੋਜ਼ਾਨਾ ਭੋਜਨ ਦਾ ਹਿੱਸਾ ਬਣ ਰਹੇ ਹਨ, ਖਾਸ ਕਰਕੇ ਨੌਜਵਾਨ ਪੀੜ੍ਹੀ ਦੀ ਸਿਹਤ ਲਈ ਗੰਭੀਰ ਖ਼ਤਰਾ ਪੈਦਾ ਕਰ ਰਹੇ ਹਨ। ਆਪਣੀ ਭਾਵਨਾਤਮਕ ਅਤੇ ਸਮਾਜਿਕ ਤੌਰ 'ਤੇ ਸੰਬੰਧਿਤ ਕਹਾਣੀ ਦੇ ਜ਼ਰੀਏ, ਫਿਲਮ ਇੱਕ ਅਜਿਹੇ ਮੁੱਦੇ 'ਤੇ ਕੇਂਦ੍ਰਤ ਕਰਦੀ ਹੈ ਜਿਸ ਨੂੰ ਅਕਸਰ ਨਜ਼ਰਅੰਦਾਜ਼ ਕੀਤਾ ਜਾਂਦਾ ਹੈ। ਫਿਲਮ ਦੇ ਸਹਿ-ਨਿਰਮਾਤਾਵਾਂ ਵਿੱਚ ਸਵਾਤੀ ਵਿਨਾਇਕ ਸੈਨਦਾਨੇ, ਅਨੀਤਾ ਜਾਧਵ, ਵਿਨਾਇਕ ਸੈਨਦਾਨੇ, ਕਲਪੇਸ਼ ਸ਼ਾਹ, ਦੇਵਯਾਨੀ ਖੋਰਾਟੇ, ਅਤੇ ਪ੍ਰੇਮ ਜੋਸ਼ੀ ਸ਼ਾਮਲ ਹਨ। ਤਕਨੀਕੀ ਟੀਮ ਵਿੱਚ ਸਿਨੇਮੈਟੋਗ੍ਰਾਫਰ ਨਿਸ਼ਾਂਤ ਭਾਗਵਤ, ਸੰਗੀਤਕਾਰ ਮੰਗੇਸ਼ ਢਾਕੜੇ, ਸੰਪਾਦਕ ਆਸ਼ੀਸ਼ ਮਹਾਤਰੇ, ਗੀਤਕਾਰ ਸ਼ਕੀਲ ਆਜ਼ਮੀ ਅਤੇ ਸਾਊਂਡ ਡਿਜ਼ਾਈਨਰ ਅਨਮੋਲ ਭਾਵੇ ਸ਼ਾਮਲ ਹਨ।