ਲੋਕਾਂ ਨੇ ਸਵਾਲ ਉਠਾਏ ਪਰ ਮਾਂ ਨੇ ਕਦੇ ਮੇਰਾ ਸਾਥ ਨਹੀਂ ਛੱਡਿਆ : ਤਾਨਿਆ ਮਿੱਤਲ

ਮੁੰਬਈ- ਜ਼ੀ-5 ’ਤੇ 12 ਜੂਨ ਤੋਂ ਇਕ ਨਵਾਂ ਸ਼ੋਅ ‘ਮਾਂ ਹੈ ਨਾ’ ਆ ਰਿਹਾ ਹੈ। ਸ਼ੋਅ ਨੂੰ ਬਾਲੀਵੁੱਡ ਦੀ ਮੰਨੀ-ਪ੍ਰਮੰਨੀ ਅਦਾਕਾਰਾ ਸ਼ਿਲਪਾ ਸ਼ੈੱਟੀ ਹੋਸਟ ਕਰੇਗੀ। ਸ਼ੋਅ ’ਚ ਕੰਟੈਸਟੈਂਟ ਆਪੋ-ਆਪਣੀਆਂ ਮਾਵਾਂ ਨਾਲ ਨਜ਼ਰ ਆਉਣਗੇ ਤੇ ਕੁਕਿੰਗ ਵੀ ਕਰਨਗੇ। ਸ਼ੋਅ ਬਹੁਤ ਮਨੋਰੰਜਕ ਹੋਣ ਵਾਲਾ ਹੈ। ਇਸ ਸ਼ੋਅ ਬਾਰੇ ਤਾਨਿਆ ਮਿੱਤਲ, ਭਾਗਿਆਸ਼੍ਰੀ ਤੇ ਗੁੱਲੂ ਨੇ ਪੰਜਾਬ ਕੇਸਰੀ/ਨਵੋਦਿਆ ਟਾਈਮਜ਼/ਜਗ ਬਾਣੀ/ਹਿੰਦ ਸਮਾਚਾਰ ਨਾਲ ਖ਼ਾਸ ਗੱਲਬਾਤ ਕੀਤੀ ਅਤੇ ਦਿਲਚਸਪ ਗੱਲਾਂ ਸਾਂਝੀਆਂ ਕੀਤੀਆਂ ...

ਮੇਰੇ ਲਈ ਮੇਰੀ ਮਾਂ ਭਗਵਾਨ ਦਾ ਅਵਤਾਰ : ਤਾਨਿਆ ਮਿੱਤਲ

ਪ੍ਰ. ਮਾਂ ਤੇ ਭੋਜਨ ਦੋਵੇਂ ਇਕ-ਦੂਜੇ ਨਾਲ ਬਹੁਤ ਜੁੜੇ ਹੋਏ ਹਨ। ਤੁਹਾਡੀ ਮੰਮੀ ਤੁਹਾਨੂੰ ਲੈ ਕੇ ਕਿਹੋ ਜਿਹੇ ਹਨ? ਕੀ ਅੱਜ ਵੀ ਸਭ ਤੋਂ ਜ਼ਿਆਦਾ ਚਿੰਤਾ ਖਾਣੇ ਦੀ ਹੀ ਰਹਿੰਦੀ ਹੈ?

- ਮੇਰੀ ਮੰਮੀ ਨੂੰ ਇਨ੍ਹਾਂ ਸਾਰੀਆਂ ਚੀਜ਼ਾਂ ਬਾਰੇ ਜ਼ਿਆਦਾ ਪਤਾ ਨਹੀਂ ਹੈ ਪਰ ਸੱਚ ਕਹਾਂ ਤਾਂ ਮੈਨੂੰ ਲੱਗਦਾ ਹੈ ਕਿ ਮੇਰੀ ਮੰਮੀ ਵਰਗੀ ਮਾਂ ਇਸ ਦੁਨੀਆਂ ’ਚ ਸ਼ਾਇਦ ਕੋਈ ਨਹੀਂ ਹੋ ਸਕਦੀ। ਮੈਂ ਆਪਣੇ-ਆਪ ਨੂੰ ਬਹੁਤ ਖ਼ੁਸ਼ਕਿਸਮਤ ਮੰਨਦੀ ਹਾਂ ਕਿ ਮੈਨੂੰ ਅਜਿਹੀ ਮਾਂ ਮਿਲੀ ਹੈ। ਮੇਰੀ ਜ਼ਿੰਦਗੀ ’ਚ ਕਈ ਅਜਿਹੇ ਮੌਕੇ ਆਏ ਜਦੋਂ ਲੋਕਾਂ ਨੇ ਮੇਰੇ ’ਤੇ ਸਵਾਲ ਉਠਾਏ, ਮੇਰੇ ਬਾਰੇ ਗੱਲਾਂ ਕੀਤੀਆਂ, ਮਾੜਾ ਵਰਤਾਓ ਕੀਤਾ। ਮੈਨੂੰ ਲੱਗਦਾ ਹੈ ਕਿ ਕਿਸੇ ਵੀ ਮਾਂ ਲਈ ਆਪਣੀ ਧੀ ਬਾਰੇ ਅਜਿਹੀਆਂ ਗੱਲਾਂ ਸੁਣਨਾ ਬਹੁਤ ਮੁਸ਼ਕਿਲ ਹੁੰਦਾ ਹੈ ਪਰ ਮੇਰੀ ਮੰਮੀ ਨੇ ਹਰ ਹਾਲਾਤ ’ਚ ਮੇਰਾ ਸਾਥ ਦਿੱਤਾ। ਮੇਰੇ ਲਈ ਤਾਂ ਉਹ ਭਗਵਾਨ ਦਾ ਅਵਤਾਰ ਹਨ। ਇੰਨਾ ਸਬਰ, ਇੰਨਾ ਪਿਆਰ ਅਤੇ ਸਹਿਣਸ਼ੀਲਤਾ ਹਰ ਕਿਸੇ ’ਚ ਨਹੀਂ ਹੁੰਦੀ।

ਪ੍ਰ. ਜਦੋਂ ਤੁਸੀਂ ਅਜਿਹੇ ਮੁਸ਼ਕਿਲ ਹਾਲਾਤਾਂ ’ਚੋਂ ਨਿਕਲ ਰਹੇ ਸੀ ਤਾਂ ਤੁਹਾਡੀ ਮੰਮੀ ਤੁਹਾਨੂੰ ਕੀ ਕਹਿੰਦੇ ਸਨ?

-ਮੇਰੀ ਮੰਮੀ ਹਮੇਸ਼ਾ ਮੈਨੂੰ ਕਹਿੰਦੇ ਹਨ ਕਿ ਰਾਮ ਨੇ ਤੁਹਾਨੂੰ ਕੁਝ ਖ਼ਾਸ ਬਣਾਇਆ ਹੈ, ਇਸੇ ਲਈ ਤੁਸੀਂ ਸਾਰਿਆਂ ਤੋਂ ਵੱਖਰੇ ਹੋ ਤੇ ਸਭ ਤੋਂ ਜ਼ਿਆਦਾ ਸਵਾਲ ਵੀ ਤੁਹਾਡੇ ’ਤੇ ਹੀ ਉੱਠਦੇ ਹਨ। ਮੇਰੀ ਜ਼ਿੰਦਗੀ ’ਚ ਜੋ ਵੀ ਸੰਸਕਾਰ ਹਨ, ਤਾਕਤ ਹੈ, ਉਹ ਸਭ ਮੇਰੀ ਮਾਂ ਤੋਂ ਹੀ ਮਿਲੀ ਹੈ। ਮੇਰੇ ਨਾਲ ਕੋਈ ਕਿੰਨਾ ਵੀ ਮਾੜਾ ਵਰਤਾਓ ਕਰੇ, ਮੈਂ ਕਦੇ ਵੀ ਉਲਟ ਕੇ ਜਵਾਬ ਨਹੀਂ ਦਿੰਦੀ। ਮੰਮੀ ਹਮੇਸ਼ਾ ਕਹਿੰਦੇ ਹਨ ਕਿ ਸਾਡੇ ਬਦਲੇ ਦਾ ਜਵਾਬ ਰਾਮ ਜੀ ਦੇਣਗੇ। ਸਾਨੂੰ ਕਦੇ ਵੀ ਆਪਣਾ ਰਸਤਾ ਨਹੀਂ ਛੱਡਣਾ ਚਾਹੀਦਾ।

ਪ੍ਰ. ਜਦੋਂ ਤੁਹਾਡੀ ਮਾਂ ਮੁੰਬਈ ਆਈ ਤਾਂ ਉਨ੍ਹਾਂ ਨੇ ਕੀ ਖਾਧਾ ਜਾਂ ਪਸੰਦ ਕੀਤਾ?

-ਮੇਰੀ ਮਾਂ ਜਦੋਂ ਮੁੰਬਈ ਆਈ ਤਾਂ ਉਹ ਆਪਣਾ ਸ਼ੈੱਫ ਨਾਲ ਲੈ ਕੇ ਆਈ। ਉਨ੍ਹਾਂ ਨੇ ਜੋ ਖਾਣਾ ਹੁੰਦਾ ਸੀ, ਉਹ ਉਸ ਤੋਂ ਬਣਵਾ ਲੈਂਦੇ ਸਨ। ਉਨ੍ਹਾਂ ਦੀ ਟੀਮ ਅਤੇ ਸਟਾਫ ਵੱਖਰਾ ਹੈ। ਅਸੀਂ ਉਨ੍ਹਾਂ ਚੀਜ਼ਾਂ ਪਿੱਛੇ ਨਹੀਂ ਭੱਜਦੇ, ਜਿਨ੍ਹਾਂ ਪਿੱਛੇ ਦੁਨੀਆਂ ਭੱਜਦੀ ਹੈ। ਮੇਰੇ ਮੰਮੀ-ਪਾਪਾ ਜਿੱਥੇ ਵੀ ਜਾਂਦੇ ਹਨ, ਉਨ੍ਹਾਂ ਦੀ ਟੀਮ ਨਾਲ ਹੀ ਹੁੰਦੀ ਹੈ।

ਮਾਂ ਨੇ ਆਪਣੇ ਸੁਪਨਿਆਂ ਨੂੰ ਤਿਆਗ ਕੇ ਸਾਡੇ ਸੁਪਨੇ ਪੂਰੇ ਕੀਤੇ : ਭਾਗਿਆਸ਼੍ਰੀ

ਪ੍ਰ. ਤੁਹਾਡੀ ਮੰਮੀ ਦੀ ਸਭ ਤੋਂ ਪਸੰਦੀਦਾ ਡਿਸ਼ ਕਿਹੜੀ ਹੈ?

-ਉਨ੍ਹਾਂ ਨੂੰ ਜ਼ਿਆਦਾਤਰ ਕੰਫਰਟ ਫੂਡ ਪਸੰਦ ਹੈ। ਜੋ ਸਾਦਾ ਤੇ ਘਰ ਦਾ ਬਣਿਆ ਹੁੰਦਾ ਹੈ, ਉਹੀ ਉਨ੍ਹਾਂ ਨੂੰ ਸਭ ਤੋਂ ਵੱਧ ਚੰਗਾ ਲੱਗਦਾ ਹੈ।

ਪ੍ਰ. ਸ਼ੋਅ ’ਚ ਤੁਹਾਡੀ ਮੰਮੀ ਵੀ ਤੁਹਾਡੇ ਨਾਲ ਆਏ ਹਨ। ਉਨ੍ਹਾਂ ਦਾ ਅਨੁਭਵ ਕਿਹੋ ਜਿਹਾ ਰਿਹਾ?

-ਮੇਰੀ ਮੰਮੀ ਬਹੁਤ ਇੰਟਰੋਵਰਟ ਹਨ। ਉਨ੍ਹਾਂ ਨੂੰ ਲੋਕਾਂ ਸਾਹਮਣੇ ਆਉਣਾ ਜਾਂ ਕੈਮਰੇ ਸਾਹਮਣੇ ਰਹਿਣਾ ਕਦੇ ਵੀ ਪਸੰਦ ਨਹੀਂ ਸੀ। ਮੈਂ ਉਨ੍ਹਾਂ ਨੂੰ ਹਮੇਸ਼ਾ ਘਰ ਤੇ ਪਰਿਵਾਰ ਤੱਕ ਸੀਮਤ ਦੇਖਿਆ ਹੈ। ਉਨ੍ਹਾਂ ਨੇ ਕਦੇ ਨਹੀਂ ਸੋਚਿਆ ਸੀ ਕਿ ਉਹ ਕਿਸੇ ਟੀ. ਵੀ. ਸ਼ੋਅ ਦਾ ਹਿੱਸਾ ਬਣਨਗੇ। ਇਸ ਲਈ ਜਦੋਂ ਉਹ ਮੇਰੇ ਨਾਲ ਸ਼ੋਅ ’ਚ ਆਏ ਤਾਂ ਇਹ ਮੇਰੇ ਲਈ ਇਕ ਬਹੁਤ ਹੀ ਭਾਵਨਾਤਮਕ ਪਲ ਸੀ। ਮੈਨੂੰ ਖ਼ੁਸ਼ੀ ਹੋਈ ਕਿ ਉਹ ਪਹਿਲੀ ਵਾਰ ਘਰ ਦੀ ਦੁਨੀਆ ਤੋਂ ਬਾਹਰ ਨਿਕਲੀ ਅਤੇ ਕੁਝ ਨਵਾਂ ਅਨੁਭਵ ਕੀਤਾ।

ਪ੍ਰ. ਜਦੋਂ ਤੁਸੀਂ ਕੰਟੈਂਟ ਕ੍ਰੀਏਟਰ ਬਣਨ ਦੀ ਸ਼ੁਰੂਆਤ ਕੀਤੀ ਸੀ ਤਾਂ ਤੁਹਾਡੇ ਮਾਤਾ-ਪਿਤਾ ਕੀ ਕਹਿੰਦੇ ਸਨ?

-ਮੈਂ ਪੜ੍ਹਾਈ ’ਚ ਚੰਗੀ ਸੀ। ਇਸ ਲਈ ਮੇਰੇ ਮਾਤਾ-ਪਿਤਾ ਹਮੇਸ਼ਾ ਚਾਹੁੰਦੇ ਸਨ ਕਿ ਮੈਂ ਪੜ੍ਹਾਈ ਕਰਾਂ ਤੇ ਇਕ ਚੰਗੀ ਸਰਕਾਰੀ ਨੌਕਰੀ ਕਰਾਂ। ਉਨ੍ਹਾਂ ਦੀ ਸੋਚ ਸੀ ਕਿ ਸਰਕਾਰੀ ਨੌਕਰੀ ’ਚ ਸਥਿਰਤਾ ਹੁੰਦੀ ਹੈ, ਪੈਨਸ਼ਨ ਹੁੰਦੀ ਹੈ ਤੇ ਜੀਵਨ ਸੁਰੱਖਿਅਤ ਰਹਿੰਦਾ ਹੈ। ਇਸ ਲਈ ਸ਼ੁਰੂ ’ਚ ਮੰਮੀ ਹਮੇਸ਼ਾ ਕਹਿੰਦੇ ਸਨ ਕਿ ਫੋਨ ਕਿਉਂ ਚਲਾ ਰਹੇ ਹੋ? ਪੜ੍ਹਾਈ ਕਰੋ ਪਰ ਅੱਜ ਉਹੀ ਮੰਮੀ ਖ਼ੁਦ ਫੋਨ ’ਤੇ ਰਹਿੰਦੇ ਹਨ ਅਤੇ ਸੋਸ਼ਲ ਮੀਡੀਆ ਦੇਖਦੇ ਹਨ।

ਪ੍ਰ. ਮਾਂ ਦੇ ਸੰਘਰਸ਼ਾਂ ਤੋਂ ਕੀ ਸਿੱਖਿਆ ਅਤੇ ਅੱਜ ਦੀ ਪੀੜ੍ਹੀ ਨੂੰ ਕੀ ਸੁਨੇਹਾ ਦੇਣਾ ਚਾਹੋਗੇ?

-ਮੈਨੂੰ ਲੱਗਦਾ ਹੈ ਕਿ ‘ਹਾਊਸ ਵਾਈਫ’ ਸ਼ਬਦ ਉਨ੍ਹਾਂ ਦੇ ਯੋਗਦਾਨ ਨੂੰ ਪੂਰੀ ਤਰ੍ਹਾਂ ਨਹੀਂ ਦਰਸਾਉਂਦਾ ਕਿਉਂਕਿ ਘਰ ਸੰਭਾਲਣਾ ਕਿਸੇ ਵੀ ਨੌਕਰੀ ਨਾਲੋਂ ਘੱਟ ਨਹੀਂ ਹੁੰਦਾ। ਮੇਰੀ ਮਾਂ ਨੇ ਪਰਿਵਾਰ ਲਈ ਬਹੁਤ ਤਿਆਗ ਕੀਤੇ। ਉਸ ਸਮੇਂ ਸਾਡੇ ਪਰਿਵਾਰ ਦੀ ਵਿੱਤੀ ਸਥਿਤੀ ਚੰਗੀ ਨਹੀਂ ਸੀ। ਮੇਰੇ ਪਾਪਾ ਨੇ ਕਰਜ਼ਾ ਲੈ ਕੇ ਜ਼ਮੀਨ ਖ਼ਰੀਦੀ ਅਤੇ ਘਰ ਬਣਾਇਆ ਜਦਕਿ ਮਾਂ ਨੇ ਪੂਰੇ ਪਰਿਵਾਰ ਦੀ ਜ਼ਿੰਮੇਵਾਰੀ ਸੰਭਾਲੀ। ਉਹ ਆਪਣੀ ਜ਼ਿੰਦਗੀ ’ਚ ਕੁਝ ਕਰਨਾ ਚਾਹੁੰਦੇ ਸਨ, ਉਨ੍ਹਾਂ ਨੇ ਗਾਇਕ ਬਣਨਾ ਸੀ ਅਤੇ ਅਧਿਆਪਨ ’ਚ ਵੀ ਰੁਝਾਨ ਸੀ ਪਰ ਹਾਲਾਤ ਕਾਰਨ ਉਨ੍ਹਾਂ ਦੇ ਸੁਪਨੇ ਪੂਰੇ ਨਹੀਂ ਹੋ ਸਕੇ। ਉਨ੍ਹਾਂ ਨੇ ਮੇਰੀ ਤੇ ਮੇਰੀ ਭੈਣ ਦੀ ਪਰਵਰਿਸ਼ ਨੂੰ ਹਮੇਸ਼ਾ ਤਰਜੀਹ ਦਿੱਤੀ। ਜੇ ਅੱਜ ਸਾਨੂੰ ਕੁਝ ਕਰਨ ਦਾ ਮੌਕਾ ਮਿਲਿਆ ਹੈ ਤਾਂ ਸਾਡੀ ਕੋਸ਼ਿਸ ਹੈ ਕਿ ਮਾਂ ਨੂੰ ਉਹ ਸਤਿਕਾਰ, ਪਿਆਰ ਤੇ ਖ਼ੁਸ਼ੀਆਂ ਦੇਈਏ, ਜਿਸ ਦੇ ਉਹ ਹੱਕਦਾਰ ਹਨ। ਮੈਂ ਆਪਣੇ ਮਾਤਾ-ਪਿਤਾ ਤੋਂ ਇਹੋ ਸਿੱਖਿਆ ਹੈ ਕਿ ਪਰਿਵਾਰ ਲਈ ਕੀਤੇ ਗਏ ਤਿਆਗ ਤੇ ਸਮਰਪਣ ਦੀ ਹਮੇਸ਼ਾ ਕਦਰ ਕਰਨੀ ਚਾਹੀਦੀ ਹੈ।

ਮਾਂ ਦੇ ਹੱਥ ਦੇ ਖਾਣੇ ਦਾ ਸੁਆਦ ਕਿਤੇ ਨਹੀਂ ਮਿਲਦਾ : ਗੁੱਲੂ

ਪ੍ਰ. ਤੁਹਾਡੇ ਲਈ ਮਾਂ ਦਾ ਰਿਸ਼ਤਾ ਕੀ ਮਾਅਨੇ ਰੱਖਦਾ ਹੈ?

ਮੇਰੇ ਲਈ ਮਾਂ ਦਾ ਰਿਸ਼ਤਾ ਪਹਿਲਾਂ ਵੀ ਬਹੁਤ ਖ਼ਾਸ ਸੀ ਪਰ ਹੁਣ ਹੋਰ ਜ਼ਿਆਦਾ ਹੋ ਗਿਆ ਹੈ। ਇਕ ਗੱਲ ਹਰ ਘਰ ’ਚ ਇਕੋ ਜਿਹੀ ਹੁੰਦੀ ਹੈ। ਪਾਪਾ ਪੁੱਛ ਸਕਦੇ ਹਨ ਕਿ ਕਿੰਨਾ ਕਮਾ ਰਹੇ ਹੋ, ਕੀ ਕਰ ਰਹੇ ਹੋ, ਭਵਿੱਖ ਦੀਆਂ ਕੀ ਯੋਜਨਾਵਾਂ ਹਨ ਪਰ ਮੰਮੀ ਸਿਰਫ਼ ਇਹੀ ਪੁੱਛੇਗੀ ਕਿ ਮੈਂ ਕਿਵੇਂ ਹਾਂ, ਰੋਟੀ ਖਾਧੀ ਹੈ ਜਾਂ ਨਹੀਂ? ਮਾਂ ਲਈ ਦੁਨੀਆ ਦੀ ਸਭ ਤੋਂ ਵੱਡੀ ਚਿੰਤਾ ਇਹੋ ਹੁੰਦੀ ਹੈ ਕਿ ਕੀ ਉਸ ਦਾ ਬੱਚਾ ਠੀਕ ਹੈ ਜਾਂ ਨਹੀਂ। ਪਹਿਲੀ ਵਾਰ ਉਨ੍ਹਾਂ ਨੇ ਜਹਾਜ਼ ’ਚ ਸਫ਼ਰ ਕੀਤਾ ਅਤੇ ਸਿੱਧੇ ਸ਼ੋਅ ’ਚ ਆਈ। ਉਨ੍ਹਾਂ ਲਈ ਇਹ ਕਿਸੇ ਸੁਪਨੇ ਦੇ ਸੱਚ ਹੋਣ ਵਰਗਾ ਸੀ। ਅਸੀਂ ਜ਼ਿੰਦਗੀ ’ਚ ਆਪਣੇ ਲਈ ਬਹੁਤ ਕੁਝ ਕਰ ਲੈਂਦੇ ਹਾਂ ਪਰ ਜਦੋਂ ਮਾਤਾ-ਪਿਤਾ ਨੂੰ ਮਾਣ ਮਹਿਸੂਸ ਹੁੰਦਾ ਹੈ ਤਾਂ ਉਹ ਅਹਿਸਾਸ ਵੱਖਰਾ ਹੀ ਹੁੰਦਾ ਹੈ।

ਪ੍ਰ. ਕੀ ਮਾਂ ਨੂੰ ਲੈ ਕੇ ਤੁਹਾਡਾ ਨਜ਼ਰੀਆ ਬਦਲਿਆ ਹੈ?

-ਹਾਂ, ਬਿਲਕੁਲ ਬਦਲਿਆ ਹੈ। ਮੈਂ ਕਿਤੇ ਵੀ ਖਾਣਾ ਖਾ ਲਵਾਂ ਪਰ ਮਾਂ ਦੇ ਹੱਥ ਦੇ ਖਾਣੇ ਦਾ ਸੁਆਦ ਕਿਤੇ ਨਹੀਂ ਮਿਲਦਾ। ਜਦੋਂ ਅਸੀਂ ਘਰ ਤੋਂ ਦੂਰ ਰਹਿੰਦੇ ਹਾਂ, ਉਦੋਂ ਸਮਝ ਆਉਂਦਾ ਹੈ ਕਿ ਮਾਂ ਦਾ ਪਿਆਰ ਕੀ ਹੁੰਦਾ ਹੈ। ਉਨ੍ਹਾਂ ਲਈ ਪਿਆਰ ਦਾ ਸਭ ਤੋਂ ਵੱਡਾ ਤਰੀਕਾ ਇਹੋ ਹੁੰਦਾ ਹੈ ਕਿ ਬੱਚਾ ਢਿੱਡ ਭਰ ਕੇ ਖਾਣਾ ਖਾਵੇ।

ਪ੍ਰ. ਸ਼ਿਲਪਾ ਸ਼ੈੱਟੀ ਬਤੌਰ ਹੋਸਟ ਕਿਹੋ ਜਿਹੇ ਸਨ?

ਉਹ ਬਹੁਤ ਸਵੀਟ ਅਤੇ ਫਨ ਲਵਿੰਗ ਹਨ। ਉਨ੍ਹਾਂ ਦੇ ਵਨ-ਲਾਈਨਰਜ਼ ਬਹੁਤ ਵਧੀਆ ਸਨ। ਉਹ ਬਹੁਤ ਵਧੀਆ ਕਾਮੇਡੀ ਟਾਈਮਿੰਗ ਰੱਖਦੇ ਹਨ।