'ਬਿੱਗ ਬੌਸ' ਦੀ ਐਕਸ ਮੁਕਾਬਲੇਬਾਜ਼, ਫਿਲਮਾਂ ਨਾਲ ਜੁੜੀਆਂ 6 ਲੜਕੀਆਂ ਸਣੇ 22 ਗ੍ਰਿਫ਼ਤਾਰ
Sunday, Jun 27, 2021 - 05:22 PM (IST)
ਨਾਸਿਕ : ਮਹਾਰਾਸ਼ਟਰ ਨੇ ਨਾਸਿਕ 'ਚ ਇਕ ਡਰੱਗ ਪਾਰਟੀ ਦਾ ਪਰਦਾਫਾਸ਼ ਕੀਤਾ ਹੈ। ਛਾਪੇਮਾਰੀ ਦੌਰਾਨ ਪੁਲਸ ਨੂੰ ਪਾਰਟੀ 'ਚ 12 ਲੜਕੀਆਂ ਸਣੇ 22 ਲੋਕਾਂ ਮਿਲੇ। ਪੁਲਸ ਨੇ ਦੱਸਿਆ ਕਿ ਇਨ੍ਹਾਂ 'ਚ ਕੁਝ ਲੋਕ ਫ਼ਿਲਮਾਂ ਨਾਲ ਜੁੜੇ ਹੋਏ ਹਨ। ਨਾਸਿਕ ਪੇਂਡੂ ਪੁਲਸ ਨੇ ਡਰੱਗਜ਼ ਪਾਰਟੀ ਦਾ ਪਰਦਾਫਾਸ਼ ਕਰ ਕੇ ਇਨ੍ਹਾਂ 22 ਲੋਕਾਂ ਨੂੰ ਹਿਰਾਸਤ 'ਚ ਲਿਆ ਹੈ। ਇਗਤ ਪੁਰੀ 'ਚ ਇਕ ਨਿੱਜੀ ਬੰਗਲੇ 'ਚ ਇਹ ਡਰੱਗਜ਼ ਪਾਰਟੀ ਚੱਲ ਰਹੀ ਸੀ। ਪਾਰਟੀ 'ਚ ਹੁੱਕਾ ਤੇ ਡਰੱਗਜ਼ ਦਾ ਇਸਤੇਮਾਲ ਹੋ ਰਿਹਾ ਸੀ।
ਪੁਲਸ ਦੇ ਐੱਸ.ਪੀ ਸਚਿਨ ਪਾਟਿਲ ਨੇ ਦੱਸਿਆ ਕਿ ਸੂਚਨਾ ਮਿਲਣ 'ਤੇ ਜਦੋਂ ਉਥੇ ਛਾਪਾ ਮਾਰਿਆ ਗਿਆ ਤਾਂ 10 ਲੜਕੇ ਤੇ 12 ਲੜਕੀਆਂ ਮਿਲੀਆਂ। ਉਨ੍ਹਾਂ 'ਚੋਂ 6 ਲੜਕੀਆਂ ਫ਼ਿਲਮਾਂ ਨਾਲ ਜੁੜੀਆਂ ਹੋਈਆਂ ਹਨ। ਇਕ 'ਬਿੱਗ ਬੌਸ' ਦੀ ਮੁਕਾਬਲੇਬਾਜ਼ ਰਹਿ ਚੁੱਕੀ ਹੈ। ਉਨ੍ਹਾਂ ਨੇ ਕਿਹਾ ਕਿ ਹਾਲੇ ਸਾਰਿਆਂ ਦਾ ਮੈਡੀਕਲ ਕੀਤਾ ਜਾ ਰਿਹਾ ਹੈ ਅਤੇ ਉਸ ਤੋਂ ਬਾਅਦ ਜ਼ਰੂਰੀ ਕਾਨੂੰਨੀ ਕਾਰਵਾਈ ਕੀਤੀ ਜਾਵੇਗੀ।
ਸੂਤਰਾਂ ਮੁਤਾਬਕ ਫੜ੍ਹੇ ਗਏ ਲੋਕਾਂ 'ਚ ਜ਼ਿਆਦਾਤਰ ਲੋਕ ਮੁੰਬਈ ਦੇ ਰਹਿਣ ਵਾਲੇ ਹਨ। ਜਿਸ ਦੇ ਜਨਮਦਿਨ 'ਤੇ ਇਹ ਪਾਰਟੀ ਰੱਖੀ ਗਈ ਸੀ ਉਹ ਮੁੰਬਈ ਦਾ ਕਾਰੋਬਾਰੀ ਅਤੇ ਬੁਕੀ ਦੱਸਿਆ ਜਾ ਰਿਹਾ ਹੈ। ਮੌਕੇ 'ਤੇ ਇਕ ਵਿਦੇਸ਼ੀ ਮਹਿਲਾ ਨੂੰ ਵੀ ਹਿਰਾਸਤ 'ਚ ਲਿਆ ਗਿਆ ਹੈ।
