ਐਨੀਮੇਟਡ ਫਿਲਮ ''ਮਹਾਪ੍ਰਭੂ ਜਗਨਨਾਥ'' 10 ਜੁਲਾਈ ਨੂੰ ਹੋਵੇਗੀ ਰਿਲੀਜ਼

ਮੁੰਬਈ (ਏਜੰਸੀ) : ਭਗਵਾਨ ਜਗਨਨਾਥ ਦੀ ਅਧਿਆਤਮਿਕ ਦੁਨੀਆ ਹੁਣ ਵੱਡੇ ਪਰਦੇ 'ਤੇ ਨਜ਼ਰ ਆਉਣ ਵਾਲੀ ਹੈ। ਐਨੀਮੇਟਡ ਫੀਚਰ ਫਿਲਮ 'ਮਹਾਪ੍ਰਭੂ ਜਗਨਨਾਥ' 10 ਜੁਲਾਈ ਨੂੰ ਪੂਰੇ ਭਾਰਤ ਵਿੱਚ ਰਿਲੀਜ਼ ਹੋਣ ਜਾ ਰਹੀ ਹੈ। ਫਿਲਮ ਦੀ ਰਿਲੀਜ਼ ਤੋਂ ਪਹਿਲਾਂ ਇਸ ਦੀ ਟੀਮ ਨੇ ਇੱਕ ਮਹੱਤਵਪੂਰਨ ਅਧਿਆਤਮਿਕ ਪੜਾਅ ਹਾਸਲ ਕੀਤਾ ਹੈ।

ਫਿਲਮ ਦੀ ਟੀਮ ਨੇ ਬੈਂਗਲੁਰੂ ਸਥਿਤ 'ਦਿ ਆਰਟ ਆਫ਼ ਲਿਵਿੰਗ ਇੰਟਰਨੈਸ਼ਨਲ ਸੈਂਟਰ' ਵਿੱਚ ਵਿਸ਼ਵ ਪ੍ਰਸਿੱਧ ਅਧਿਆਤਮਿਕ ਗੁਰੂ ਗੁਰੂਦੇਵ ਸ਼੍ਰੀ ਸ਼੍ਰੀ ਰਵੀਸ਼ੰਕਰ ਨਾਲ ਮੁਲਾਕਾਤ ਕੀਤੀ। ਨਿਰਮਾਤਾਵਾਂ ਨੇ ਫਿਲਮ ਦਾ ਅਧਿਕਾਰਤ ਪੋਸਟਰ ਗੁਰੂਦੇਵ ਨੂੰ ਭੇਂਟ ਕੀਤਾ ਅਤੇ ਫਿਲਮ ਦੀ ਸਫਲਤਾ ਲਈ ਉਨ੍ਹਾਂ ਦਾ ਆਸ਼ੀਰਵਾਦ ਲਿਆ। ਇਸ ਅਧਿਆਤਮਿਕ ਅਤੇ ਯਾਦਗਾਰੀ ਮੁਲਾਕਾਤ ਤੋਂ ਬਾਅਦ, ਨਿਰਮਾਤਾਵਾਂ ਨੇ ਅਧਿਕਾਰਤ ਤੌਰ 'ਤੇ ਫਿਲਮ ਦੀ ਪੈਨ-ਇੰਡੀਆ ਥੀਏਟਰ ਰਿਲੀਜ਼ ਮਿਤੀ 10 ਜੁਲਾਈ ਦਾ ਐਲਾਨ ਕੀਤਾ ਅਤੇ ਫਿਲਮ ਦਾ ਦੂਜਾ ਪੋਸਟਰ ਵੀ ਜਾਰੀ ਕੀਤਾ।

ਇਹ ਫਿਲਮ ਪ੍ਰਸਿੱਧ ਐਨੀਮੇਟਡ ਸੀਰੀਜ਼ 'ਜੈ ਜਗਨਨਾਥ' ਦੀ ਵੱਡੀ ਸਫਲਤਾ ਤੋਂ ਬਾਅਦ ਬਣਾਈ ਗਈ ਹੈ, ਜੋ 'ਪੋਗੋ' (Pogo) ਚੈਨਲ 'ਤੇ ਪ੍ਰਸਾਰਿਤ ਹੋਣ ਤੋਂ ਬਾਅਦ ਘਰ-ਘਰ ਵਿੱਚ ਮਸ਼ਹੂਰ ਹੋਈ। ਹੁਣ ਇਹ ਕਹਾਣੀ ਉੱਚ ਪੱਧਰੀ ਐਨੀਮੇਸ਼ਨ ਰਾਹੀਂ ਭਾਰਤੀ ਸੰਸਕ੍ਰਿਤੀ ਅਤੇ ਕਦਰਾਂ-ਕੀਮਤਾਂ ਨੂੰ ਪੇਸ਼ ਕਰੇਗੀ। ਫਿਲਮ ਦੇਸ਼ ਭਰ ਵਿੱਚ ਹਿੰਦੀ, ਉੜੀਆ ਅਤੇ ਤੇਲਗੂ ਭਾਸ਼ਾਵਾਂ ਵਿੱਚ ਰਿਲੀਜ਼ ਹੋਵੇਗੀ। 'ਸਿਨੇਪੋਲਿਸ'ਨਾਲ ਸਾਂਝੇਦਾਰੀ ਦੇ ਤਹਿਤ ਇਸ ਨੂੰ 300 ਤੋਂ ਵੱਧ ਸਕ੍ਰੀਨਾਂ 'ਤੇ ਦਿਖਾਇਆ ਜਾਵੇਗਾ। ਫਿਲਮ ਦਾ ਨਿਰਮਾਣ ਦੁਰਗਾ ਪ੍ਰਸਾਦ ਦਲਈ ਵੱਲੋਂ 'ਏਲੇ ਐਨੀਮੇਸ਼ਨਜ਼' ਦੇ ਬੈਨਰ ਹੇਠ ਕੀਤਾ ਗਿਆ ਹੈ, ਜਦਕਿ ਨਿਰਦੇਸ਼ਨ ਸ਼੍ਰੀਪਾਦ ਵਾਰਖੇੜਕਰ ਨੇ ਕੀਤਾ ਹੈ। ਫਿਲਮ ਦੀ ਪਟਕਥਾ ਪੱਲਵੀ ਸ਼ਰਮਾ ਨੇ ਲਿਖੀ ਹੈ ਅਤੇ ਸੰਗੀਤ ਅਵਿਰਲ ਕੁਮਾਰ ਦਾ ਹੈ।