ਮੁੰਡੇ ਤੋਂ ਕੁੜੀ ਬਣੇਗਾ ਅਦਾਕਾਰ, ਸ਼ੁਰੂ ਕੀਤਾ ਮੈਡੀਕਲ ਟ੍ਰਾਂਜਿਸ਼ਨ

ਮੁੰਬਈ : LGBTQIA+ ਭਾਈਚਾਰੇ ਦੀ ਪ੍ਰਮੁੱਖ ਆਵਾਜ਼, ਮਸ਼ਹੂਰ ਸਿੰਗਰ ਅਤੇ ਪਰਫਾਰਮਰ ਸੁਸ਼ਾਂਤ ਦਿਵਗੀਕਰ ਨੇ ਆਪਣੀ ਜ਼ਿੰਦਗੀ ਦੇ ਇੱਕ ਬਹੁਤ ਹੀ ਅਹਿਮ ਫੈਸਲੇ ਦਾ ਖੁਲਾਸਾ ਕੀਤਾ ਹੈ। 'ਬਿੱਗ ਬੌਸ' ਦਾ ਹਿੱਸਾ ਰਹਿ ਚੁੱਕੇ ਸੁਸ਼ਾਂਤ ਨੇ ਦੱਸਿਆ ਕਿ ਉਨ੍ਹਾਂ ਨੇ ਆਪਣਾ ਮੈਡੀਕਲ ਟ੍ਰਾਂਜਿਸ਼ਨ (ਲਿੰਗ ਬਦਲਣ ਦੀ ਪ੍ਰਕਿਰਿਆ) ਸ਼ੁਰੂ ਕਰ ਦਿੱਤਾ ਹੈ ਅਤੇ ਉਹ ਪਿਛਲੇ ਪੰਜ ਮਹੀਨਿਆਂ ਤੋਂ ਹਾਰਮੋਨ ਰਿਪਲੇਸਮੈਂਟ ਥੈਰੇਪੀ (HRT) ਲੈ ਰਹੇ ਹਨ। ਇਸ ਦੇ ਨਾਲ ਹੀ ਉਨ੍ਹਾਂ ਨੇ ਆਪਣਾ ਨਵਾਂ ਨਾਮ 'ਰਾਣੀ ਸੁਸ਼ਾਂਤ ਦਿਵਗੀਕਰ' ਰੱਖਣ ਦਾ ਐਲਾਨ ਵੀ ਕੀਤਾ ਹੈ।

ਨਾਮ ਬਦਲਣ ਬਾਰੇ ਜਾਣਕਾਰੀ ਦਿੰਦਿਆਂ ਸੁਸ਼ਾਂਤ ਨੇ ਕਿਹਾ ਕਿ 'ਸੁਸ਼ਾਂਤ' ਨਾਮ ਉਨ੍ਹਾਂ ਦੇ ਮਾਤਾ-ਪਿਤਾ ਨੇ ਦਿੱਤਾ ਸੀ, ਇਸ ਲਈ ਇਹ ਹਮੇਸ਼ਾ ਉਨ੍ਹਾਂ ਦੀ ਪਛਾਣ ਦਾ ਹਿੱਸਾ ਰਹੇਗਾ। ਜਦੋਂ ਕਿ 'ਰਾਣੀ' ਨਾਮ ਉਨ੍ਹਾਂ ਨੂੰ ਲੋਕਾਂ ਨੇ ਬਹੁਤ ਪਿਆਰ ਨਾਲ ਦਿੱਤਾ ਹੈ, ਇਸ ਲਈ ਉਹ ਇਨ੍ਹਾਂ ਦੋਵਾਂ ਨਾਮਾਂ ਨੂੰ ਆਪਣੇ ਨਾਲ ਰੱਖਣਾ ਚਾਹੁੰਦੇ ਹਨ। ਉਨ੍ਹਾਂ ਅਨੁਸਾਰ, ਇਹ ਟ੍ਰਾਂਜਿਸ਼ਨ ਉਨ੍ਹਾਂ ਲਈ ਆਪਣੇ ਜਨਮਦਿਨ ਦਾ ਸਭ ਤੋਂ ਵੱਡਾ ਤੋਹਫ਼ਾ ਹੈ ਅਤੇ ਉਨ੍ਹਾਂ ਨੂੰ ਉਮੀਦ ਹੈ ਕਿ 2027 ਤੱਕ ਇਹ ਪ੍ਰਕਿਰਿਆ ਪੂਰੀ ਤਰ੍ਹਾਂ ਮੁਕੰਮਲ ਹੋ ਜਾਵੇਗੀ।

ਸੁਸ਼ਾਂਤ ਨੇ ਦੱਸਿਆ ਕਿ ਇਹ ਫੈਸਲਾ ਉਨ੍ਹਾਂ ਨੇ ਜਲਦਬਾਜ਼ੀ ਵਿੱਚ ਨਹੀਂ ਲਿਆ। ਉਨ੍ਹਾਂ ਨੇ ਸਭ ਤੋਂ ਪਹਿਲਾਂ ਮਾਨਸਿਕ ਸਿਹਤ ਮਾਹਿਰਾਂ ਅਤੇ ਡਾਕਟਰਾਂ ਨਾਲ ਸਲਾਹ ਕੀਤੀ ਅਤੇ ਜਦੋਂ ਸਾਰੇ ਮਾਹਿਰਾਂ ਨੇ ਸਹਿਮਤੀ ਦਿੱਤੀ, ਉਸ ਤੋਂ ਬਾਅਦ ਹੀ HRT ਸ਼ੁਰੂ ਕੀਤੀ ਗਈ। ਉਨ੍ਹਾਂ ਅਨੁਸਾਰ, ਇੱਕ ਹੀ ਜੀਵਨ ਵਿੱਚ ਦੋਵੇਂ ਜੈਂਡਰਾਂ ਦਾ ਅਨੁਭਵ ਕਰਨਾ ਇੱਕ ਖਾਸ ਅਹਿਸਾਸ ਹੈ।

ਸੁਸ਼ਾਂਤ ਨੇ ਖੁਲਾਸਾ ਕੀਤਾ ਕਿ ਉਹ ਇਹ ਸਫ਼ਰ 2023 ਵਿੱਚ ਹੀ ਸ਼ੁਰੂ ਕਰਨਾ ਚਾਹੁੰਦੇ ਸਨ, ਪਰ ਫਿਲਮ 'ਥੈਂਕ ਯੂ ਫਾਰ ਕਮਿੰਗ' ਲਈ ਉਨ੍ਹਾਂ ਨੂੰ ਪੁਰਸ਼ ਵਰਗਾ ਦਿਖਣਾ ਜ਼ਰੂਰੀ ਸੀ, ਜਿਸ ਕਾਰਨ ਉਨ੍ਹਾਂ ਨੂੰ ਆਪਣਾ ਫੈਸਲਾ ਟਾਲਣਾ ਪਿਆ। ਇਸ ਤੋਂ ਇਲਾਵਾ, ਲਿਵਰ ਦੀ ਸਮੱਸਿਆ ਅਤੇ ਐਨੀਮੀਆ (ਖੂਨ ਦੀ ਕਮੀ) ਵਰਗੀਆਂ ਸਿਹਤ ਸਮੱਸਿਆਵਾਂ ਕਾਰਨ ਵੀ ਇਸ ਵਿੱਚ ਦੇਰੀ ਹੋਈ। 

ਇੱਕ ਗਾਇਕ ਹੋਣ ਦੇ ਨਾਤੇ ਸੁਸ਼ਾਂਤ ਨੇ ਇਹ ਵੀ ਸਪੱਸ਼ਟ ਕੀਤਾ ਕਿ ਇਸ ਥੈਰੇਪੀ ਨਾਲ ਉਨ੍ਹਾਂ ਦੀ ਆਵਾਜ਼ ਵਿੱਚ ਕੋਈ ਬਦਲਾਅ ਨਹੀਂ ਆਵੇਗਾ। ਉਨ੍ਹਾਂ ਦੱਸਿਆ ਕਿ ਪੁਰਸ਼ ਤੋਂ ਮਹਿਲਾ ਬਣਨ ਦੌਰਾਨ ਲਈ ਜਾਣ ਵਾਲੀ ਐਸਟ੍ਰੋਜਨ ਦਵਾਈ ਨਾਲ ਆਵਾਜ਼ ਨਹੀਂ ਬਦਲਦੀ, ਇਸ ਲਈ ਉਹ ਖੁਸ਼ ਹਨ ਕਿ ਉਨ੍ਹਾਂ ਦੀ ਗਾਇਕੀ 'ਤੇ ਕੋਈ ਮਾੜਾ ਅਸਰ ਨਹੀਂ ਪਵੇਗਾ। ਉਨ੍ਹਾਂ ਨੇ ਟ੍ਰਾਂਜਿਸ਼ਨ ਬਾਰੇ ਸੋਚ ਰਹੇ ਹੋਰ ਲੋਕਾਂ ਨੂੰ ਸੰਦੇਸ਼ ਦਿੱਤਾ ਕਿ ਇਹ ਫੈਸਲਾ ਸਿਰਫ਼ ਆਪਣੀ ਖੁਸ਼ੀ ਲਈ ਲੈਣਾ ਚਾਹੀਦਾ ਹੈ, ਕਿਉਂਕਿ ਆਪਣੀ ਜ਼ਿੰਦਗੀ ਜਿਉਣ ਲਈ ਕਦੇ ਵੀ ਦੇਰ ਨਹੀਂ ਹੁੰਦੀ।