ਕੰਧ ਟੱਪ ਕੇ ਘਰ ’ਚ ਵੜੇ ਚੋਰ ਨੂੰ ਲੋਕਾਂ ਨੇ ਕੀਤਾ ਕਾਬੂ, ਸਾਥੀ ਹੋਇਆ ਫਰਾਰ

ਜਲੰਧਰ (ਸੁਨੀਲ ਮਹਾਜਨ)-ਸਥਾਨਕ ਨਿਊ ਦਿਓਲ ਨਗਰ ’ਚ ਸੋਮਵਾਰ ਸਵੇਰੇ ਤਕਰੀਬਨ 8.30 ਇਕ ਘਰ ’ਚ ਵੜੇ ਚੋਰ ਨੂੰ ਲੋਕਾਂ ਨੇ ਕਾਬੂ ਕਰ ਲਿਆ, ਜਦਕਿ ਉਸ ਦਾ ਇਕ ਸਾਥੀ ਭੱਜਣ ’ਚ ਕਾਮਯਾਬ ਹੋ ਗਿਆ। ਜਿਹੜੇ ਚੋਰ ਨੂੰ ਲੋਕਾਂ ਨੇ ਫੜਿਆ, ਉਸ ਕੋਲ ਨਾਲ ਦੇ ਘਰ ’ਚੋਂ ਚੋਰੀ ਕੀਤੀਆਂ ਟੂਟੀਆਂ, ਪਾਈਪ ਤੇ ਹੋਰ ਸਾਮਾਨ ਸੀ। ਨਿਊ ਦਿਓਲ ਨਗਰ ’ਚ ਰਹਿਣ ਵਾਲੇ ਅਵਤਾਰ ਸਿੰਘ ਮਿਨਹਾਸ ਨੇ ਦੱਸਿਆ ਕਿ ਉਹ ਕੋਈ ਕੰਮ ਕਰ ਰਿਹਾ ਸੀ ਕਿ ਇਸੇ ਦੌਰਾਨ ਘਰ ਦੇ ਬਾਹਰ ਕੰਧ ਤੋਂ ਇਕ ਨੌਜਵਾਨ ਨੇ ਛਾਲ ਮਾਰੀ, ਜਿਸ ਦੇ ਹੱਥਾਂ ’ਚ ਏ. ਸੀ. ਦੀ ਪਾਈਪ ਫੜੀ ਹੋਈ ਸੀ।

ਉਸ ਨੇ ਭੱਜ ਕੇ ਉਸ ਨੂੰ ਫੜ ਲਿਆ ਤਾਂ ਪਤਾ ਲੱਗਾ ਕਿ ਉਹ ਅੰਦਰੋਂ ਟੂਟੀਆਂ, ਪਾਈਪ ਤੇ ਹੋਰ ਸਾਮਾਨ ਲਾਹ ਕੇ ਲਿਆਇਆ ਹੈ। ਉਸ ਦਾ ਸਾਥੀ ਥੋੜ੍ਹਾ ਸਾਮਾਨ ਲੈ ਕੇ ਭੱਜ ਗਿਆ ਤੇ ਉਹ ਇਹ ਸਾਮਾਨ ਲੈ ਕੇ ਭੱਜਣ ਹੀ ਵਾਲਾ ਸੀ। ਅਵਤਾਰ ਸਿੰਘ ਨੇ ਦੱਸਿਆ ਕਿ ਚੋਰ ਨੂੰ 8.30 ਵਜੇ ਫੜਿਆ ਤੇ ਪੁਲਸ ਨੂੰ ਸੂਚਿਤ ਕਰ ਦਿੱਤਾ ਪਰ ਬਹੁਤ ਦੇਰ ਤਕ ਪੁਲਸ ਨਹੀਂ ਆਈ, ਇਸ ਲਈ ਲੋਕ ਖੁਦ ਹੀ ਚੋਰ ਨੂੰ ਗੱਡੀ ’ਚ ਬਿਠਾ ਕੇ ਪੁਲਸ ਕੋਲ ਲੈ ਗਏ।

ਉਥੇ ਹੀ ਦੂਜੇ ਪਾਸੇ ਏ. ਐੱਸ. ਆਈ. ਸੁਰੇਸ਼ ਕੁਮਾਰ ਥਾਣਾ ਭਾਰਗਵ ਕੈਂਪ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਸੂਚਨਾ ਮਿਲੀ ਸੀ ਕਿ ਦਿਓਲ ਨਗਰ ’ਚ ਇਕ ਘਰ ’ਚ ਦੋ ਚੋਰ ਵੜ ਗਏ ਸਨ, ਜਿਨ੍ਹਾਂ ’ਚੋਂ ਇਕ ਚੋਰ ਭੱਜ ਗਿਆ ਹੈ ਤੇ ਦੂਸਰਾ ਉਨ੍ਹਾਂ ਕਾਬੂ ਕਰ ਲਿਆ ਹੈ, ਜੋ ਦਿਵਿਆਂਗ ਹੈ, ਬੋਲ ਨਹੀਂ ਸਕਦਾ। ਫਿਲਹਾਲ ਇਸ ਨੂੰ ਪੁਲਸ ਸਟੇਸ਼ਨ ਲਿਜਾਇਆ ਜਾ ਰਿਹਾ ਹੈ ਤੇ ਚੋਰੀ ਦੀਆਂ ਹੋਰ ਵਾਰਦਾਤਾਂ ਬਾਰੇ ਪਤਾ ਲਗਾਇਆ ਜਾਵੇਗਾ ਕਿ ਉਸ ਨੇ ਕਿਹੜੀਆਂ ਹੋਰ ਵਾਰਦਾਤਾਂ ਨੂੰ ਅੰਜਾਮ ਦਿੱਤਾ ਹੈ।