ਕੋਵਿਡ-19 ਮਾਮਲਿਆਂ ਦੇ ਹੋਮ ਆਈਸੋਲੇਸ਼ਨ ਸਬੰਧੀ ਜਾਰੀ ਹੋਏ ਨਵੇਂ ਦਿਸ਼ਾ-ਨਿਰਦੇਸ਼

ਹੁਸ਼ਿਆਰਪੁਰ (ਘੁੰਮਣ)- ਸਿਹਤ ਅਤੇ ਪਰਿਵਾਰ ਭਲਾਈ ਵਿਭਾਗ ਪੰਜਾਬ ਵੱਲੋਂ ਕੋਵਿਡ-19 ਕੇਸਾਂ ਦੇ ਹੋਮ ਆਈਸੋਲੇਸ਼ਨ ਲਈ ਨਵੇਂ ਦਿਸ਼ਾ-ਨਿਰਦੇਸ਼ ਜਾਰੀ ਕੀਤੇ ਗਏ ਹਨ। ਇਸ ਸਬੰਧੀ ਜਾਣਕਾਰੀ ਸਾਂਝੀ ਕਰਦੇ ਕਾਰਜਕਾਰੀ ਸਿਵਲ ਸਰਜਨ ਡਾ. ਪਵਨ ਕੁਮਾਰ ਨੇ ਦੱਸਿਆ ਕਿ ਕੋਵਿਡ-19 ਦੇ ਵੱਧਦੇ ਕੇਸਾਂ ਨੂੰ ਧਿਆਨ ਵਿਚ ਰੱਖਦਿਆਂ ਸਿਹਤ ਵਿਭਾਗ ਵੱਲੋਂ ਨਵੀਆਂ ਗਾਈਡਲਾਈਨਾਂ ਭੇਜੀਆਂ ਗਈਆਂ ਹਨ। ਜਿਨ੍ਹਾਂ ਵਿਚ ਮਰੀਜ਼ਾਂ ਲਈ, ਉਨ੍ਹਾਂ ਦੀ ਦੇਖ-ਭਾਲ ਕਰਨ ਵਾਲਿਆ ਲਈ, ਘਰੇਲੂ ਦੇਖ-ਭਾਲ ਸਬੰਧੀ ਕੀ ਕਰੋ, ਕੀ ਨਾ ਕਰੋ ਬਾਰੇ ਨਿਰਦੇਸ਼ ਸ਼ਾਮਲ ਹਨ। ਇਨ੍ਹਾਂ ਦਾ ਪਾਲਣ ਕਰ ਕੇ ਕੋਰੋਨਾ ਨੂੰ ਫ਼ੈਲਣ ਤੋਂ ਰੋਕਿਆ ਜਾ ਸਕਦਾ ਹੈ।

ਧੀ ਦੇ ਪ੍ਰੇਮ ਵਿਆਹ ਤੋਂ ਖ਼ਫ਼ਾ ਪਿਓ ਨੇ ਕੀਤਾ ਵੱਡਾ ਕਾਂਡ, ਹੁਣ ਖ਼ੁਦ ਹੋਇਆ ਫ਼ਰਾਰ

ਕੋਵਿਡ ਮਰੀਜ਼ਾਂ ਲਈ ਨਿਰਦੇਸ਼ ਸਾਂਝੇ ਕਰਦਿਆਂ ਉਨ੍ਹਾਂ ਕਿਹਾ ਕਿ ਪਰਿਵਾਰ ਦੇ ਹੋਰ ਮੈਂਬਰਾਂ ਤੋਂ ਅਲੱਗ ਰਹਿਣਾ ਚਾਹੀਦਾ ਹੈ। ਮਰੀਜ਼ ਚੰਗੇ-ਹਵਾਦਾਰ ਕਮਰੇ ਵਿਚ ਰਹਿਣ ਅਤੇ ਹਰ ਸਮੇਂ ਮਾਸਕ ਦੀ ਵਰਤੋਂ ਕਰਨ। ਮਰੀਜ਼ ਵੱਧ ਤੋਂ ਵੱਧ ਆਰਾਮ ਕਰਨ ਅਤੇ ਬਹੁਤ ਸਾਰਾ ਤਰਲ ਪਦਾਰਥ ਪੀਣ। ਬਰਤਨਾਂ ਸਮੇਤ ਨਿੱਜੀ ਚੀਜ਼ਾਂ ਸਾਂਝੀਆਂ ਨਾ ਕਰਨ ਅਤੇ ਵਾਰ-ਵਾਰ ਹੱਥ ਧੋਣ। ਪਲਸ ਆਕਸੀਮੀਟਰ ਨਾਲ ਖੂਨ ਦੀ ਆਕਸੀਜਨ ਦੇ ਪੱਧਰ ਦੀ ਅਤੇ ਰੋਜ਼ਾਨਾ ਤਾਪਮਾਨ ਦੀ ਸਵੈ-ਨਿਗਰਾਨੀ ਕਰਨ। ਡਾ. ਪਵਨ ਕੁਮਾਰ ਨੇ ਕਿਹਾ ਕਿ ਮਰੀਜ਼ਾਂ ਦੀ ਦੇਖ-ਭਾਲ ਕਰਨ ਵਾਲਿਆਂ ਲਈ ਜ਼ਰੂਰੀ ਹੈ ਕਿ ਉਹ ਟ੍ਰਿਪਲ ਲੇਅਰ ਮਾਸਕ ਪਹਿਨਣ, ਜਦੋਂ ਬੀਮਾਰ ਵਿਅਕਤੀ ਦੇ ਨਾਲ ਇਕੋ ਕਮਰੇ ਵਿਚ ਹੋਣ।

ਮਾਸਕ ਦੇ ਅਗਲੇ ਹਿੱਸੇ ਨੂੰ ਨਹੀਂ ਛੂਹਣਾ ਚਾਹੀਦਾ। ਜੇਕਰ ਮਾਸਕ ਗਿੱਲਾ ਜਾਂ ਗੰਦਾ ਹੋ ਜਾਵੇ ਤਾਂ ਇਸਨੂੰ ਤੁਰੰਤ ਬਦਲ ਦੇਣ। ਚਿਹਰੇ, ਨੱਕ ਜਾਂ ਮੂੰਹ ਨੂੰ ਛੂਹਣ ਤੋਂ ਬਚਣ। ਬੀਮਾਰ ਵਿਅਕਤੀ ਜਾਂ ਉਨ੍ਹਾਂ ਦੇ ਵਾਤਾਵਰਣ ਨਾਲ ਸੰਪਰਕ ਕਰਨ ਤੋਂ ਬਾਅਦ ਹੱਥਾਂ ਦੀ ਸਫ਼ਾਈ ਦਾ ਪਾਲਣ ਕਰਨ। ਘੱਟੋ-ਘੱਟ 40 ਸਕਿੰਟਾਂ ਲਈ ਸਾਬਣ ਅਤੇ ਪਾਣੀ ਨਾਲ ਹੱਥ ਧੋਣ। ਡਾ. ਪਵਨ ਕੁਮਾਰ ਨੇ ਇਹ ਵੀ ਦੱਸਿਆ ਕਿ ਮਰੀਜ਼ ਜਾਂ ਮਰੀਜ਼ ਦੇ ਵਾਤਾਵਰਣ ਨਾਲ ਸੰਪਰਕ ਹੋਣ ’ਤੇ ਮਰੀਜ਼ ਦੇ ਸਰੀਰ ਦੇ ਤਰਲ ਨਾਲ ਸਿੱਧੇ ਸੰਪਰਕ ਤੋਂ ਬਚੋ।

ਇਹ ਵੀ ਪੜ੍ਹੋ- ਗੁਰਦਾਸਪੁਰ 'ਚ ਵੱਡੀ ਵਾਰਦਾਤ, ASI ਨੇ ਪਤਨੀ ਤੇ ਪੁੱਤ ਨੂੰ ਗੋਲ਼ੀਆਂ ਨਾਲ ਭੁੰਨਿਆ

ਡਿਸਪੋਸੇਬਲ ਦਸਤਾਨੇ ਦੀ ਵਰਤੋਂ ਕਰੋ। ਸੰਭਾਵੀ ਤੌਰ ’ਤੇ ਦੂਸ਼ਿਤ ਚੀਜ਼ਾਂ ਜਿਵੇਂ ਕਿ ਪਕਵਾਨ, ਪੀਣ ਵਾਲੇ ਪਦਾਰਥ, ਵਰਤੇ ਗਏ ਤੌਲੀਏ ਜਾਂ ਬੈੱਡ ਲਿਨਨ ਦੇ ਸੰਪਰਕ ਤੋਂ ਬਚੋ। ਮਰੀਜ਼ ਦੇ ਕਮਰੇ ਵਿਚ ਭੋਜਨ ਪ੍ਰਦਾਨ ਕਰੋ। ਮਰੀਜ਼ ਦੇ ਵਰਤੇ ਗਏ ਭਾਂਡਿਆਂ ਨੂੰ ਦਸਤਾਨੇ ਪਹਿਨ ਕੇ ਹੀ ਸਾਬਣ ਅਤੇ ਪਾਣੀ ਨਾਲ ਸਾਫ਼ ਕਰਨਾ ਚਾਹੀਦਾ ਹੈ। ਹੋਮ ਆਈਸੋਲੇਸ਼ਨ ਸਮੇਂ ਹਲਕੇ ਜਾਂ ਅਸਿੰਪਟੋਮੈਟਿਕ ਬੀਮਾਰੀ ਵਾਲੇ ਮਰੀਜ਼ਾਂ ਦੇ ਇਲਾਜ ਬਾਰੇ ਡਾ. ਪਵਨ ਕੁਮਾਰ ਨੇ ਕਿਹਾ ਕਿ ਇਲਾਜ ਕਰ ਰਹੇ ਮੈਡੀਕਲ ਅਫ਼ਸਰ ਨਾਲ ਸੰਪਰਕ ਬਣਾਈ ਰੱਖੋ ਅਤੇ ਕਿਸੇ ਵੀ ਵਿਗੜਣ ਦੀ ਸਥਿਤੀ ਵਿਚ ਰਿਪੋਰਟ ਕਰੋ। ਸਲਾਹ-ਮਸ਼ਵਰੇ ਤੋਂ ਬਾਅਦ ਹੋਰ ਬੀਮਾਰੀਆਂ ਲਈ ਦਵਾਈਆਂ ਜਾਰੀ ਰੱਖੋ। ਬੁਖਾਰ, ਵਗਦਾ ਨੱਕ ਅਤੇ ਖੰਘ ਲਈ ਲੱਛਣ ਪ੍ਰਬੰਧਨ ਦੀ ਪਾਲਣਾ ਕਰੋ।

ਦਿਨ ਵਿਚ ਤਿੰਨ ਵਾਰ ਗਰਮ ਪਾਣੀ ਦੇ ਗਰਾਰੇ ਕਰੋ ਜਾਂ ਭਾਫ਼ ਨਾਲ ਸਾਹ ਲਓ। ਸੋਸ਼ਲ ਮੀਡੀਆ ਰਾਹੀਂ ਗਲਤ ਜਾਣਕਾਰੀ ਫ਼ੈਲਾਉਣ ਤੋਂ ਬਚੋ। ਸਵੈ-ਦਵਾਈ, ਖੂਨ ਦੀ ਜਾਂਚ ਜਾਂ ਛਾਤੀ ਦਾ ਐਕਸ-ਰੇ ਜਾਂ ਸੀਟੀ ਸਕੈਨ ਲਈ ਬਿਨਾਂ ਸਲਾਹ-ਮਸ਼ਵਰੇ ਲਈ ਜਲਦਬਾਜ਼ੀ ਨਾ ਕਰੋ। ਕਿਸੇ ਮਰੀਜ਼ ਨੂੰ ਡਾਕਟਰ ਵੱਲੋਂ ਸੁਝਾਏ ਇਲਾਜ ਦੀ ਆਮ ਸਾਂਝੀਦਾਰੀ ਨਹੀਂ ਕਰਨੀ ਚਾਹੀਦੀ। ਡਾ. ਪਵਨ ਕੁਮਾਰ ਨੇ ਕਿਹਾ ਕਿ ਆਪਣੀ ਸਿਹਤ ਦੀ ਸਵੈ-ਨਿਗਰਾਨੀ ਕਰੋ। ਸਕਾਰਾਤਮਿਕ ਟੈਸਟ ਤੋਂ ਬਾਅਦ ਘੱਟੋ-ਘੱਟ 7 ਦਿਨ ਬੀਤ ਜਾਣ ਅਤੇ ਲਗਾਤਾਰ 3 ਦਿਨਾਂ ਤੱਕ ਬੁਖਾਰ ਨਾ ਹੋਣ ਤੋਂ ਬਾਅਦ ਆਈਸੋਲੇਸ਼ਨ ਨੂੰ ਖ਼ਤਮ ਕੀਤਾ ਜਾ ਸਕਦਾ ਹੈ। ਆਈਸੋਲੇਸ਼ਨ ਤੋਂ ਬਾਅਦ ਵੀ ਮਾਸਕ ਪਹਿਨਣਾ ਜਾਰੀ ਰੱਖੋ। ਜ਼ਿਕਰਯੋਗ ਹੈ ਕਿ ਹੋਮ ਆਈਸੋਲੇਸ਼ਨ ਦੀ ਮਿਆਦ ਖ਼ਤਮ ਹੋਣ ਤੋਂ ਬਾਅਦ ਦੁਬਾਰਾ ਜਾਂਚ ਦੀ ਲੋੜ ਨਹੀਂ ਹੈ। ਇਸੇ ਤਰ੍ਹਾਂ ਮਰੀਜ਼ ਦੇ ਸੰਪਰਕ ਵਾਲੇ ਲੱਛਣਾਂ ਤੋਂ ਬਿਨ੍ਹਾਂ ਵਿਕਅਤੀਆਂ ਨੂੰ ਘਰੇਲੂ ਕੁਆਰੰਟੀਨ ਵਿਚ ਕੋਵਿਡ ਟੈਸਟ ਅਤੇ ਸਿਹਤ ਦੀ ਨਿਗਰਾਨੀ ਕਰਨ ਦੀ ਲੋੜ ਨਹੀਂ ਹੈ।

ਇਹ ਵੀ ਪੜ੍ਹੋ- ਔਰਤਾਂ ਨੂੰ ਮੁਫ਼ਤ 'ਚ ਦਿੱਤੀ ਜਾਵੇਗੀ ਵੱਖ-ਵੱਖ ਕੋਰਸਾਂ ਦੀ ਸਿਖਲਾਈ, ਜਾਣੋ ਕੀ ਹੈ ਪ੍ਰਸ਼ਾਸ਼ਨ ਦੀ ਯੋਜਨਾ

ਨੋਟ- ਇਸ ਖ਼ਬਰ ਸਬੰਧੀ ਤੁਹਾਡੀ ਕੀ ਹੈ ਰਾਏ, ਕੁਮੈਂਟ ਬਾਕਸ 'ਚ ਦੱਸੋ।