ਵਿਜੀਲੈਂਸ ਡੀ. ਜੀ. ਪੀ. ਦੇ ਰੀਡਰ ਓ. ਪੀ. ਰਾਣਾ ਨੇ ਅਦਾਲਤ ਅੱਗੇ ਕੀਤਾ ਆਤਮ-ਸਮਰਪਣ, ਪੜ੍ਹੋ ਪੂਰਾ ਮਾਮਲਾ

ਚੰਡੀਗੜ੍ਹ (ਸੁਸ਼ੀਲ) : ਪੰਜਾਬ ਵਿਜੀਲੈਂਸ ਵਿਭਾਗ ਦੇ ਡੀ. ਜੀ. ਪੀ. ਦੇ ਨਾਂ ’ਤੇ 13 ਲੱਖ ਰੁਪਏ ਅਤੇ ਮਹਿੰਗਾ ਮੋਬਾਇਲ ਫੋਨ ਮੰਗਣ ਵਾਲੇ ਭਗੌੜੇ ਇੰਸਪੈਕਟਰ ਓ. ਪੀ. ਰਾਣਾ ਨੇ ਸੋਮਵਾਰ ਨੂੰ ਸੀ. ਬੀ. ਆਈ. ਦੀ ਵਿਸ਼ੇਸ਼ ਅਦਾਲਤ 'ਚ ਸਰੰਡਰ ਕਰ ਦਿੱਤਾ। ਸੀ. ਬੀ. ਆਈ. ਨੇ ਮੁਲਜ਼ਮ ਨੂੰ ਵਿਸ਼ੇਸ਼ ਅਦਾਲਤ ’ਚ ਪੇਸ਼ ਕਰਕੇ 7 ਦਿਨਾਂ ਦਾ ਰਿਮਾਂਡ ਹਾਸਲ ਕੀਤਾ। ਰਾਣਾ ਡੀ. ਜੀ. ਪੀ. ਦਾ ਰੀਡਰ ਸੀ ਅਤੇ ਉਸਨੂੰ ਵਿਭਾਗ ਨੇ ਮੁਅੱਤਲ ਕਰ ਦਿੱਤਾ ਹੈ। ਉਸਦੇ ਖ਼ਿਲਾਫ਼ 11 ਮਈ ਨੂੰ ਸੀ. ਬੀ. ਆਈ. ਨੇ ਭ੍ਰਿਸ਼ਟਾਚਾਰ ਦਾ ਮਾਮਲਾ ਦਰਜ ਕੀਤਾ ਸੀ। ਇਸ ਮਾਮਲੇ ’ਚ ਸੀ. ਬੀ. ਆਈ. ਨੇ ਤਿੰਨ ਵਿਚੋਲਿਆਂ ਮਲੋਟ ਵਾਸੀ ਵਿਕਾਸ ਗੋਇਲ, ਰਾਘਵ ਗੋਇਲ ਅਤੇ ਡਰਾਈਵਰ ਅੰਕਿਤ ਵਾਧਵਾ ਨੂੰ ਗ੍ਰਿਫ਼ਤਾਰ ਕੀਤਾ ਸੀ। ਹਾਲਾਂਕਿ ਰਾਣਾ ਸੀ. ਬੀ. ਆਈ. ਨੂੰ ਚਕਮਾ ਦੇ ਕੇ ਫ਼ਰਾਰ ਹੋ ਗਿਆ ਸੀ। ਦੋਸ਼ ਹੈ ਕਿ ਇਹ ਸਾਰੇ ਮਿਲ ਕੇ ਮਲੋਟ ’ਚ ਤਾਇਨਾਤ ਸਟੇਟ ਟੈਕਸ ਅਫ਼ਸਰ ਅਮਿਤ ਕੁਮਾਰ ਨੂੰ ਕਿਸੇ ਫਰਜ਼ੀ ਮਾਮਲੇ 'ਚ ਫਸਾ ਰਹੇ ਸਨ ਅਤੇ ਫਿਰ ਉਨ੍ਹਾਂ ਨੂੰ ਬਚਾਉਣ ਦੇ ਨਾਂ ’ਤੇ ਰਿਸ਼ਵਤ ਮੰਗ ਰਹੇ ਸਨ। ਤੰਗ ਆ ਕੇ ਅਮਿਤ ਨੇ ਸੀ. ਬੀ. ਆਈ. ਨੂੰ ਸ਼ਿਕਾਇਤ ਦਿੱਤੀ ਸੀ। ਸੀ. ਬੀ. ਆਈ. ਨੇ ਉਸ ਨੂੰ ਫੜ੍ਹਨ ਲਈ ਸੈਕਟਰ-35 ਦੇ ਇੱਕ ਹੋਟਲ ਨੇੜੇ ਜਾਲ ਵਿਛਾਇਆ ਪਰ ਰਾਣਾ ਨਹੀਂ ਆਇਆ ਅਤੇ ਫ਼ਰਾਰ ਹੋ ਗਿਆ ਸੀ। ਇਸ ਦੇ ਬਾਅਦ ਉਸ ਨੇ ਸੀ. ਬੀ. ਆਈ. ਅਦਾਲਤ ’ਚ ਅਗਾਊਂ ਜ਼ਮਾਨਤ ਅਰਜ਼ੀ ਦਾਇਰ ਕੀਤੀ ਸੀ, ਜਿਸਨੂੰ ਰੱਦ ਕਰ ਦਿੱਤਾ ਗਿਆ। ਇਸ ਦੇ ਬਾਅਦ ਪੰਜਾਬ ਅਤੇ ਹਰਿਆਣਾ ਹਾਈਕੋਰਟ ’ਚ ਵੀ ਜ਼ਮਾਨਤ ਦੀ ਅਰਜ਼ੀ ਦਾਇਰ ਕੀਤੀ ਸੀ, ਪਰ ਉੱਥੇ ਸਰੰਡਰ ਕਰਨ ਦੀ ਗੱਲ ਕਰਦੇ ਹੋਏ ਪਟੀਸ਼ਨ ਵਾਪਸ ਲੈ ਲਈ ਸੀ।
ਸੀ. ਬੀ. ਆਈ. ਨੇ ਕਿਹਾ, ਜਾਣਕਾਰੀ ਛੁਪਾ ਰਿਹਾ ਰਾਣਾ
ਸੀ. ਬੀ. ਆਈ. ਨੇ ਸੋਮਵਾਰ ਨੂੰ ਅਦਾਲਤ ’ਚ ਹੀ ਮੁਲਜ਼ਮ ਤੋਂ ਕਾਫ਼ੀ ਦੇਰ ਤੱਕ ਪੁੱਛਗਿੱਛ ਕੀਤੀ, ਪਰ ਉਹ ਕੁੱਝ ਵੀ ਦੱਸਣ ਲਈ ਤਿਆਰ ਨਹੀਂ ਸੀ। ਸੀ. ਬੀ. ਆਈ. ਦੇ ਪਬਲਿਕ ਪ੍ਰੋਸਿਕਿਊਟਰ ਨਰਿੰਦਰ ਸਿੰਘ ਨੇ ਅਦਾਲਤ 'ਚ ਕਿਹਾ ਕਿ ਮੁਲਜ਼ਮ ਜਾਂਚ 'ਚ ਸਹਿਯੋਗ ਨਹੀਂ ਕਰ ਰਿਹਾ। ਉਸਨੇ ਆਪਣੇ ਮੋਬਾਇਲ ਫੋਨ, ਇਲੈਕਟ੍ਰਾਨਿਕ ਗੈਜੇਟਸ ਜਾਂ ਹੋਰ ਡਿਜੀਟਲ ਸਬੂਤਾਂ ਬਾਰੇ ਕੋਈ ਜਾਣਕਾਰੀ ਨਹੀਂ ਦਿੱਤੀ ਅਤੇ ਗੋਲ-ਮੋਲ ਜਵਾਬ ਦੇ ਰਿਹਾ ਹੈ। ਉਸਦੀ ਕਸਟੋਡੀਅਲ ਇੰਟੈਰੋਗੇਸ਼ਨ ਜ਼ਰੂਰੀ ਹੈ। ਸੀ. ਬੀ. ਆਈ. ਨੇ ਸੱਤ ਦਿਨਾਂ ਦਾ ਰਿਮਾਂਡ ਮੰਗਿਆ, ਜੋ ਕਿ ਮਨਜ਼ੂਰ ਹੋ ਗਿਆ।
ਡੀ. ਜੀ. ਪੀ. ਦਫ਼ਤਰ ਨੂੰ ਬਣਾਇਆ ਹੋਇਆ ਸੀ ਭ੍ਰਿਸ਼ਟਾਚਾਰ ਦਾ ਅੱਡਾ
ਸੀ. ਬੀ. ਆਈ. ਨੂੰ ਇਸ ਮਾਮਲੇ ਦੀ ਜਾਂਚ ਦੌਰਾਨ ਪਤਾ ਲੱਗਾ ਕਿ ਰਾਣਾ ਨੇ ਡੀ.ਜੀ.ਪੀ. ਵਿਜੀਲੈਂਸ ਦੇ ਦਫ਼ਤਰ ਨੂੰ ਭ੍ਰਿਸ਼ਟਾਚਾਰ ਦਾ ਅੱਡਾ ਬਣਾਇਆ ਹੋਇਆ ਸੀ। ਦੋਸ਼ ਹੈ ਕਿ ਓ. ਪੀ. ਰਾਣਾ ਪੰਜਾਬ ਵਿਜੀਲੈਂਸ ਵਿਭਾਗ ਨਾਲ ਸਬੰਧਿਤ ਗੁਪਤ ਸੂਚਨਾਵਾਂ ਨਿੱਜੀ ਲੋਕਾਂ ਤੱਕ ਪਹੁੰਚਾਉਂਦਾ ਸੀ ਅਤੇ ਇਸ ਦੇ ਬਦਲੇ 'ਚ ਰਿਸ਼ਵਤ ਅਤੇ ਹੋਰ ਵਿੱਤੀ ਲਾਭ ਲੈਂਦਾ ਸੀ। ਵਿਚੋਲਿਆਂ ਦੀ ਗ੍ਰਿਫ਼ਤਾਰੀ ਦੇ ਬਾਅਦ ਸੀ. ਬੀ. ਆਈ. ਨੂੰ ਕੁੱਝ ਵਟਸਐਪ ਚੈਟ, ਕਾਲ ਵੇਰਵੇ ਅਤੇ ਹੋਰ ਡਿਜੀਟਲ ਸਬੂਤ ਮਿਲੇ ਹਨ। ਜਿਨ੍ਹਾਂ ਤੋਂ ਸੀ. ਬੀ. ਆਈ. ਨੂੰ ਸੰਕੇਤ ਮਿਲੇ ਹਨ ਕਿ ਵਿਜੀਲੈਂਸ ਵਿਭਾਗ ਦੇ ਕੁਝ ਹੋਰ ਅਧਿਕਾਰੀਆਂ ਦਾ ਇੱਕ ਗੱਠਜੋੜ ਬਣਿਆ ਹੋਇਆ ਸੀ। ਇਹ ਲੋਕ ਲਗਾਤਾਰ ਸੰਪਰਕ 'ਚ ਰਹਿੰਦੇ ਸਨ ਅਤੇ ਲੋਕਾਂ ਨੂੰ ਵਿਜੀਲੈਂਸ ਸ਼ਿਕਾਇਤਾਂ ਦਾ ਡਰ ਦਿਖਾ ਕੇ ਉਨ੍ਹਾਂ ਤੋਂ ਪੈਸੇ ਵਸੂਲਦੇ ਸਨ।
ਇਹ ਹੈ ਮਾਮਲਾ
ਸੀ.ਬੀ.ਆਈ. ਮੁਤਾਬਕ ਇਹ ਮਾਮਲਾ ਮਲੋਟ ਦੇ ਸਟੇਟ ਟੈਕਸ ਅਧਿਕਾਰੀ ਅਮਿਤ ਕੁਮਾਰ ਨਾਲ ਸਬੰਧਿਤ ਹੈ। ਦੋਸ਼ ਹੈ ਕਿ ਓ. ਪੀ. ਰਾਣਾ ਅਤੇ ਵਿਚੋਲਿਆਂ ਨੇ ਅਮਿਤ ਕੁਮਾਰ ਨੂੰ ਇਹ ਕਹਿ ਕੇ ਧਮਕੀ ਦਿੱਤੀ ਕਿ ਉਨ੍ਹਾਂ ਖ਼ਿਲਾਫ਼ ਆਮਦਨ ਤੋਂ ਵੱਧ ਜਾਇਦਾਦ ਦੀ ਸ਼ਿਕਾਇਤ ਆਈ ਹੈ, ਜਿਸ ਨੂੰ ਡੀ. ਜੀ. ਪੀ. ਨੇ ਕਾਰਵਾਈ ਲਈ ਅੱਗੇ ਭੇਜ ਦਿੱਤਾ ਹੈ। ਸ਼ਿਕਾਇਤ ਨੂੰ ਦਬਾਉਣ ਦੇ ਨਾਂ ’ਤੇ ਮੁਲਜ਼ਮਾਂ ਨੇ ਅਮਿਤ ਕੁਮਾਰ ਤੋਂ 20 ਲੱਖ ਰੁਪਏ ਦੀ ਰਿਸ਼ਵਤ ਮੰਗੀ। ਫਿਰ ਉਨ੍ਹਾਂ ਵਿਚ 13 ਲੱਖ ਰੁਪਏ ’ਚ ਸੌਦਾ ਤੈਅ ਹੋ ਗਿਆ। ਮੁਲਜ਼ਮਾਂ ਨੇ ਕਿਹਾ ਸੀ ਕਿ 13 ਲੱਖ ਰੁਪਏ ‘ਵੱਡੇ ਸਾਹਿਬ’ ਤੱਕ ਪਹੁੰਚਾਏ ਜਾਣੇ ਹਨ, ਜਦੋਂ ਕਿ ਓ. ਪੀ. ਰਾਣਾ ਨੇ ਆਪਣੇ ਲਈ ਲਗਭਗ 1.86 ਲੱਖ ਰੁਪਏ ਦਾ ਮੋਬਾਇਲ ਫੋਨ ਮੰਗਿਆ ਸੀ। ਤੰਗ ਆ ਕੇ ਅਮਿਤ ਨੇ ਸੀ. ਬੀ. ਆਈ. ਨੂੰ ਸਾਰੀ ਜਾਣਕਾਰੀ ਦੇ ਦਿੱਤੀ ਸੀ। ਸੀ. ਬੀ. ਆਈ. ਨੇ ਟਰੈਪ ਲਗਾ ਕੇ ਅਮਿਤ ਤੋਂ 13 ਲੱਖ ਰੁਪਏ ਅਤੇ ਫੋਨ ਲੈਂਦੇ ਹੋਏ ਡਰਾਈਵਰ ਅਮਿਤ ਡਰਾਈਵਰ ਨੂੰ ਕਾਬੂ ਕਰ ਲਿਆ। ਇਸ ਤੋਂ ਬਾਅਦ ਸੀ. ਬੀ. ਆਈ. ਨੇ ਮਲੋਟ ਵਾਸੀ ਵਿਕਾਸ ਗੋਇਲ, ਰਾਘਵ ਗੋਇਲ, ਓ. ਪੀ. ਰਾਣਾ ਅਤੇ ਦੇਵੀ ਅਮਿਤ ਵਾਧਵਾ ’ਤੇ ਮਾਮਲਾ ਦਰਜ ਕੀਤਾ ਸੀ।