US ਸ਼ੇਅਰ ਬਾਜ਼ਾਰ ''ਚ ਮਚਿਆ ਹੜਕੰਪ : ਮਾਰਚ 2020 ਦੇ ਬਾਅਦ ਆਈ ਵੱਡੀ ਗਿਰਾਵਟ, Bitcoin ਵੀ ਟੁੱਟਿਆ

ਨਵੀਂ ਦਿੱਲੀ - ਅਮਰੀਕੀ ਸ਼ੇਅਰ ਬਾਜ਼ਾਰ 'ਚ ਲਗਾਤਾਰ ਤੀਜੇ ਹਫਤੇ ਗਿਰਾਵਟ ਦੇਖਣ ਨੂੰ ਮਿਲ ਰਹੀ ਹੈ। ਇਹ ਨਾਸਡੈਕ ਕੰਪੋਜ਼ਿਟ ਇੰਡੈਕਸ ਅਤੇ S&P 500 ਦੋਵੇਂ ਅਮਰੀਕੀ ਸਟਾਕ ਮਾਰਕੀਟ ਸੂਚਕਾਂਕ ਲਈ ਮਾਰਚ 2020 ਤੋਂ ਬਾਅਦ ਦਾ ਸਭ ਤੋਂ ਖ਼ਰਾਬ ਹਫ਼ਤਾ ਸੀ। ਸ਼ੁੱਕਰਵਾਰ ਨੂੰ ਨੈਸਡੈਕ 2.7% ਘਟਿਆ, ਜਦੋਂ ਕਿ S&P 500 1.89% ਹੇਠਾਂ ਸੀ। Nasdaq ਕੰਪੋਜ਼ਿਟ ਇੰਡੈਕਸ 7.55% ਹੇਠਾਂ ਹੈ ਅਤੇ SP 500 ਇਸ ਹਫਤੇ 5.7% ਹੇਠਾਂ  ਆ ਗਿਆ ਹੈ।

ਇਹ ਵੀ ਪੜ੍ਹੋ : ਅਮਰੀਕਾ ਵਿਚ 5ਜੀ ਸੇਵਾਵਾਂ ਨੂੰ ਲੈ ਕੇ ਕਈ ਉਡਾਣਾਂ ਰੱਦ, ਹਜ਼ਾਰਾਂ ਯਾਤਰੀ ਪ੍ਰਭਾਵਿਤ

ਇਸ ਕਾਰਨ ਟੁੱਟਿਆ ਅਮਰੀਕੀ ਸ਼ੇਅਰ ਬਾਜ਼ਾਰ

ਨਿਵੇਸ਼ਕ ਸਾਲ ਦੀ ਸ਼ੁਰੂਆਤ ਵਿੱਚ ਜੋਖਮ ਲੈਣ ਲਈ ਤਿਆਰ ਨਹੀਂ ਹਨ। ਇਸ ਦੇ ਨਾਲ ਹੀ ਅਮਰੀਕੀ ਫੈਡਰਲ ਰਿਜ਼ਰਵ ਮਹਿੰਗਾਈ ਨਾਲ ਨਜਿੱਠਣ ਲਈ ਇਸ ਸਾਲ ਕਈ ਵਾਰ ਵਿਆਜ ਦਰਾਂ ਵਧਾ ਸਕਦਾ ਹੈ, ਜਿਸ ਕਾਰਨ ਬਾਜ਼ਾਰ ਵੀ ਪ੍ਰਭਾਵਿਤ ਹੋ ਰਿਹਾ ਹੈ। ਪਿਛਲੇ ਹਫਤੇ, ਫੈਡਰਲ ਰਿਜ਼ਰਵ ਦੇ ਚੇਅਰਮੈਨ ਜੇਰੋਮ ਪਾਵੇਲ ਨੇ ਵਧਦੀ ਮਹਿੰਗਾਈ ਨੂੰ ਦੇਸ਼ ਦੀ ਆਰਥਿਕ ਰਿਕਵਰੀ ਲਈ ਇੱਕ ਗੰਭੀਰ ਖ਼ਤਰਾ ਦੱਸਿਆ। ਜਿਸ ਤੋਂ ਬਾਅਦ ਨਿਵੇਸ਼ਕਾਂ ਨੂੰ ਲੱਗ ਰਿਹਾ ਹੈ ਕਿ ਫੈਡਰਲ ਰਿਜ਼ਰਵ ਮਹਿੰਗਾਈ ਨਾਲ ਨਜਿੱਠਣ ਲਈ ਇਸ ਸਾਲ ਕਈ ਵਾਰ ਵਿਆਜ ਦਰਾਂ ਵਧਾਏਗਾ। ਇਸ ਕਾਰਨ ਵੀ ਨਿਵੇਸ਼ਕਾਂ ਦਾ ਰੁਝਾਨ ਪ੍ਰਭਾਵਿਤ ਹੋਇਆ ਹੈ।

ਕੱਚੇ ਤੇਲ ਦੀਆਂ ਕੀਮਤਾਂ ਵੀ ਡਿੱਗੀਆਂ

ਸ਼ੁੱਕਰਵਾਰ ਨੂੰ ਵੀ ਕੱਚੇ ਤੇਲ ਦੀਆਂ ਕੀਮਤਾਂ 'ਚ ਗਿਰਾਵਟ ਦਰਜ ਕੀਤੀ ਗਈ। ਆਰਸੀਬੀ ਕੈਪੀਟਲ ਮਾਰਕਿਟ ਦੇ ਮਾਹਿਰਾਂ ਮੁਤਾਬਕ ਕੌਮਾਂਤਰੀ ਬਾਜ਼ਾਰ 'ਚ ਕੱਚੇ ਤੇਲ ਦੀਆਂ ਕੀਮਤਾਂ 0.55 ਫੀਸਦੀ ਡਿੱਗ ਕੇ 87.89 ਡਾਲਰ ਪ੍ਰਤੀ ਬੈਰਲ 'ਤੇ ਆ ਗਈਆਂ ਹਨ। ਅਮਰੀਕਾ ਦੇ ਨਾਲ-ਨਾਲ ਯੂਰਪ ਵਿੱਚ, STOXX ਯੂਰਪ 600 1.8% ਡਿੱਗਿਆ। ਇਸ ਤੋਂ ਇਲਾਵਾ ਚੀਨ ਦਾ ਸ਼ੰਘਾਈ ਕੰਪੋਜ਼ਿਟ ਇੰਡੈਕਸ ਅਤੇ ਜਾਪਾਨ ਦਾ ਨਿੱਕੇਈ 'ਚ ਵੀ ਗਿਰਾਵਟ ਦਰਜ ਕੀਤੀ ਗਈ।

ਇਹ ਵੀ ਪੜ੍ਹੋ : ਖੁੱਲ੍ਹ ਗਿਆ ਹੈ 2022 ਦਾ ਪਹਿਲਾ IPO, ਰਿਟੇਲ ਦਾ ਹਿੱਸਾ 3 ਘੰਟੇ 'ਚ ਹੋਇਆ ਸਬਸਕ੍ਰਾਇਬ

ਬਿਟਕੁਆਇਨ ਦੀ ਕੀਮਤ ਵੀ ਘਟੀ

ਸ਼ੇਅਰ ਬਾਜ਼ਾਰ ਦੇ ਨਾਲ-ਨਾਲ ਕ੍ਰਿਪਟੋ ਕਰੰਸੀ ਬਾਜ਼ਾਰ 'ਚ ਵੀ ਕਾਫੀ ਉਥਲ-ਪੁਥਲ ਮਚ ਗਈ ਹੈ। ਅੱਜ ਰਾਤ 3.40 ਤੱਕ ਸਭ ਤੋਂ ਵੱਧ ਚਰਚਿਤ ਕ੍ਰਿਪਟੋ ਬਿਟਕੁਆਇਨ ਦੀ ਕੀਮਤ ਵਿੱਚ 8.69% ਦੀ ਕਮੀ ਆਈ ਹੈ। ਬਿਟਕੁਆਇਨ ਦੀ ਕੀਮਤ 'ਚ 2.62 ਲੱਖ ਰੁਪਏ ਦੀ ਗਿਰਾਵਟ ਆਈ ਹੈ। ਮੌਜੂਦਾ ਸਮੇਂ 'ਚ ਇਕ ਬਿਟਕੁਆਇਨ ਦੀ ਕੀਮਤ 27.64 ਲੱਖ ਰੁਪਏ 'ਤੇ ਪਹੁੰਚ ਗਈ ਹੈ, ਜੋ 6 ਮਹੀਨੇ ਪਹਿਲਾਂ 33.73 ਲੱਖ ਰੁਪਏ ਸੀ।

ਭਾਰਤੀ ਸ਼ੇਅਰ ਬਾਜ਼ਾਰ ਦਾ ਹਾਲ

ਭਾਰਤੀ ਸ਼ੇਅਰ ਬਾਜ਼ਾਰ 'ਚ ਵੀ ਲਗਾਤਾਰ ਚੌਥੇ ਦਿਨ ਗਿਰਾਵਟ ਦਰਜ ਕੀਤੀ ਗਈ। ਸ਼ੁੱਕਰਵਾਰ ਨੂੰ ਬੰਬਈ ਸਟਾਕ ਐਕਸਚੇਂਜ (ਬੀ.ਐੱਸ.ਈ.) ਦਾ ਸੈਂਸੈਕਸ 427 ਅੰਕ (0.72%) ਡਿੱਗ ਕੇ 59,037 'ਤੇ ਅਤੇ ਨੈਸ਼ਨਲ ਸਟਾਕ ਐਕਸਚੇਂਜ ਦਾ ਨਿਫਟੀ 140 ਅੰਕ (0.79%) ਡਿੱਗ ਕੇ 17,617 'ਤੇ ਆ ਗਿਆ। ਹਾਲਾਂਕਿ ਸਵੇਰ ਦੇ ਸੈਸ਼ਨ 'ਚ ਸੈਂਸੈਕਸ 700 ਤੋਂ ਜ਼ਿਆਦਾ ਅੰਕ ਟੁੱਟ ਗਿਆ ਸੀ।

ਇਹ ਵੀ ਪੜ੍ਹੋ : ਸੋਨੇ ਦੀ ਕੀਮਤ 'ਚ ਵਾਧਾ , ਚਾਂਦੀ ਟੁੱਟਣ ਤੋਂ ਬਾਅਦ ਵੀ 65000 ਤੋਂ ਉਪਰ ਚੜ੍ਹੀ

ਨੋਟ - ਇਸ ਖ਼ਬਰ ਬਾਰੇ ਆਪਣੇ ਵਿਚਾਰ ਕੁਮੈਂਟ ਬਾਕਸ ਵਿਚ ਜ਼ਰੂਰ ਸਾਂਝੇ ਕਰੋ।