ਠਾਹ ਡਿੱਗਾ ਸ਼ੇਅਰ ਬਾਜ਼ਾਰ : ਸੈਂਸੈਕਸ 733 ਅੰਕ ਟੁੱਟਿਆ ਤੇ ਨਿਫਟੀ ਵੀ ਵੱਡੀ ਗਿਰਾਵਟ ਲੈ ਕੇ ਹੋਇਆ ਬੰਦ

ਬਿਜ਼ਨੈੱਸ ਡੈਸਕ : ਡੋਨਾਲਡ ਟਰੰਪ ਦੇ ਨਵੇਂ ਟੈਰਿਫ ਐਲਾਨ ਤੋਂ ਬਾਅਦ ਅੱਜ ਦਿਨ ਭਰ ਭਾਰਤੀ ਸਟਾਕ ਮਾਰਕੀਟ ਵਿੱਚ ਕਾਫ਼ੀ ਦਬਾਅ ਦੇਖਣ ਨੂੰ ਮਿਲਿਆ ਹੈ। ਫਾਰਮਾਸਿਊਟੀਕਲ ਸੈਕਟਰ 'ਤੇ 100% ਟੈਰਿਫ ਲਗਾਉਣ ਦੇ ਫੈਸਲੇ ਦਾ ਨਿਵੇਸ਼ਕਾਂ ਦੀਆਂ ਜੇਬਾਂ 'ਤੇ ਸਪੱਸ਼ਟ ਤੌਰ 'ਤੇ ਅਸਰ ਪਿਆ ਹੈ। ਅਮਰੀਕੀ ਬਾਜ਼ਾਰਾਂ ਵਿੱਚ ਵਧ ਰਹੇ ਟੈਰਿਫ ਕਾਰਨ ਪ੍ਰਮੁੱਖ ਭਾਰਤੀ ਫਾਰਮਾਸਿਊਟੀਕਲ ਸਟਾਕਾਂ ਵਿੱਚ ਤੇਜ਼ੀ ਨਾਲ ਗਿਰਾਵਟ ਆਈ, ਜਿਸ ਕਾਰਨ ਸੈਂਸੈਕਸ ਅਤੇ ਨਿਫਟੀ ਦੋਵਾਂ ਵਿੱਚ ਕਾਫ਼ੀ ਗਿਰਾਵਟ ਆਈ। ਇਸ ਪੂਰੇ ਹਫ਼ਤੇ ਸੂਚਕਾਂਕ ਗਿਰਾਵਟ ਨਾਲ ਕਾਰੋਬਾਰ ਕਰਦੇ ਦੇਖੇ ਗਏ ਅਤੇ ਅੱਜ ਆਖਰੀ ਦਿਨ ਬਾਜ਼ਾਰ ਵੱਡੇ ਘਾਟੇ ਦੇ ਨਾਲ ਬੰਦ ਹੋਏ।

ਸੈਂਸੈਕਸ 733.22 ਅੰਕ ਭਾਵ 0.90% ਡਿੱਗ ਕੇ 80,426.46 ਦੇ ਪੱਧਰ 'ਤੇ ਬੰਦ ਹੋਇਆ ਹੈ। ਸੈਂਸੈਕਸ ਦੇ 5 ਸਟਾਕ ਵਾਧੇ ਨਾਲ ਅਤੇ 25 ਸਟਾਕ ਗਿਰਾਵਟ ਨਾਲ ਕਾਰੋਬਾਰ ਕਰਦੇ ਦੇਖੇ ਗਏ।

ਦੂਜੇ ਪਾਸੇ ਨਿਫਟੀ ਲਗਾਤਾਰ ਛੇਵੇਂ ਦਿਨ ਗਿਰਾਵਟ ਵਿੱਚ ਰਿਹਾ,  ਮਿਡ-ਕੈਪ ਅਤੇ ਸਮਾਲ-ਕੈਪ ਸੂਚਕਾਂਕ ਵਿੱਚ ਵੀ ਭਾਰੀ ਵਿਕਰੀ ਦੇਖਣ ਨੂੰ ਮਿਲੀ। ਨਿਫਟੀ 236.15 ਅੰਕ ਭਾਵ 0.95% ਡਿੱਗ ਕੇ 24,654.70 ਦੇ ਪੱਧਰ 'ਤੇ ਬੰਦ ਹੋਇਆ ਹੈ। 

ਫਾਰਮਾਸਿਊਟੀਕਲ ਸੈਕਟਰ ਵਿੱਚ, ਔਰੋਬਿੰਦੋ ਫਾਰਮਾ, ਲੂਪਿਨ, ਡੀਆਰਐਲ, ਸਨ ਫਾਰਮਾ ਅਤੇ ਬਾਇਓਕੋਨ ਵਰਗੇ ਪ੍ਰਮੁੱਖ ਸਟਾਕਾਂ ਵਿੱਚ ਭਾਰੀ ਵਿਕਰੀ ਦੇਖੀ ਗਈ। ਔਰੋਬਿੰਦੋ ਫਾਰਮਾ ਦੇ ਸ਼ੇਅਰ 1.91 ਪ੍ਰਤੀਸ਼ਤ ਡਿੱਗ ਕੇ 1,076 ਰੁਪਏ 'ਤੇ ਬੰਦ ਹੋਏ, ਜਦੋਂ ਕਿ ਲੂਪਿਨ ਲਗਭਗ 3 ਪ੍ਰਤੀਸ਼ਤ ਡਿੱਗ ਕੇ 1,918.60 ਰੁਪਏ 'ਤੇ ਆ ਗਏ। ਸਨ ਫਾਰਮਾ ਦੇ ਸ਼ੇਅਰ ਲਗਭਗ 3 ਪ੍ਰਤੀਸ਼ਤ ਡਿੱਗ ਕੇ 1,580 ਰੁਪਏ 'ਤੇ ਵਪਾਰ ਕਰਨ ਲੱਗੇ। ਸਿਪਲਾ, ਸਟ੍ਰਾਈਡਸ ਫਾਰਮਾ ਸਾਇੰਸ, ਨੈਟਕੋ ਫਾਰਮਾ, ਬਾਇਓਕੋਨ, ਅਤੇ ਮੈਨਕਾਈਂਡ ਫਾਰਮਾ ਦੇ ਸ਼ੇਅਰ ਵੀ 2 ਤੋਂ 6 ਪ੍ਰਤੀਸ਼ਤ ਦੇ ਵਿਚਕਾਰ ਡਿੱਗ ਗਏ।

ਬੀਐਸਈ 'ਤੇ ਚੋਟੀ ਦੇ 30 ਸਟਾਕਾਂ ਵਿੱਚੋਂ, ਸਨ ਫਾਰਮਾ ਦੇ ਸਟਾਕ ਵਿੱਚ ਸਭ ਤੋਂ ਵੱਡੀ 2.67 ਪ੍ਰਤੀਸ਼ਤ ਦੀ ਗਿਰਾਵਟ ਦਰਜ ਕੀਤੀ ਗਈ। ਇਨਫੋਸਿਸ, ਟੈਕ ਮਹਿੰਦਰਾ ਅਤੇ ਏਸ਼ੀਅਨ ਪੇਂਟਸ ਵਰਗੇ ਪ੍ਰਮੁੱਖ ਸਟਾਕਾਂ ਵਿੱਚ ਵੀ ਲਗਭਗ 2 ਪ੍ਰਤੀਸ਼ਤ ਦੀ ਗਿਰਾਵਟ ਆਈ। ਹਾਲਾਂਕਿ, ਕੁਝ ਸਟਾਕਾਂ ਵਿੱਚ ਮਾਮੂਲੀ ਵਾਧਾ ਵੀ ਹੋਇਆ।

ਇਸ ਨਵੀਂ ਟੈਰਿਫ ਨੀਤੀ ਨੇ ਭਾਰਤੀ ਫਾਰਮਾਸਿਊਟੀਕਲ ਕੰਪਨੀਆਂ ਦੇ ਅਮਰੀਕਾ ਨੂੰ ਨਿਰਯਾਤ ਸੰਭਾਵਨਾਵਾਂ ਬਾਰੇ ਸਵਾਲ ਖੜ੍ਹੇ ਕੀਤੇ ਹਨ, ਜਿਸ ਨਾਲ ਨਿਵੇਸ਼ਕਾਂ ਵਿੱਚ ਡਰ ਪੈਦਾ ਹੋਇਆ ਹੈ। ਮਾਹਿਰਾਂ ਦਾ ਮੰਨਣਾ ਹੈ ਕਿ ਅਮਰੀਕਾ ਦੇ ਇਸ ਕਦਮ ਦਾ ਨਾ ਸਿਰਫ਼ ਫਾਰਮਾਸਿਊਟੀਕਲ ਸੈਕਟਰ 'ਤੇ ਸਗੋਂ ਸਮੁੱਚੇ ਤੌਰ 'ਤੇ ਭਾਰਤੀ ਸਟਾਕ ਮਾਰਕੀਟ 'ਤੇ ਲੰਬੇ ਸਮੇਂ ਦੇ ਪ੍ਰਭਾਵ ਪੈ ਸਕਦੇ ਹਨ।