341 ਅੰਕਾਂ ਦਾ ਵਾਧਾ ਲੈ ਕੇ ਬੰਦ ਹੋਇਆ ਸੈਂਸੈਕਸ, ਸ਼ੇਅਰ ਬਾਜ਼ਾਰ ਦੀ ਰੌਣਕ ਬਣੇ ਇਹ ਸਟਾਕ

ਮੁੰਬਈ -  ਅੱਜ ਹਫਤੇ ਦੇ ਪਹਿਲੇ ਕਾਰੋਬਾਰੀ ਦਿਨ ਯਾਨੀ ਸੋਮਵਾਰ ਨੂੰ ਸੈਂਸੈਕਸ 341.04 ਅੰਕ ਭਾਵ 0.46 ਫ਼ੀਸਦੀ ਦੀ ਤੇਜ਼ੀ ਨਾਲ 74,169 ਦੇ ਪੱਧਰ 'ਤੇ ਬੰਦ ਹੋਇਆ। ਸੈਂਸੈਕਸ 30 ਦੇ 20 ਸਟਾਕ ਵਾਧੇ ਨਾਲ ਅਤੇ 10 ਸਟਾਕ ਗਿਰਾਵਟ ਨਾਲ ਕਾਰੋਬਾਰ ਕਰਦੇ ਦੇਖੇ ਗਏ। 

ਦੂਜੇ ਪਾਸੇ ਨਿਫਟੀ50 'ਚ 111.55 ਅੰਕ ਭਾਵ 0.5 ਫ਼ੀਸਦੀ ਦਾ ਵਾਧਾ ਦੇਖਣ ਨੂੰ ਮਿਲਿਆ ਹੈ , ਇਹ 22,508.75 ਦੇ ਪੱਧਰ 'ਤੇ ਬੰਦ ਹੋਇਆ। ਨਿਫਟੀ ਦੇ 33 ਸਟਾਕ ਵਾਧੇ ਨਾਲ ਅਤੇ 17 ਸਟਾਕ ਗਿਰਾਵਟ ਨਾਲ ਕਾਰੋਬਾਰ ਕਰਦੇ ਦੇਖੇ ਗਏ। 13 ਮਾਰਚ ਨੂੰ ਵਿਦੇਸ਼ੀ ਨਿਵੇਸ਼ਕਾਂ (ਐੱਫ.ਆਈ.ਆਈ.) ਨੇ 792 ਕਰੋੜ ਰੁਪਏ ਦੇ ਸ਼ੇਅਰ ਵੇਚੇ। ਇਸ ਦੌਰਾਨ ਘਰੇਲੂ ਨਿਵੇਸ਼ਕਾਂ (DIIs) ਨੇ 1,723 ਕਰੋੜ ਰੁਪਏ ਦੇ ਸ਼ੇਅਰ ਖਰੀਦੇ।

ਇਹ ਸਟਾਕ ਬਣੇ ਬਾਜ਼ਾਰ ਦੀ ਰੌਣਕ

ਅੱਜ ਦੇ ਕਾਰੋਬਾਰ 'ਚ ਫਾਰਮਾ, ਬੈਂਕ ਅਤੇ ਆਟੋ ਸ਼ੇਅਰ ਸਭ ਤੋਂ ਵੱਧ ਚੜ੍ਹੇ।  ਨਿਫਟੀ ਫਾਰਮਾ ਇੰਡੈਕਸ 'ਚ ਸਭ ਤੋਂ ਜ਼ਿਆਦਾ 1.56 ਫੀਸਦੀ ਦਾ ਵਾਧਾ ਦਰਜ ਕੀਤਾ ਗਿਆ। ਬੈਂਕ ਅਤੇ ਆਟੋ ਸ਼ੇਅਰ ਵੀ ਕਰੀਬ 1% ਚੜ੍ਹ ਕੇ ਬੰਦ ਹੋਏ। ਰਿਐਲਟੀ, ਐਫਐਮਸੀਜੀ ਅਤੇ ਮੀਡੀਆ ਸੈਕਟਰ ਵਿੱਚ ਲਗਭਗ 0.50% ਦੀ ਗਿਰਾਵਟ ਆਈ ਹੈ। ਬਜਾਜ ਫਿਨਸਰਵ, ਐਮਐਂਡਐਮ ਅਤੇ ਐਕਸਿਸ ਬੈਂਕ ਸੈਂਸੈਕਸ 'ਤੇ ਸਭ ਤੋਂ ਵੱਧ ਲਾਭਕਾਰੀ ਸਨ।

ਗਲੋਬਲ ਮਾਰਕੀਟ ਦਾ ਹਾਲ

ਏਸ਼ੀਆਈ ਬਾਜ਼ਾਰਾਂ 'ਚ ਜਾਪਾਨ ਦਾ ਨਿੱਕੇਈ 0.93%, ਹਾਂਗਕਾਂਗ ਦਾ ਹੈਂਗ ਸੇਂਗ ਇੰਡੈਕਸ 0.77% ਅਤੇ ਚੀਨ ਦਾ ਸ਼ੰਘਾਈ ਕੰਪੋਜ਼ਿਟ 0.19% ਵਧਿਆ ਹੈ।
14 ਮਾਰਚ ਨੂੰ ਅਮਰੀਕਾ ਦਾ ਡਾਓ ਜੋਂਸ 1.65 ਫੀਸਦੀ ਵਧ ਕੇ 41,488 'ਤੇ ਬੰਦ ਹੋਇਆ ਸੀ। Nasdaq ਕੰਪੋਜ਼ਿਟ 2.61% ਵਧਿਆ ਅਤੇ S&P 500 ਸੂਚਕਾਂਕ 2.13% ਵਧਿਆ।

ਪਿਛਲੇ ਹਫ਼ਤੇ ਗਿਰਾਵਟ ਨਾਲ ਬੰਦ ਹੋਏ ਬਾਜ਼ਾਰ

14 ਮਾਰਚ ਨੂੰ ਹੋਲੀ ਕਾਰਨ ਬਾਜ਼ਾਰ ਬੰਦ ਰਹੇ। 15 ਅਤੇ 16 ਮਾਰਚ ਨੂੰ ਹਫਤਾਵਾਰੀ ਛੁੱਟੀ ਸੀ। ਇਸ ਤੋਂ ਪਹਿਲਾਂ 13 ਮਾਰਚ ਨੂੰ ਸੈਂਸੈਕਸ 200 ਅੰਕ ਡਿੱਗ ਕੇ 73,828 ਦੇ ਪੱਧਰ 'ਤੇ ਬੰਦ ਹੋਇਆ ਸੀ। ਨਿਫਟੀ 73 ਅੰਕ ਡਿੱਗ ਕੇ 22,397 ਦੇ ਪੱਧਰ 'ਤੇ ਬੰਦ ਹੋਇਆ।

ਸੈਂਸੈਕਸ ਦੇ 30 ਸ਼ੇਅਰਾਂ 'ਚੋਂ 8 ਵਧੇ ਅਤੇ 22 ਡਿੱਗੇ। ਸਟੇਟ ਬੈਂਕ, ਆਈਸੀਆਈਸੀਆਈ ਬੈਂਕ ਅਤੇ ਪਾਵਰ ਗਰਿੱਡ ਦੇ ਸ਼ੇਅਰ ਵਧੇ ਜਦੋਂ ਕਿ ਟਾਟਾ ਮੋਟਰਜ਼ 2.0%, ਇੰਡਸਇੰਡ ਬੈਂਕ 1.78% ਅਤੇ ਜ਼ੋਮੈਟੋ 1.34% ਡਿੱਗ ਗਏ।

ਨਿਫਟੀ ਦੇ 50 ਸ਼ੇਅਰਾਂ 'ਚੋਂ 12 ਵਧੇ, ਜਦਕਿ 38 'ਚ ਗਿਰਾਵਟ ਦਰਜ ਕੀਤੀ ਗਈ। NSE ਰਿਐਲਟੀ 1.83%, ਮੀਡੀਆ 1.50% ਅਤੇ ਆਟੋ ਸੈਕਟਰ 1.10% ਡਿੱਗਿਆ।