ਮਹਾਮਾਰੀ ਦੇ ਝਟਕੇ ਤੋਂ ਬਾਅਦ ਵੱਡੇ ਸ਼ੇਅਰਾਂ ਹੀ ਨਹੀਂ, ਮਿਡ ਕੈਪ, ਸਮਾਲ ਕੈਪ ’ਚ ਵੀ ਸੁਧਾਰ ਹੋਇਆ : ਅਜੇ ਤਿਆਗੀ

ਮੁੰਬਈ(ਭਾਸ਼ਾ) – ਬਾਜ਼ਾਰ ਰੈਗੁਲੇਟਰੀ ਭਾਰਤੀ ਸਿਕਿਓਰਿਟੀ ਅਤੇ ਐਕਸਚੇਂਜ ਬੋਰਡ (ਸੇਬੀ) ਦੇ ਚੇਅਰਮੈਨ ਅਜੇ ਤਿਆਗੀ ਨੇ ਕਿਹਾ ਕਿ ਮਹਾਮਾਰੀ ਦੇ ਝਟਕੇ ਤੋਂ ਬਾਅਦ ਪੂੰਜੀ ਬਾਜ਼ਾਰਾਂ ’ਚ ਵਿਆਪਕ ਆਧਾਰ ’ਤੇ ਸੁਧਾਰ ਹੋਇਆ ਹੈ। ਸ਼ੇਅਰ ਬਾਜ਼ਾਰਾਂ ਅਤੇ ਅਰਥਵਿਵਸਥਾ ਦਰਮਿਆਨ ‘ਕਿਸੇ ਤਰ੍ਹਾਂ ਦਾ ਤਾਲਮੇਲ’ ਨਾ ਹੋਣ ਦੀਆਂ ਆਲੋਚਨਾਵਾਂ ਦਰਮਿਆਨ ਸੇਬੀ ਪ੍ਰਮੁੱਖ ਦਾ ਇਹ ਬਿਆਨ ਆਇਆ ਹੈ।

ਤਿਆਗੀ ਨੇ ਕਿਹਾ ਕਿ ਇਸ ’ਚ ਕੁਝ ਸਕਾਰਾਤਕਮ ਪਹਿਲੂ ਵੀ ਹਨ ਅਤੇ ਬਾਜ਼ਾਰ ’ਚ ਸੁਧਾਰ ਵਿਆਪਕ ਹੈ। ਤਿਆਗੀ ਨੇ ਕਿਹਾ ਕਿ ਅਸੀਂ ਦੇਖਿਆ ਹੈ ਕਿ ਬਾਜ਼ਾਰ ’ਚ ਸੁਧਾਰ ਵਿਆਪਕ ਹੈ। ਸਿਰਫ ਵੱਡੇ ਸ਼ਹਿਰਾਂ (ਲਾਰਜ ਕੈਪ) ਵਿਚ ਹੀ ਸੁਧਾਰ ਨਹੀਂ ਹੋਇਆ ਹੈ, ਮਿਡ ਕੈਪ ਅਤੇ ਸਮਾਲ ਕੈਪ ਸ਼ੇਅਰ ਵੀ ਸੁਧਰੇ ਹਨ। ਜ਼ਿਕਰਯੋਗ ਹੈ ਕਿ ਵਿਸ਼ਵ ਸਿਹਤ ਸੰਗਠਨ (ਡਬਲਯੂ. ਐੱਚ. ਓ.) ਵਲੋਂ ਕੋਵਿਡ-19 ਨੂੰ ਮਹਾਮਾਰੀ ਐਲਾਨ ਕੀਤੇ ਜਾਣ ਤੋਂ ਬਾਅਦ ਪੂੰਜੀ ਬਾਜ਼ਾਰ ’ਚ ਭਾਰੀ ਗਿਰਾਵਟ ਆਈ ਸੀ। ਪਰ ਹੁਣ ਬਾਜ਼ਾਰ ਇਸ ਝਟਕੇ ਤੋਂ ਉਭਰ ਚੁੱਕੇ ਹਨ ਅਤੇ ਜਨਵਰੀ 2020 ਦੇ ਆਪਣੇ ਸਭ ਤੋਂ ਉੱਚ ਪੱਧਰ ਦੇ ਕੋਲ ਪਹੁੰਚ ਚੁੱਕੇ ਹਨ।

ਅਪ੍ਰੈਲ-ਸਤੰਬਰ ਦੌਰਾਨ 63 ਲੱਖ ਨਵੇਂ ਡੀਮੈਟ ਖਾਤੇ ਖੁੱਲ੍ਹੇ

ਤਿਆਗੀ ਨੇ ਕਿਹਾ ਕਿ ਨੈਸ਼ਨਲ ਸਟਾਕ ਐਕਸਚੇਂਜ (ਐੱਨ. ਐੱਸ. ਈ.) ਵਿਚ 90 ਫੀਸਦੀ ਸ਼ੇਅਰਾਂ ਨੇ 2020 ’ਚ ਨਿਵੇਸ਼ਕਾਂ ਨੂੰ ਸਕਾਰਾਤਮਕ ਰਿਟਰਨ ਦਿੱਤਾ ਹੈ। ਉਨ੍ਹਾਂ ਨੇ ਇਸ ਗੱਲ ਨੂੰ ਸਵੀਕਾਰ ਕੀਤਾ ਕਿ ਅਜਿਹੀ ਚਰਚਾ ਹੈ ਕਿ ਤਰਲਤਾ ਕਾਰਣ ਬਾਜ਼ਾਰ ਅੱਗੇ ਵਧਿਆ ਹੈ। ਨਾਲ ਹੀ ਅਜਿਹੀ ਵੀ ਚਰਚਾ ਹੈ ਕਿ ਬਾਜ਼ਾਰ ਦਾ ਅਰਥਵਿਵਸਥਾ ਦੇ ਨਾਲ ਸ਼ਮੂਲੀਅਤ ਨਹੀਂ ਹੈ। ਚਾਲੂ ਵਿੱਤੀ ਸਾਲ ਦੀ ਪਹਿਲੀ ਛਿਮਾਹੀ ਅਪ੍ਰੈਲ-ਸਤੰਬਰ ਦੇ ਦੌਰਾਨ 63 ਲੱਖ ਨਵੇਂ ਡੀਮੈਟ ਖਾਤੇ ਖੋਲ੍ਹੇ ਗਏ। ਪਿਛਲੇ ਸਾਲ ਦੀ ਸਮਾਨ ਮਿਆਦ ’ਚ ਇਹ ਅੰਕੜਾ 27.4 ਲੱਖ ਰਿਹਾ ਸੀ। ਇਸ ਤਰ੍ਹਾਂ ਡੀਮੈਟ ਖਾਤਿਆਂ ਦੀ ਗਿਣਤੀ ’ਚ 130 ਫੀਸਦੀ ਦਾ ਵਾਧਾ ਹੋਇਆ ਹੈ।

ਐੱਫ. ਪੀ. ਆਈ. ਨੇ ਭਾਰਤੀ ਬਾਜ਼ਾਰ ’ਚ ਸ਼ੁੱਧ ਰੂਪ ਨਾਲ 11 ਅਰਬ ਡਾਲਰ ਦਾ ਕੀਤਾ ਨਿਵੇਸ਼

ਇਸ ਮਿਆਦ ’ਚ ਵਿਦੇਸ਼ੀ ਪੋਰਟਫੋਲੀਓ ਨਿਵੇਸ਼ਕਾਂ (ਐੱਫ. ਪੀ. ਆਈ.) ਨੇ ਭਾਰਤੀ ਬਾਜ਼ਾਰ ’ਚ ਸ਼ੁੱਧ ਰੂਪ ਨਾਲ 11 ਅਰਬ ਡਾਲਰ ਦਾ ਨਿਵੇਸ਼ ਕੀਤਾ ਹੈ। ਉਥੇ ਹੀ ਹੋਰ ਉਭਰਦੇ ਬਾਜ਼ਾਰਾਂ ’ਚ ਐੱਫ. ਪੀ. ਆਈ. ਦਾ ਨਿਵੇਸ਼ ਨਕਾਰਾਤਮਕ ਰਿਹਾ ਹੈ। ਮਾਰਚ ’ਚ ਜ਼ਰੂਰ ਭਾਰਤੀ ਬਾਜ਼ਾਰਾਂ ’ਚ ਨਿਕਾਸੀ ਹੋਈ ਸੀ। ਇਸ ਦੌਰਾਨ ਵਿਸ਼ੇਸ਼ ਰੂਪ ਨਾਲ ਕਰਜ਼ਾ ਜਾਂ ਬਾਂਡ ਬਾਜ਼ਾਰ ਤੋਂ ਨਿਕਾਸੀ ਦੇਖਣ ਨੂੰ ਮਿਲੀ ਹੈ। ਚਾਲੂ ਵਿੱਤੀ ਸਾਲ ਦੀ ਪਹਿਲੀ ਛਿਮਾਹੀ ’ਚ ਨਿਵੇਸ਼ ਦਾ ਕੁਲ ਪ੍ਰਵਾਹ 1.47 ਲੱਖ ਕਰੋੜ ਰੁਪਏ ਰਿਹਾ ਹੈ।