ਮਹਿੰਗਾ ਹੋਵੇਗਾ ਹਵਾਈ ਸਫ਼ਰ, 1 ਅਪ੍ਰੈਲ ਤੋਂ ਵਧੇਗੀ ਟਿਕਟ ''ਚ ਇਹ ਫ਼ੀਸ
Wednesday, Mar 31, 2021 - 02:51 PM (IST)
ਨਵੀਂ ਦਿੱਲੀ- ਹਵਾਈ ਸਫ਼ਰ ਕਰਨ ਵਾਲੇ ਲੋਕਾਂ ਨੂੰ ਹੁਣ ਟਿਕਟ ਖ਼ਰੀਦਣ ਸਮੇਂ ਜੇਬ ਹੋਰ ਢਿੱਲੀ ਕਰਨੀ ਪਵੇਗੀ ਕਿਉਂਕਿ ਹਵਾਬਾਜ਼ੀ ਸੁਰੱਖਿਆ ਫ਼ੀਸ (ਏ. ਐੱਸ. ਐੱਫ.) ਵਿਚ ਅਗਲੇ ਮਹੀਨੇ ਤੋਂ ਵਾਧਾ ਹੋਣ ਜਾ ਰਿਹਾ ਹੈ, ਜੋ ਹਵਾਈ ਯਾਤਰੀਆਂ ਕੋਲੋਂ ਵਸੂਲੀ ਜਾਂਦੀ ਹੈ। ਘਰੇਲੂ ਹਵਾਈ ਯਾਤਰਾ ਕਰਨ ਵਾਲਿਆਂ ਲਈ ਇਹ ਫ਼ੀਸ 200 ਰੁਪਏ ਹੋ ਜਾਵੇਗੀ, ਜੋ ਹੁਣ ਤੱਕ 160 ਰੁਪਏ ਹੈ। ਉੱਥੇ ਹੀ, ਕੌਮਾਂਤਰੀ ਉਡਾਣ ਫੜਨ ਵਾਲੇ ਯਾਤਰੀਆਂ ਲਈ ਇਹ ਮੌਜੂਦਾ 5.2 ਡਾਲਰ ਤੋਂ ਵੱਧ ਕੇ 12 ਡਾਲਰ ਹੋਣ ਜਾ ਰਹੀ ਹੈ।
ਨਵੀਂਆਂ ਦਰਾਂ 1 ਅਪ੍ਰੈਲ 2021 ਤੋਂ ਜਾਰੀ ਹੋਣ ਵਾਲੀਆਂ ਟਿਕਟਾਂ 'ਤੇ ਲਾਗੂ ਹੋਣਗੀਆਂ। ਹਵਾਈ ਈਂਧਣ ਮਹਿੰਗਾ ਹੋਣ ਕਾਰਨ ਪਿਛਲੇ ਡੇਢ ਮਹੀਨੇ ਵਿਚ ਘਰੇਲੂ ਉਡਾਣਾਂ ਦੇ ਹਵਾਈ ਕਿਰਾਇਆਂ ਵਿਚ 30 ਫ਼ੀਸਦੀ ਤੱਕ ਦਾ ਵਾਧਾ ਕੀਤਾ ਗਿਆ ਹੈ। ਹੁਣ ਏ. ਐੱਸ. ਐੱਫ. ਵਿਚ ਵਾਧਾ ਹੋਣ ਨਾਲ ਹਵਾਈ ਸਫ਼ਰ ਹੋਰ ਮਹਿੰਗਾ ਹੋਵੇਗਾ।
ਸ਼ਹਿਰੀ ਹਵਾਬਾਜ਼ੀ ਡਾਇਰੈਕਟੋਰੇਟ ਜਨਰਲ (ਡੀ. ਜੀ. ਸੀ. ਏ.) ਨੇ ਹਾਲ ਹੀ ਵਿਚ ਇਕ ਆਦੇਸ਼ ਵਿਚ ਨਵੀਆਂ ਦਰਾਂ ਨੂੰ ਨੋਟੀਫਾਈਡ ਕੀਤਾ ਸੀ। ਕੁਝ ਸ਼੍ਰੇਣੀਆਂ ਦੇ ਯਾਤਰੀਆਂ ਨੂੰ ਇਸ ਫ਼ੀਸ ਤੋਂ ਛੋਟ ਹੈ। ਇਸ ਵਿਚ ਦੋ ਸਾਲ ਤੋਂ ਘੱਟ ਉਮਰ ਦੇ ਬੱਚੇ, ਡਿਪਲੋਮੈਟਿਕ ਪਾਸਪੋਰਟਧਾਰਕ, ਡਿਊਟੀ 'ਤੇ ਤਾਇਨਾਤ ਏਅਰਲਾਈਨ ਚਾਲਕ ਦਲ ਅਤੇ 24 ਘੰਟਿਆਂ ਅੰਦਰ ਉਸੇ ਟਿਕਟ 'ਤੇ ਇਕ ਕੁਨੈਕਟਿੰਗ ਫਲਾਈਟ ਲੈਣ ਵਾਲੇ ਯਾਤਰੀ ਸ਼ਾਮਲ ਹਨ।
