Air India ਪਲੇਨ ਕ੍ਰੈਸ਼ ਨਾਲ ਬੀਮਾ ਕੰਪਨੀਆਂ ਨੂੰ ਝਟਕਾ, ਚੁੱਕਣਾ ਪੈ ਸਕਦੈ 1000 ਕਰੋੜ ਤੋਂ ਜ਼ਿਆਦਾ ਦੇ ਕਲੇਮ ਦਾ ਬੋਝ

ਨਵੀਂ ਦਿੱਲੀ - ਅਹਿਮਦਾਬਾਦ ’ਚ ਏਅਰ ਇੰਡੀਆ ਬੋਇੰਗ 787 ਡ੍ਰੀਮਲਾਈਨਰ ਹਾਦਸੇ ਤੋਂ ਬਾਅਦ ਇੰਸ਼ੋਰੈਂਸ ਕਲੇਮ ਰਾਸ਼ੀ 1,000 ਕਰੋੜ ਰੁਪਏ  ਨੂੰ ਪਾਰ ਕਰ ਗਈ ਹੈ। ਇਹ ਐਵੀਏਸ਼ਨ ਸੈਕਟਰ ’ਚ ਹੁਣ ਤੱਕ ਦਾ ਸਭ ਤੋਂ ਮਹਿੰਗਾ ਇੰਸ਼ੋਰੈਂਸ ਕਲੇਮ ਹੈ। ਇਹ ਰਾਸ਼ੀ ਪੂਰੇ ਦੇਸ਼ ਦੇ ਐਵੀਏਸ਼ਨ ਸੈਕਟਰ  ਦੇ ਕੁੱਲ ਸਾਲਾਨਾ ਪ੍ਰੀਮੀਅਮ ਨਾਲੋਂ ਵੀ ਜ਼ਿਆਦਾ  ਹੈ। 

ਦੱਸਣਯੋਗ ਹੈ ਕਿ ਏਅਰ ਇੰਡੀਆ ਦਾ ਮਾਲਿਕਾਨਾ ਹੱਕ  ਰੱਖਣ ਵਾਲੇ ਟਾਟਾ ਗਰੁੱਪ ਨੇ ਇਸ  ਜਹਾਜ਼ ਹਾਦਸੇ ’ਚ ਜਾਨ ਗੁਆਉਣ ਵਾਲੇ ਹਰ ਵਿਅਕਤੀ  ਦੇ ਪਰਿਵਾਰ ਨੂੰ 1-1 ਕਰੋੜ ਰੁਪਏ ਸਹਾਇਤਾ ਰਾਸ਼ੀ ਦੇਣ ਦਾ ਐਲਾਨ ਕੀਤਾ ਹੈ। ਹਾਦਸੇ ’ਚ  241 ਲੋਕ ਮਾਰੇ ਗਏ ਹਨ। ਅਜਿਹੇ ’ਚ ਅੰਦਾਜ਼ਾ ਲਾਇਆ ਜਾ ਰਿਹਾ ਹੈ ਕਿ ਇੰਸ਼ੋਰੈਂਸ ਕਲੇਮ 1,000 ਕਰੋੜ ਰੁਪਏ ਤੱਕ ਪਹੁੰਚ ਸਕਦਾ ਹੈ, ਜਿਸ ਦਾ ਐਵੀਏਸ਼ਨ ਇੰਸ਼ੋਰੈਂਸ  ਇੰਡਸਟਰੀ ’ਤੇ ਵੱਡਾ ਅਸਰ ਪੈ ਸਕਦਾ  ਹੈ। 

ਐਕਸਪਰਟਸ ਦਾ ਕਹਿਣਾ ਹੈ ਕਿ ਏਅਰ ਇੰਡੀਆ ਦੇ ਹਾਦਸਾਗ੍ਰਸਤ ਜਹਾਜ਼  ਦੇ ਯਾਤਰੀਆਂ ਦੇ ਵਾਰਸਾਂ ਨੂੰ ਮੁਆਵਜ਼ਾ ਮਾਂਟਰੀਅਲ ਕਨਵੈਂਸ਼ਨ 1999  ਦੇ ਤਹਿਤ ਦਿੱਤਾ ਜਾਣਾ ਚਾਹੀਦਾ ਹੈ। ਭਾਵ ਮ੍ਰਿਤਕਾਂ ਦੇ ਆਸ਼ਰਿਤਾਂ ਨੂੰ 1,28,821 ਐੱਸ. ਡੀ. ਆਰ. (ਸਪੈਸ਼ਲ ਡਰਾਇੰਗ ਰਾਈਟਸ) ਦਾ ਭੁਗਤਾਨ ਕਰਨਾ ਹੋਵੇਗਾ, ਜੋ ਮੌਜੂਦਾ ਦਰਾਂ  ਦੇ ਹਿਸਾਬ ਨਾਲ ਪ੍ਰਤੀ ਯਾਤਰੀ 1.4 ਕਰੋੜ ਰੁਪਏ ਬੈਠਦਾ ਹੈ। 

ਫਿਲਹਾਲ ਇਕ ਐੱਸ. ਡੀ. ਆਰ.  ਦੀ ਕੀਮਤ  120 ਰੁਪਏ ਹੈ, ਜੋ ਅਮਰੀਕੀ ਡਾਲਰ, ਯੂਰੋ, ਚੀਨੀ ਯੁਆਨ, ਜਾਪਾਨੀ ਯੇਨ ਅਤੇ ਬ੍ਰਿਟਿਸ਼ ਪਾਊਂਡ ਸਟਰਲਿੰਗ ਇਨ੍ਹਾਂ 5 ਕਰੰਸੀਆਂ ’ਤੇ ਆਧਾਰਤ ਹੈ। ਹਾਲਾਂਕਿ, ਅੰਤਿਮ ਭੁਗਤਾਨ ਇਸ ਗੱਲ ’ਤੇ ਨਿਰਭਰ ਕਰੇਗਾ ਕਿ ਏਅਰ ਇੰਡੀਆ ਨੇ ਆਪਣੇ ਯਾਤਰੀਆਂ ਲਈ ਕਿੰਨੀ ਬੀਮਾ ਪਾਲਿਸੀ ਲਈ ਸੀ।

ਕੀ ਹੈ ਮਾਂਟਰੀਅਲ ਕਨਵੈਂਸ਼ਨ?
ਕੁੱਲ ਮਿਲਾ ਕੇ ਮਾਂਟਰੀਅਲ ਕਨਵੈਂਸ਼ਨ ਤਹਿਤ ਹਵਾਈ ਯਾਤਰਾ ਨਾਲ ਜੁੜੇ ਵੱਖ-ਵੱਖ ਮੁੱਦਿਆਂ ਲਈ ਇਕ ਕਾਨੂੰਨੀ ਫਰੇਮਵਰਕ ਹੁੰਦਾ ਹੈ, ਜੋ ਯਾਤਰੀਆਂ ਦੇ ਹਿੱਤ ’ਚ ਹੈ। ਇਸ ਨਿਯਮ ਮੁਤਾਬਕ ਜੇ ਏਅਰਲਾਈਨ ਕਿਸੇ ਯਾਤਰੀ ਨੂੰ ਪੁੱਜੇ ਨੁਕਸਾਨ ਲਈ ਜ਼ਿੰਮੇਦਾਰ ਹੈ, ਤਾਂ ਉਨ੍ਹਾਂ ਨੂੰ  ਮੁਆਵਜ਼ੇ ਦਾ ਭੁਗਤਾਨ ਲਾਜ਼ਮੀ ਤੌਰ ’ਤੇ ਕਰਨਾ ਹੋਵੇਗਾ। 

ਭਾਰਤ ਨੇ 2009 ’ਚ ਮਾਂਟਰੀਅਲ ਕਨਵੈਂਸ਼ਨ ਨੂੰ ਅਪਣਾਇਆ ਸੀ। ਮਾਂਟਰੀਅਲ ਕਨਵੈਂਸ਼ਨ (ਇਕ  ਕੌਮਾਂਤਰੀ ਹਵਾਬਾਜ਼ੀ ਸੰਧੀ) ਤਹਿਤ ਏਅਰਲਾਈਨਾਂ ਨੂੰ ਮੌਤ ਦੇ ਮਾਮਲੇ ’ਚ ਪ੍ਰਤੀ ਯਾਤਰੀ  ਲੱਗਭਗ 1,71,000 ਡਾਲਰ (ਜਾਂ 1,28,821 ਐੱਸ. ਡੀ. ਆਰ.) ਦਾ ਮੁਆਵਜ਼ਾ ਦੇਣਾ ਜ਼ਰੂਰੀ ਹੈ।

ਕੁਝ ਐਕਸਪਰਟਸ ਦਾ ਕਹਿਣਾ ਹੈ ਕਿ ਇਹ ਪ੍ਰਤੀ  ਵਿਅਕਤੀ 2,50,000 ਡਾਲਰ ਤੱਕ ਹੋ ਸਕਦਾ ਹੈ। ਬਰੋਕਰੇਜ ਫਰਮ ਹਾਊਡੇਨ (ਇੰਡੀਆ) ਦੇ ਐੱਮ.  ਡੀ.  ਅਤੇ ਸੀ. ਈ. ਓ. ਅਮਿਤ ਅੱਗਰਵਾਲ ਨੇ ਦੱਸਿਆ, ਮੁਆਵਜ਼ੇ ਦੀ ਕੈਲਕੁਲੇਸ਼ਨ ਐੱਸ. ਡੀ. ਆਰ. ਦੇ ਵਰਤੋਂ ਨਾਲ ਕੀਤੀ ਜਾਂਦੀ ਹੈ, ਜੋ ਅਕਤੂਬਰ 2024 ਤੱਕ 1,28,821 ਐੱਸ. ਡੀ. ਆਰ. (ਲੱਗਭਗ 1.33 ਅਮਰੀਕੀ  ਡਾਲਰ ਪ੍ਰਤੀ ਐੱਸ. ਡੀ. ਆਰ.) ਸੀ। ਫਾਈਨਲ ਪੇਮੈਂਟ ਏਅਰ ਇੰਡੀਆ ਲਈ ਗਏ ਕਵਰੇਜ  ’ਤੇ ਨਿਰਭਰ ਕਰੇਗੀ।