ਵਿਸ਼ਵ ਮੁੱਕੇਬਾਜ਼ੀ ਕੱਪ : ਜਾਮਵਾਲ 65 ਕਿਲੋਗ੍ਰਾਮ ਦੇ ਫਾਈਨਲ ਵਿੱਚ ਪੁੱਜਾ

ਨਵੀਂ ਦਿੱਲੀ- ਭਾਰਤ ਦੇ ਅਭਿਨਾਸ਼ ਜਾਮਵਾਲ ਨੇ ਸ਼ਾਨਦਾਰ ਪ੍ਰਦਰਸ਼ਨ ਕਰਦੇ ਹੋਏ ਇਟਲੀ ਦੇ ਗਿਆਨਲੁਈਗੀ ਮਲੂੰਗਾ ਨੂੰ ਹਰਾ ਕੇ ਬ੍ਰਾਜ਼ੀਲ ਦੇ ਫੋਜ਼ ਦੋ ਇਗੁਆਚੂ ਸ਼ਹਿਰ ਵਿੱਚ ਚੱਲ ਰਹੇ ਵਿਸ਼ਵ ਮੁੱਕੇਬਾਜ਼ੀ ਕੱਪ ਦੇ 65 ਕਿਲੋਗ੍ਰਾਮ ਭਾਰ ਵਰਗ ਦੇ ਫਾਈਨਲ ਵਿੱਚ ਪ੍ਰਵੇਸ਼ ਕਰ ਲਿਆ। 22 ਸਾਲਾ ਭਾਰਤੀ ਮੁੱਕੇਬਾਜ਼ ਨੇ ਮਲੂੰਗਾ ਦੀ ਪਹੁੰਚ ਤੋਂ ਬਾਹਰ ਰਹਿਣ ਲਈ ਆਪਣੀ ਉਚਾਈ ਅਤੇ ਗਤੀ ਦਾ ਵਧੀਆ ਇਸਤੇਮਾਲ ਕੀਤਾ। ਉਹ 5-0 ਦੇ ਸਰਬਸੰਮਤੀ ਨਾਲ ਜਿੱਤ ਗਿਆ। 

ਪੰਜ ਵਿੱਚੋਂ ਚਾਰ ਜੱਜਾਂ ਨੇ ਜਾਮਵਾਲ ਨੂੰ ਸੰਪੂਰਨ 30 ਅੰਕ ਦਿੱਤੇ। ਜਾਮਵਾਲ ਇਸ ਮੁਕਾਬਲੇ ਦੇ ਫਾਈਨਲ ਵਿੱਚ ਪਹੁੰਚਣ ਵਾਲਾ ਦੂਜਾ ਭਾਰਤੀ ਖਿਡਾਰੀ ਹੈ। ਉਸ ਤੋਂ ਪਹਿਲਾਂ, ਵੀਰਵਾਰ ਨੂੰ, ਹਿਤੇਸ਼ 70 ਕਿਲੋਗ੍ਰਾਮ ਵਰਗ ਵਿੱਚ ਫ੍ਰੈਂਚ ਓਲੰਪੀਅਨ ਮਾਕਨ ਟਰਾਓਰ ਨੂੰ ਹਰਾ ਕੇ ਫਾਈਨਲ ਵਿੱਚ ਪਹੁੰਚਣ ਵਾਲਾ ਪਹਿਲਾ ਭਾਰਤੀ ਬਣਿਆ। ਫਾਈਨਲ ਵਿੱਚ ਹਿਤੇਸ਼ ਦਾ ਸਾਹਮਣਾ ਇੰਗਲੈਂਡ ਦੇ ਓਡੇਲ ਕਮਾਰਾ ਨਾਲ ਹੋਵੇਗਾ ਜਦੋਂ ਕਿ ਜਾਮਵਾਲ ਦਾ ਸਾਹਮਣਾ ਸਥਾਨਕ ਖਿਡਾਰੀ ਯੂਰੀ ਰੀਸ ਨਾਲ ਹੋਵੇਗਾ। ਇੱਕ ਹੋਰ ਭਾਰਤੀ ਮੁੱਕੇਬਾਜ਼ ਮਨੀਸ਼ ਰਾਠੌਰ ਦੀ 55 ਕਿਲੋਗ੍ਰਾਮ ਭਾਰ ਵਰਗ ਵਿੱਚ ਮੁਹਿੰਮ ਸੈਮੀਫਾਈਨਲ ਵਿੱਚ ਖਤਮ ਹੋ ਗਈ। ਉਹ ਕਜ਼ਾਖਸਤਾਨ ਦੇ ਨੂਰਸੁਲਤਾਨ ਅਲਤਿਨਬੇਕ ਤੋਂ 0-5 ਨਾਲ ਹਾਰ ਗਿਆ।