ਇਤਿਹਾਸਕ ਹਾਰ ਮਗਰੋਂ ਫੁੱਟਿਆ ਟੈਨਿਸ ਸਟਾਰ ਦਾ ਗੁੱਸਾ ! 7 ਵਾਰ ਜ਼ਮੀਨ 'ਤੇ ਮਾਰ ਟੋਟੇ-ਟੋਟੇ ਕਰ'ਤਾ ਰੈਕੇਟ

ਮੋਨਾਕੋ : ਟੈਨਿਸ ਕੋਰਟ 'ਤੇ ਆਪਣੀ ਖੇਡ ਦੇ ਨਾਲ-ਨਾਲ ਆਪਣੇ ਗੁੱਸੇ ਲਈ ਜਾਣੇ ਜਾਣ ਵਾਲੇ ਰੂਸੀ ਟੈਨਿਸ ਸਟਾਰ ਦਾਨਿਲ ਮੇਦਵੇਦੇਵ ਨੇ ਮੋਂਟੇ ਕਾਰਲੋ ਮਾਸਟਰਜ਼ ਵਿੱਚ ਗੁੱਸੇ ਦੀਆਂ ਸਾਰੀਆਂ ਹੱਦਾਂ ਪਾਰ ਕਰ ਦਿੱਤੀਆਂ। ਇਟਲੀ ਦੇ ਮੈਟਿਓ ਬੇਰੇਟਿਨੀ ਵਿਰੁੱਧ ਖੇਡੇ ਗਏ ਮੁਕਾਬਲੇ ਵਿੱਚ ਮੇਦਵੇਦੇਵ ਨੂੰ ਆਪਣੇ ਕਰੀਅਰ ਦੀ ਸਭ ਤੋਂ ਸ਼ਰਮਨਾਕ ਹਾਰ ਦਾ ਸਾਹਮਣਾ ਕਰਨਾ ਪਿਆ, ਜਿੱਥੇ ਉਨ੍ਹਾਂ ਨੂੰ 6-0, 6-0 ਨਾਲ 'ਵਾਈਟਵਾਸ਼' ਹਾਰ ਮਿਲੀ।

40 ਸਕਿੰਟਾਂ ਦਾ ਹੰਗਾਮਾ
ਮੈਚ ਦੇ ਦੂਜੇ ਸੈੱਟ ਦੀ ਸ਼ੁਰੂਆਤ ਵਿੱਚ ਜਦੋਂ ਮੇਦਵੇਦੇਵ ਦੀ ਸਰਵਿਸ ਫਿਰ ਤੋਂ ਟੁੱਟ ਗਈ ਅਤੇ ਸਕੋਰ 0-2 ਹੋ ਗਿਆ, ਤਾਂ ਉਨ੍ਹਾਂ ਦਾ ਗੁੱਸਾ ਫੁੱਟ ਪਿਆ। ਮੇਦਵੇਦੇਵ ਨੇ ਸਿਰਫ਼ 40 ਸਕਿੰਟਾਂ ਦੇ ਅੰਦਰ 7 ਵਾਰ ਆਪਣਾ ਰੈਕੇਟ ਕੋਰਟ 'ਤੇ ਪਟਕਿਆ। ਉਨ੍ਹਾਂ ਨੇ ਪਹਿਲਾਂ ਰੈਕੇਟ ਨੂੰ ਕੋਰਟ 'ਤੇ ਮਾਰਿਆ, ਫਿਰ ਉਸ ਨੂੰ ਗੁੱਸੇ ਵਿੱਚ ਸੁੱਟਿਆ, ਚਾਰ ਵਾਰ ਉਛਾਲਿਆ ਅਤੇ ਅੰਤ ਵਿੱਚ ਖਿਡਾਰੀਆਂ ਦੇ ਬੈਂਚ ਕੋਲ ਸੱਤਵੀਂ ਵਾਰ ਜ਼ੋਰ ਨਾਲ ਪਟਕ ਕੇ ਰੈਕੇਟ ਦੇ ਟੋਟੇ-ਟੋਟੇ ਕਰ ਦਿੱਤੇ। ਇਸ ਪੂਰੇ ਘਟਨਾਕ੍ਰਮ ਦੌਰਾਨ ਦਰਸ਼ਕਾਂ ਨੇ ਜ਼ੋਰਦਾਰ ਹੂਟਿੰਗ ਕੀਤੀ।

ਅੰਪਾਇਰ ਨੇ ਦਿੱਤੀ ਚੇਤਾਵਨੀ
ਮੇਦਵੇਦੇਵ ਦੇ ਇਸ ਵਤੀਰੇ 'ਤੇ ਕਾਰਵਾਈ ਕਰਦਿਆਂ ਅੰਪਾਇਰ ਨੇ ਉਨ੍ਹਾਂ ਨੂੰ 'ਗੈਰ-ਖੇਡ ਵਿਵਹਾਰ' (Unsportsmanlike Conduct) ਲਈ ਚੇਤਾਵਨੀ ਦਿੱਤੀ। ਸਕਾਈ ਸਪੋਰਟਸ ਦੇ ਕਮੈਂਟੇਟਰ ਨੇ ਮਜ਼ਾਕ ਵਿੱਚ ਕਿਹਾ ਕਿ ਇਹ ਰੈਕੇਟ ਹੁਣ ਵਰਤਣ ਦੇ ਲਾਇਕ ਨਹੀਂ ਰਿਹਾ। ਸਾਬਕਾ ਬ੍ਰਿਟਿਸ਼ ਸਟਾਰ ਜੈਮੀ ਮਰੇ ਨੇ ਵੀ ਇਸ 'ਤੇ ਹੈਰਾਨੀ ਜਤਾਈ ਅਤੇ ਕਿਹਾ ਕਿ ਅਜਿਹਾ ਨਹੀਂ ਹੋਣਾ ਚਾਹੀਦਾ ਸੀ।

ਕਰੀਅਰ ਦੀ ਪਹਿਲੀ ਅਜਿਹੀ ਹਾਰ
ਇਹ ਦਾਨਿਲ ਮੇਦਵੇਦੇਵ ਦੇ ਕਰੀਅਰ ਦੀ ਪਹਿਲੀ ਹਾਰ ਹੈ ਜਿੱਥੇ ਉਹ ਇਕ ਵੀ ਸੈੱਟ ਜਾਂ ਗੇਮ ਨਹੀਂ ਜਿੱਤ ਸਕੇ। ਮੇਦਵੇਦੇਵ ਦਾ ਕਲੇਅ ਕੋਰਟ (Clay Court) ਪ੍ਰਤੀ ਨਫ਼ਰਤ ਅਤੇ ਉਨ੍ਹਾਂ ਦਾ ਗੁੱਸਾ ਕੋਈ ਨਵੀਂ ਗੱਲ ਨਹੀਂ ਹੈ; ਇਸ ਤੋਂ ਪਹਿਲਾਂ ਉਹ US Open 2025 ਵਿੱਚ ਵੀ ਅੰਪਾਇਰ ਨਾਲ ਤਿੱਖੀ ਬਹਿਸ ਕਾਰਨ ਸੁਰਖੀਆਂ ਵਿੱਚ ਰਹੇ ਸਨ।