ਦੇਸ਼ ਤੋਂ ਬਾਹਰ ਪਹਿਲੀਆਂ ''ਖੇਲੋ ਇੰਡੀਆ'' ਖੇਡਾਂ ਦਾ ਦੱਖਣੀ ਅਫ਼ਰੀਕਾ ''ਚ ਸਫ਼ਲਤਾਪੂਰਵਕ ਆਯੋਜਨ

ਜੋਹਾਨਸਬਰਗ- 'ਖੇਲੋ ਇੰਡੀਆ' ਖੇਡਾਂ ਦਾ ਦੇਸ਼ ਤੋਂ ਬਾਹਰ ਪਹਿਲੀ ਵਾਰ ਦੱਖਣੀ ਅਫਰੀਕਾ ਵਿਚ ਸਫਲਤਾਪੂਰਵਕ ਆਯੋਜਨ ਕੀਤਾ ਗਿਆ, ਜਿਸ ਵਿਚ ਦੱਖਣੀ ਅਫਰੀਕਾ ਦੇ ਸਥਾਨਕ ਨਿਵਾਸੀ ਅਤੇ ਭਾਰਤੀ ਪ੍ਰਵਾਸੀਆਂ ਨੇ ਵਾਲੀਬਾਲ, ਬੈਡਮਿੰਟਨ, ਟੇਬਲ ਟੈਨਿਸ ਅਤੇ ਸ਼ਤਰੰਜ ਵਰਗੀਆਂ ਖੇਡਾਂ ਵਿਚ ਭਾਗ ਲਿਆ। ਦੱਖਣੀ ਅਫ਼ਰੀਕਾ 'ਚ ਵਸੇ ਪ੍ਰਵਾਸੀ ਭਾਰਤੀਆਂ ਦੀ ਸੰਸਥਾ 'ਇੰਡੀਆ ਕਲੱਬ' ਦੇ ਪ੍ਰਧਾਨ ਮਨੀਸ਼ ਗੁਪਤਾ ਨੇ ਸੋਮਵਾਰ ਨੂੰ ਦੱਸਿਆ ਕਿ ਚਾਰ ਪਰੰਪਰਾਗਤ ਭਾਰਤੀ ਖੇਡਾਂ ਜਿਵੇਂ ਕਬੱਡੀ, ਖੋ-ਖੋ, ਕੈਰਮ ਅਤੇ ਸਤੋਲੀਆ (ਲਗੋਰੀ) ਟੂਰਨਾਮੈਂਟ ਦੇ ਦੂਜੇ ਪੜਾਅ ਦਾ ਹਿੱਸਾ ਹੋਣਗੀਆਂ। 
'ਇੰਡੀਆ ਕਲੱਬ' ਨੇ ਜੋਹਾਨਸਬਰਗ ਵਿੱਚ ਭਾਰਤ ਦੇ ਕੌਂਸਲੇਟ ਜਨਰਲ ਨਾਲ ਸਮਾਗਮਾਂ ਦੀ ਸਹਿ-ਮੇਜ਼ਬਾਨੀ ਕੀਤੀ। ਗੁਪਤਾ ਨੇ ਕਿਹਾ, "ਅਸੀਂ 'ਖੇਲੋ ਇੰਡੀਆ' ਦੇ ਆਯੋਜਨ ਵਿੱਚ ਸਹਾਇਤਾ ਲਈ ਕੌਂਸਲ ਜਨਰਲ ਮਹੇਸ਼ ਕੁਮਾਰ ਦੀ ਬੇਨਤੀ ਨੂੰ ਖੁਸ਼ੀ ਨਾਲ ਸਵੀਕਾਰ ਕੀਤਾ। ਸਾਡੇ ਕਾਰਜਕਾਰੀ ਮੈਂਬਰਾਂ ਨੇ ਦੱਖਣੀ ਅਫ਼ਰੀਕਾ ਵਿੱਚ ਕਈ ਭਾਰਤੀ ਡਾਇਸਪੋਰਾ ਸੰਸਥਾਵਾਂ ਨੂੰ ਜੋੜਿਆ, ਜੋ ਇਸ ਸਮਾਗਮ ਦਾ ਹਿੱਸਾ ਬਣੀਆਂ।”
ਕੁਮਾਰ ਨੇ ਕਿਹਾ ਕਿ 'ਖੇਲੋ ਇੰਡੀਆ' ਪ੍ਰੋਗਰਾਮ ਭਾਰਤ ਸਰਕਾਰ ਵੱਲੋਂ 2017 ਵਿੱਚ ਸ਼ੁਰੂ ਕੀਤਾ ਗਿਆ ਸੀ। ਇਹ ਭਾਰਤ ਵਿੱਚ ਖੇਡਾਂ ਦੇ ਵਿਕਾਸ ਨੂੰ ਸਮਰਪਿਤ ਹੈ। ਉਨ੍ਹਾਂ ਨੇ ਕਿਹਾ ਕਿ “ਅਸੀਂ ਇਸ ਨੂੰ ਰਾਸ਼ਟਰੀ ਸੀਮਾਵਾਂ ਤੋਂ ਪਾਰ ਲਿਜਾਣਾ ਚਾਹੁੰਦੇ ਹਾਂ ਕਿਉਂਕਿ ਖੇਡਾਂ ਲੋਕਾਂ ਨੂੰ ਏਕਤਾ ਦਿੰਦੀਆਂ ਹਨ ਜਿਵੇਂ ਕਿ ਹੋਰ ਕੁਝ ਨਹੀਂ। ਉਨ੍ਹਾਂ ਨੇ ਕਿਹਾ, “ਦੱਖਣੀ ਅਫ਼ਰੀਕਾ ਵਿੱਚ ਵਿਦੇਸ਼ ਵਿੱਚ ਪਹਿਲੇ ਖੇਲੋ ਇੰਡੀਆ ਦੀ ਮੇਜ਼ਬਾਨੀ ਕਰਨਾ ਉਸ ਵਿਸ਼ੇਸ਼ ਰਿਸ਼ਤੇ ਨੂੰ ਉਜਾਗਰ ਕਰਦਾ ਹੈ ਜੋ ਇਨ੍ਹਾਂ ਦੋਵਾਂ ਦੇਸ਼ਾਂ ਨੇ ਹਮੇਸ਼ਾ ਸਾਂਝੇ ਕੀਤੇ ਹਨ। ਪ੍ਰਵਾਸੀ ਭਾਰਤੀਆਂ ਦੇ ਨਾਲ-ਨਾਲ ਸਥਾਨਕ ਲੋਕਾਂ ਦੀ ਵੀ ਚੰਗੀ ਸ਼ਮੂਲੀਅਤ ਰਹੀ। ਉਨ੍ਹਾਂ ਨੇ ਆਸ ਪ੍ਰਗਟਾਈ ਕਿ ਹੋਰ ਦੇਸ਼ ਵੀ ਇਸ ਉਪਰਾਲੇ ਦੀ ਪਾਲਣਾ ਕਰਨਗੇ।