ਨਿਊਜ਼ੀਲੈਂਡ ਖ਼ਿਲਾਫ਼ ਵਨਡੇ ਲੜੀ ਤੋਂ ਪਹਿਲਾਂ ਸੁਭਮਨ ਗਿੱਲ ਨੇ ਕੀਤਾ ਨੈੱਟ ਅਭਿਆਸ

ਆਕਲੈਂਡ : ਭਾਰਤ ਦੇ ਟੈਸਟ ਅਤੇ ਵਨਡੇ (ODI) ਕਪਤਾਨ ਸੁਭਮਨ ਗਿੱਲ ਨੇ ਨਿਊਜ਼ੀਲੈਂਡ ਖ਼ਿਲਾਫ਼ 4 ਨਵੰਬਰ ਤੋਂ ਈਡਨ ਪਾਰਕ ਵਿਖੇ ਸ਼ੁਰੂ ਹੋ ਰਹੀ ਪੰਜ ਮੈਚਾਂ ਦੀ ਵਨਡੇ ਲੜੀ ਤੋਂ ਪਹਿਲਾਂ ਆਕਲੈਂਡ ਵਿਖੇ ਨੈੱਟ ਅਭਿਆਸ ਕੀਤਾ। ਅਭਿਆਸ ਸੈਸ਼ਨ ਦੌਰਾਨ ਗਿੱਲ ਨੇ ਆਪਣੀ ਫਿਟਨੈੱਸ 'ਤੇ ਨਜ਼ਰ ਰੱਖਣ ਵਾਲਾ ਯੰਤਰ 'ਟੈਂਪਲ' ਆਪਣੇ ਮੱਥੇ 'ਤੇ ਪਹਿਨਿਆ ਹੋਇਆ ਸੀ। ਵਨਡੇ ਲੜੀ ਲਈ ਵਿਕਟਕੀਪਰ-ਬੱਲੇਬਾਜ਼ ਕੇ.ਐੱਲ. ਰਾਹੁਲ ਅਤੇ ਤੇਜ਼ ਗੇਂਦਬਾਜ਼ ਗੁਰਨੂਰ ਬਰਾਰ ਵੀ ਭਾਰਤੀ ਟੀਮ ਨਾਲ ਜੁੜ ਗਏ ਹਨ। ਇਸ ਲੜੀ ਵਿੱਚ ਭਾਰਤ ਦੇ ਸੀਨੀਅਰ ਬੱਲੇਬਾਜ਼ ਵਿਰਾਟ ਕੋਹਲੀ ਅਤੇ ਰੋਹਿਤ ਸ਼ਰਮਾ ਵੀ ਖੇਡਦੇ ਨਜ਼ਰ ਆਉਣਗੇ।

ਅਭਿਆਸ ਦੌਰਾਨ ਗਿੱਲ ਆਪਣੇ ਕਰੀਬੀ ਦੋਸਤ ਅਤੇ ਟੀ-20 ਟੀਮ ਦੇ ਸਲਾਮੀ ਬੱਲੇਬਾਜ਼ ਅਭਿਸ਼ੇਕ ਸ਼ਰਮਾ ਨਾਲ ਗੱਲਬਾਤ ਕਰਦੇ ਦਿਖਾਈ ਦਿੱਤੇ। ਅਭਿਸ਼ੇਕ ਨੇ ਨਿਊਜ਼ੀਲੈਂਡ ਖ਼ਿਲਾਫ਼ ਤੀਜੇ ਟੀ-20 ਮੈਚ ਵਿੱਚ 38 ਗੇਂਦਾਂ 'ਚ 113 ਦੌੜਾਂ ਬਣਾਈਆਂ ਸਨ, ਅਤੇ ਭਾਰਤ ਪੰਜ ਮੈਚਾਂ ਦੀ ਲੜੀ ਵਿੱਚ 3-0 ਨਾਲ ਅੱਗੇ ਚੱਲ ਰਿਹਾ ਹੈ। ਗ੍ਰੋਇਨ ਦੀ ਸੱਟ ਤੋਂ ਉੱਬਰ ਚੁੱਕੇ ਈਸ਼ਾਨ ਕਿਸ਼ਨ ਅਤੇ ਕੇ.ਐੱਲ. ਰਾਹੁਲ ਨੇ ਵੀ ਬੱਲੇਬਾਜ਼ੀ ਦਾ ਅਭਿਆਸ ਕੀਤਾ। ਭਾਰਤੀ ਕਪਤਾਨ ਨੇ ਬੱਲੇਬਾਜ਼ੀ ਕੋਚ ਸਿਤਾਂਸ਼ੂ ਕੋਟਕ ਨਾਲ ਵੀ ਚਰਚਾ ਕੀਤੀ। ਵਨਡੇ ਲੜੀ ਖ਼ਤਮ ਹੋਣ ਤੋਂ ਬਾਅਦ 19 ਨਵੰਬਰ ਤੋਂ ਸ਼ੁਰੂ ਹੋਣ ਵਾਲੀ ਦੋ ਟੈਸਟ ਮੈਚਾਂ ਦੀ ਲੜੀ ਵਿੱਚ ਵੀ ਸੁਭਮਨ ਗਿੱਲ ਹੀ ਭਾਰਤੀ ਟੀਮ ਦੀ ਕਪਤਾਨੀ ਸੰਭਾਲਣਗੇ।