ਪ੍ਰਾਈਮ ਵਾਲੀਬਾਲ ਲੀਗ 4 ਫਰਵਰੀ ਤੋਂ ਹੋਵੇਗੀ ਸ਼ੁਰੂ

ਨਵੀਂ ਦਿੱਲੀ : ਦੇਸ਼ ਦੇ ਚੋਟੀ ਦੇ ਵਾਲੀਬਾਲ ਖਿਡਾਰੀਆਂ ਨੂੰ 4 ਫਰਵਰੀ ਤੋਂ ਸ਼ੁਰੂ ਹੋ ਰਹੀ ਰੂਪੇ ਪ੍ਰਾਈਮ ਵਾਲੀਬਾਲ ਲੀਗ ਦੇ ਦੂਜੇ ਸੀਜ਼ਨ ਵਿੱਚ ਆਪਣੇ ਹੁਨਰ ਦਾ ਪ੍ਰਦਰਸ਼ਨ ਕਰਨ ਦਾ ਮੌਕਾ ਮਿਲੇਗਾ। ਲੀਗ ਤਿੰਨ ਸ਼ਹਿਰਾਂ ਬੈਂਗਲੁਰੂ, ਹੈਦਰਾਬਾਦ ਅਤੇ ਕੋਚੀ ਵਿੱਚ ਕਰਵਾਈ ਜਾਵੇਗੀ।

ਸਾਰੀਆਂ ਅੱਠ ਫ੍ਰੈਂਚਾਈਜ਼ੀਜ਼ - ਕਾਲੀਕਟ ਹੀਰੋਜ਼, ਕੋਚੀ ਬਲੂ ਸਪਾਈਕਰਜ਼, ਅਹਿਮਦਾਬਾਦ ਡਿਫੈਂਡਰਜ਼, ਹੈਦਰਾਬਾਦ ਬਲੈਕ ਹਾਕਸ, ਚੇਨਈ ਬਲਿਟਜ਼, ਬੈਂਗਲੁਰੂ ਟਾਰਪੀਡੋਜ਼, ਮੁੰਬਈ ਮੀਟੀਅਰਜ਼ ਅਤੇ ਕੋਲਕਾਤਾ ਥੰਡਰਬੋਲਟਸ ਰਾਊਂਡ ਰੌਬਿਨ ਲੀਗ ਖੇਡਣਗੀਆਂ ਜਿਸ ਤੋਂ ਬਾਅਦ ਚੋਟੀ ਦੀਆਂ ਚਾਰ ਟੀਮਾਂ ਸੈਮੀਫਾਈਨਲ ਲਈ ਕੁਆਲੀਫਾਈ ਕਰਨਗੀਆਂ।

ਪ੍ਰਬੰਧਕਾਂ ਨੇ ਜਾਰੀ ਬਿਆਨ ਵਿੱਚ ਕਿਹਾ ਕਿ ਫਾਈਨਲ ਕੋਚੀ ਵਿੱਚ ਖੇਡਿਆ ਜਾਵੇਗਾ। 31 ਮੈਚਾਂ ਦੇ ਦੂਜੇ ਸੀਜ਼ਨ ਦਾ ਸਿੱਧਾ ਪ੍ਰਸਾਰਣ ਸੋਨੀ ਸਪੋਰਟਸ ਨੈੱਟਵਰਕ 'ਤੇ ਕੀਤਾ ਜਾਵੇਗਾ।