ਐਮਬਾਪੇ ਨੇ ਫਿਰ ਦਾਗਿਆ ਗੋਲ, ਰਿਆਲ ਮੈਡਰਿਡ ਨੂੰ ਦਿਵਾਈ ਇਕ ਹੋਰ ਜਿੱਤ

ਮੈਡ੍ਰਿਡ : ਕਾਇਲੀਅਨ ਐਮਬਾਪੇ ਨੇ ਆਪਣੇ ਸ਼ਾਨਦਾਰ ਪ੍ਰਦਰਸ਼ਨ ਨੂੰ ਜਾਰੀ ਰੱਖਦੇ ਹੋਏ ਪਿਛਲੇ ਪੰਜ ਮੈਚਾਂ ਵਿੱਚ ਛੇਵਾਂ ਗੋਲ ਕੀਤਾ ਜਿਸ ਨਾਲ ਰਿਆਲ ਮੈਡਰਿਡ ਨੇ ਸਪੈਨਿਸ਼ ਫੁੱਟਬਾਲ ਲੀਗ ਲਾ ਲੀਗਾ ਵਿੱਚ ਅਲਾਵੇਸ ਨੂੰ 3-2 ਨਾਲ ਹਰਾਇਆ। ਐਮਬਾਪੇ ਨੂੰ ਖੇਡ ਦੇ 40ਵੇਂ ਮਿੰਟ ਵਿੱਚ ਬਾਕਸ ਦੇ ਅੰਦਰ ਗੇਂਦ ਮਿਲੀ ਅਤੇ ਉਨ੍ਹਾਂ ਨੇ ਇੱਕ ਡਿਫੈਂਡਰ ਨੂੰ ਚਕਮਾ ਦੇਣ ਤੋਂ ਬਾਅਦ ਬਹੁਤ ਖੂਬਸੂਰਤੀ ਨਾਲ ਉਸ ਨੂੰ ਗੋਲ ਵਿੱਚ ਬਦਲ ਦਿੱਤਾ।
ਐਮਬਾਪੇ ਨੂੰ ਮਾਸਪੇਸ਼ੀਆਂ ਵਿੱਚ ਖਿਚਾਅ ਕਾਰਨ 80ਵੇਂ ਮਿੰਟ ਵਿੱਚ ਮੈਦਾਨ ਛੱਡਣਾ ਪਿਆ। ਮੈਡ੍ਰਿਡ ਲਈ ਲੁਕਾਸ ਵਾਜ਼ਕੁਏਜ਼ ਅਤੇ ਰੋਡਰਿਗੋ ਨੇ ਵੀ ਗੋਲ ਕੀਤੇ। ਇਸ ਦੇ ਨਾਲ ਮੈਡਰਿਡ ਨੇ ਸਪੈਨਿਸ਼ ਲੀਗ ਵਿੱਚ ਆਪਣੀ ਅਜੇਤੂ ਮੁਹਿੰਮ ਨੂੰ 39 ਮੈਚਾਂ ਤੱਕ ਪਹੁੰਚਾ ਦਿੱਤਾ ਹੈ। ਇਸ ਵਿੱਚ ਪਿਛਲੇ ਸੀਜ਼ਨ ਦੀਆਂ 29 ਜਿੱਤਾਂ ਅਤੇ 10 ਡਰਾਅ ਵੀ ਸ਼ਾਮਲ ਹਨ।
ਅਲਾਵੇਸ ਨੇ 85ਵੇਂ ਮਿੰਟ 'ਚ ਕਾਰਲੋਸ ਬੇਨਾਵਿਡੇਜ਼ ਅਤੇ 86ਵੇਂ ਮਿੰਟ 'ਚ ਕੀਕੇ ਗਾਰਸੀਆ ਦੇ ਗੋਲਾਂ ਦੀ ਮਦਦ ਨਾਲ ਵਾਪਸੀ ਦਾ ਚੰਗਾ ਯਤਨ ਕੀਤਾ ਪਰ ਆਖਰੀ ਪਲਾਂ 'ਚ ਕੁਝ ਚੰਗੇ ਮੌਕੇ ਮਿਲਣ ਦੇ ਬਾਵਜੂਦ ਉਹ ਬਰਾਬਰੀ ਨਹੀਂ ਕਰ ਸਕੇ। ਐਮਬਾਪੇ ਨੇ ਹੁਣ ਮੈਡਰਿਡ ਦੇ ਨਾਲ ਸਾਰੇ ਮੁਕਾਬਲਿਆਂ ਵਿੱਚ ਨੌਂ ਮੈਚਾਂ ਵਿੱਚ ਸੱਤ ਗੋਲ ਕੀਤੇ ਹਨ। ਸਪੈਨਿਸ਼ ਲੀਗ ਵਿੱਚ ਉਨ੍ਹਾਂ ਦੇ ਨਾਂ ਪੰਜ ਗੋਲ ਹਨ ਅਤੇ ਉਹ ਬਾਰਸੀਲੋਨਾ ਦੇ ਰੌਬਰਟ ਲੇਵਾਂਡੋਵਸਕੀ ਤੋਂ ਇੱਕ ਗੋਲ ਪਿੱਛੇ ਹਨ।