ਮੁਹੰਮਦ ਸਿਰਾਜ ਨੂੰ ਵੀ ਮਿਲਣਾ ਚਾਹੀਦਾ ਸੀ 'ਮੈਨ ਆਫ ਦਿ ਸੀਰੀਜ਼', ਜਾਣੋ ਗੰਭੀਰ ਨੇ ਕਿਉਂ ਦਿੱਤਾ ਇਹ ਬਿਆਨ

ਸਪੋਰਟਸ ਡੈਸਕ- ਭਾਰਤੀ ਬੱਲੇਬਾਜ਼ ਵਿਰਾਟ ਕੋਹਲੀ ਨੂੰ ਸ਼੍ਰੀਲੰਕਾ ਦੇ ਖ਼ਿਲਾਫ਼ ਵਨਡੇ ਸੀਰੀਜ਼ 'ਚ ਸ਼ਾਨਦਾਰ ਪ੍ਰਦਰਸ਼ਨ ਲਈ ਇਨਾਮ ਦਿੱਤਾ ਗਿਆ ਅਤੇ ਉਹ ਮੈਨ ਆਫ ਦਿ ਸੀਰੀਜ਼ ਚੁਣਿਆ ਗਿਆ। ਸਾਬਕਾ ਕ੍ਰਿਕਟਰ ਗੌਤਮ ਗੰਭੀਰ ਦਾ ਮੰਨਣਾ ਹੈ ਕਿ ਸ਼੍ਰੀਲੰਕਾ ਖ਼ਿਲਾਫ਼ ਵਨਡੇ ਸੀਰੀਜ਼ 'ਚ ਸਭ ਤੋਂ ਜ਼ਿਆਦਾ ਵਿਕਟਾਂ ਲੈਣ ਵਾਲੇ ਤੇਜ਼ ਗੇਂਦਬਾਜ਼ ਮੁਹੰਮਦ ਸਿਰਾਜ ਨੂੰ ਵੀ ਵਿਰਾਟ ਕੋਹਲੀ ਦੇ ਨਾਲ ਸੰਯੁਕਤ 'ਮੈਨ ਆਫ ਦਿ ਸੀਰੀਜ਼' ਚੁਣਿਆ ਜਾਣਾ ਚਾਹੀਦਾ ਸੀ।

ਭਾਰਤ ਨੇ ਐਤਵਾਰ ਨੂੰ ਤੀਜੇ ਅਤੇ ਆਖ਼ਰੀ ਵਨਡੇ ਵਿੱਚ ਸ਼੍ਰੀਲੰਕਾ ਖ਼ਿਲਾਫ਼ 317 ਦੌੜਾਂ ਦੀ ਸ਼ਾਨਦਾਰ ਜਿੱਤ ਦਰਜ ਕੀਤੀ, ਜਿਸ ਵਿੱਚ ਸਿਰਾਜ ਨੇ 4 ਵਿਕਟਾਂ ਲਈਆਂ ਸਨ। ਇਸ ਤੋਂ ਪਹਿਲਾਂ ਸਿਰਾਜ ਨੇ ਗੁਹਾਟੀ ਵਿੱਚ ਪਹਿਲੇ ਵਨਡੇ ਵਿੱਚ 2 ਵਿਕਟਾਂ ਅਤੇ ਕੋਲਕਾਤਾ ਵਿੱਚ ਦੂਜੇ ਮੈਚ ਵਿੱਚ 3 ਵਿਕਟਾਂ ਲਈਆਂ ਸਨ। ਗੰਭੀਰ ਨੇ ਕਿਹਾ, 'ਉਹ ਵਿਰਾਟ ਕੋਹਲੀ ਦੇ ਬਰਾਬਰ ਸੀ। ਉਨ੍ਹਾਂ ਨੂੰ ਸੰਯੁਕਤ ਮੈਨ ਆਫ ਦਿ ਸੀਰੀਜ਼ ਹੋਣਾ ਚਾਹੀਦਾ ਹੈ। ਉਹ ਬੇਮਿਸਾਲ ਸੀ ਅਤੇ ਨਿਰਪੱਖ ਬੱਲੇਬਾਜ਼ੀ ਵਿਕਟਾਂ 'ਤੇ ਉਸ ਦਾ ਜਾਦੂ ਚੱਲਿਆ। ਮੈਂ ਜਾਣਦਾ ਹਾਂ ਕਿ ਤੁਸੀਂ ਹਮੇਸ਼ਾ ਬੱਲੇਬਾਜ਼ਾਂ ਨੂੰ ਸੀਰੀਜ਼ ਦੇ ਸਰਵੋਤਮ ਖਿਡਾਰੀ ਦਾ ਪੁਰਸਕਾਰ ਦੇਣ ਲਈ ਲਲਚਾਉਂਦੇ ਹੋ, ਪਰ ਸਿਰਾਜ ਬੇਮਿਸਾਲ ਸੀ ਅਤੇ ਹਰ ਮੈਚ 'ਚ ਉਹ ਟੋਨ ਸੈੱਟ ਕਰਨ ਦੇ ਯੋਗ ਸੀ। ਉਹ ਭਵਿੱਖ ਦਾ ਖਿਡਾਰੀ ਹੈ ਅਤੇ ਹਰ ਸੀਰੀਜ਼ ਨਾਲ ਬਿਹਤਰ ਹੋ ਰਿਹਾ ਹੈ।

ਜ਼ਿਕਰਯੋਗ ਹੈ ਕਿ ਕੋਹਲੀ ਨੇ ਆਖ਼ਰੀ ਵਨਡੇ ਮੈਚ 'ਚ ਆਪਣੀ ਵਧੀਆ ਫਾਰਮ ਨੂੰ ਜਾਰੀ ਰੱਖਿਆ ਅਤੇ 110 ਗੇਂਦਾਂ 'ਤੇ ਅਜੇਤੂ 166 ਦੌੜਾਂ ਬਣਾਈਆਂ। ਇਹ ਉਸ ਦਾ ਘਰੇਲੂ ਮੈਦਾਨ 'ਤੇ 46ਵਾਂ ਵਨਡੇ ਸੈਂਕੜਾ ਅਤੇ 21ਵਾਂ ਘਰੇਲੂ ਸੈਂਕੜਾ ਸੀ। ਕੋਹਲੀ ਦੋ ਸੈਂਕੜਿਆਂ ਦੀ ਮਦਦ ਨਾਲ ਸੀਰੀਜ਼ ਵਿਚ 141.50 ਦੀ ਔਸਤ ਨਾਲ 283 ਦੌੜਾਂ ਬਣਾ ਕੇ ਸੀਰੀਜ਼ ਵਿਚ ਸਭ ਤੋਂ ਵੱਧ ਦੌੜਾਂ ਬਣਾਉਣ ਵਾਲਾ ਬੱਲੇਬਾਜ਼ ਵੀ ਰਿਹਾ।