ਆਈਐੱਸਐੱਲ 2026-27 ਦਾ ਆਗਾਜ਼ 10 ਅਕਤੂਬਰ ਤੋਂ;  ''ਹੋਮ-ਐਂਡ-ਅਵੇ'' ਫਾਰਮੈਟ ਦੀ ਹੋਵੇਗੀ ਵਾਪਸੀ

ਨਵੀਂ ਦਿੱਲੀ : ਆਯੋਜਕਾਂ ਨੇ ਐਲਾਨ ਕੀਤਾ ਹੈ ਕਿ ਇੰਡੀਅਨ ਸੁਪਰ ਲੀਗ (ISL) 2026-27 ਦਾ ਨਵਾਂ ਸੀਜ਼ਨ 10 ਅਕਤੂਬਰ ਤੋਂ ਸ਼ੁਰੂ ਹੋਵੇਗਾ ਅਤੇ ਅਗਲੇ ਸਾਲ ਮਈ ਤੱਕ ਚੱਲੇਗਾ। ਸਾਲ 2014 ਵਿੱਚ ਸ਼ੁਰੂ ਹੋਈ ਫਰੈਂਚਾਈਜ਼ੀ-ਆਧਾਰਿਤ ਇੰਡੀਅਨ ਸੁਪਰ ਲੀਗ ਦਾ ਇਹ 13ਵਾਂ ਐਡੀਸ਼ਨ ਹੋਵੇਗਾ, ਜੋ ਕਿ 2019-20 ਦੇ ਸੀਜ਼ਨ ਤੋਂ ਦੇਸ਼ ਦਾ ਪ੍ਰਮੁੱਖ ਫੁੱਟਬਾਲ ਮੁਕਾਬਲਾ ਰਿਹਾ ਹੈ।

ਨਵਾਂ ਆਈਐੱਸਐੱਲ ਸੀਜ਼ਨ ਆਪਣੇ ਰਵਾਇਤੀ 'ਹੋਮ-ਐਂਡ-ਅਵੇ' ਫਾਰਮੈਟ ਵਿੱਚ ਵਾਪਸ ਆ ਰਿਹਾ ਹੈ। ਇਸ ਤੋਂ ਪਹਿਲਾਂ 2025-26 ਦਾ ਛੋਟਾ ਸੀਜ਼ਨ ਸਿੰਗਲ-ਲੈੱਗ ਰਾਊਂਡ-ਰੌਬਿਨ ਫਾਰਮੈਟ ਵਿੱਚ ਖੇਡਿਆ ਗਿਆ ਸੀ, ਜਿਸ ਵਿੱਚ 14 ਕਲੱਬਾਂ ਵਿੱਚੋਂ ਹਰੇਕ ਨੇ ਸਿਰਫ਼ 13 ਮੈਚ ਖੇਡੇ ਸਨ। ਨਵੇਂ ਕਲੱਬ-ਸੰਚਾਲਿਤ ਮਾਡਲ ਦੇ ਤਹਿਤ, ਹੋਮ-ਐਂਡ-ਅਵੇ ਫਾਰਮੈਟ ਦੇ ਲੀਗ ਟੇਬਲ ਵਿੱਚ ਸਿਖਰ 'ਤੇ ਰਹਿਣ ਵਾਲੀ ਟੀਮ ਨੂੰ 'ਸ਼ੀਲਡ ਵਿਨਰ' (ਅਧਿਕਾਰਤ ਆਈਐੱਸਐੱਲ ਚੈਂਪੀਅਨ) ਐਲਾਨਿਆ ਜਾਵੇਗਾ ਅਤੇ ਉਸ ਨੂੰ ਏਸ਼ੀਅਨ ਮੁਕਾਬਲਿਆਂ ਵਿੱਚ ਸਿੱਧੀ ਜਗ੍ਹਾ ਮਿਲੇਗੀ। 

ਇਸ ਦੇ ਨਾਲ ਹੀ ਇਸ ਵਾਰ ਪਲੇਆਫ ਦੀ ਵੀ ਵਾਪਸੀ ਹੋਵੇਗੀ, ਜਿਸ ਵਿੱਚ ਲੀਗ ਸਟੈਂਡਿੰਗ ਦੀਆਂ ਚੋਟੀ ਦੀਆਂ ਛੇ ਟੀਮਾਂ ਪਲੇਆਫ ਲਈ ਕੁਆਲੀਫਾਈ ਕਰਨਗੀਆਂ ਅਤੇ ਆਈਐੱਸਐੱਲ ਟਰਾਫੀ ਲਈ ਭਿੜਨਗੀਆਂ। ਅੱਠ ਮਹੀਨਿਆਂ ਤੱਕ ਚੱਲਣ ਵਾਲੇ ਇਸ ਸੀਜ਼ਨ ਵਿੱਚ ਪਲੇਆਫ ਮੁਕਾਬਲਿਆਂ ਸਮੇਤ ਕੁੱਲ 163 ਮੈਚ ਖੇਡੇ ਜਾਣਗੇ।