ਇੰਡੋਨੇਸ਼ੀਆ ਮਾਸਟਰਜ਼ : ਸਿੰਧੂ ਅਤੇ ਸ਼੍ਰੀਕਾਂਤ ਦੂਜੇ ਦੌਰ ਵਿੱਚ ਪਹੁੰਚੇ

ਜਕਾਰਤਾ : ਜਕਾਰਤਾ ਵਿੱਚ ਖੇਡੇ ਜਾ ਰਹੇ ਇੰਡੋਨੇਸ਼ੀਆ ਮਾਸਟਰਜ਼ ਬੈਡਮਿੰਟਨ ਟੂਰਨਾਮੈਂਟ ਦੇ ਪਹਿਲੇ ਦਿਨ ਭਾਰਤ ਲਈ ਮਿਲੀ-ਜੁਲੀ ਖ਼ਬਰ ਸਾਹਮਣੇ ਆਈ ਹੈ। ਦੋ ਵਾਰ ਦੀ ਓਲੰਪਿਕ ਤਮਗਾ ਜੇਤੂ ਪੀ.ਵੀ. ਸਿੰਧੂ ਅਤੇ ਦੁਨੀਆ ਦੇ ਸਾਬਕਾ ਨੰਬਰ ਇੱਕ ਖਿਡਾਰੀ ਕਿਦਾਂਬੀ ਸ਼੍ਰੀਕਾਂਤ ਨੇ ਸ਼ਾਨਦਾਰ ਪ੍ਰਦਰਸ਼ਨ ਕਰਦਿਆਂ ਆਪਣੇ-ਆਪਣੇ ਮੁਕਾਬਲੇ ਜਿੱਤ ਕੇ ਦੂਜੇ ਦੌਰ ਵਿੱਚ ਜਗ੍ਹਾ ਬਣਾ ਲਈ ਹੈ।

ਸਿੰਧੂ ਅਤੇ ਸ਼੍ਰੀਕਾਂਤ ਦਾ ਦਮਦਾਰ ਪ੍ਰਦਰਸ਼ਨ 
ਟੂਰਨਾਮੈਂਟ ਵਿੱਚ ਪੰਜਵੀਂ ਦਰਜਾ ਪ੍ਰਾਪਤ ਪੀ.ਵੀ. ਸਿੰਧੂ ਨੇ ਜਾਪਾਨ ਦੀ ਮਨਾਮੀ ਸੁਇਜ਼ੂ ਨੂੰ 53 ਮਿੰਟ ਤੱਕ ਚੱਲੇ ਮੁਕਾਬਲੇ ਵਿੱਚ 22-20, 21-18 ਨਾਲ ਸਿੱਧੇ ਸੈੱਟਾਂ ਵਿੱਚ ਮਾਤ ਦਿੱਤੀ। ਦੂਜੇ ਪਾਸੇ, ਵਿਸ਼ਵ ਰੈਂਕਿੰਗ ਵਿੱਚ 33ਵੇਂ ਸਥਾਨ 'ਤੇ ਕਾਬਜ਼ ਕਿਦਾਂਬੀ ਸ਼੍ਰੀਕਾਂਤ ਨੇ ਜਾਪਾਨ ਦੇ ਹੀ ਕੋਕੀ ਵਾਤਾਨਾਬੇ ਵਿਰੁੱਧ ਇੱਕ ਘੰਟਾ 12 ਮਿੰਟ ਤੱਕ ਚੱਲੇ ਮੈਰਾਥਨ ਮੁਕਾਬਲੇ ਵਿੱਚ 21-15, 21-23, 24-22 ਨਾਲ ਰੋਮਾਂਚਕ ਜਿੱਤ ਦਰਜ ਕੀਤੀ। ਅਗਲੇ ਦੌਰ ਵਿੱਚ ਸ਼੍ਰੀਕਾਂਤ ਦਾ ਸਾਹਮਣਾ ਚੀਨੀ ਤਾਈਪੇ ਦੇ ਚੌਥੀ ਦਰਜਾ ਪ੍ਰਾਪਤ ਚੋਉ ਤਿਏਨ ਚੇਨ ਨਾਲ ਹੋਵੇਗਾ।

ਇਨ੍ਹਾਂ ਖਿਡਾਰੀਆਂ ਨੂੰ ਮਿਲੀ ਹਾਰ 
ਹਾਲਾਂਕਿ, ਭਾਰਤ ਲਈ ਦਿਨ ਪੂਰੀ ਤਰ੍ਹਾਂ ਖੁਸ਼ਗਵਾਰ ਨਹੀਂ ਰਿਹਾ। ਨੌਜਵਾਨ ਖਿਡਾਰੀ ਕਿਰਨ ਜਾਰਜ ਨੂੰ ਇੰਡੋਨੇਸ਼ੀਆ ਦੇ ਅਲਵੀ ਫਰਹਾਨ (ਜਾਕੀ ਉਬੇਦਿੱਲਾਹ) ਹੱਥੋਂ 17-21, 14-21 ਨਾਲ ਹਾਰ ਦਾ ਸਾਹਮਣਾ ਕਰਨਾ ਪਿਆ। ਮਹਿਲਾ ਸਿੰਗਲਜ਼ ਵਿੱਚ ਆਕਰਸ਼ੀ ਕਸ਼ਯਪ ਵੀ ਆਪਣੀ ਲੈਅ ਬਰਕਰਾਰ ਨਹੀਂ ਰੱਖ ਸਕੀ ਅਤੇ ਜੂਲੀ ਡਾਵਾਲ ਜੈਕੋਬਸਨ ਤੋਂ 21-8, 20-22, 17-21 ਨਾਲ ਮੈਚ ਹਾਰ ਗਈ।

ਮਿਕਸਡ ਡਬਲਜ਼ ਵਿੱਚ ਨਿਰਾਸ਼ਾ 
ਮਿਕਸਡ ਡਬਲਜ਼ ਵਰਗ ਵਿੱਚ ਭਾਰਤ ਦੀ ਮੁਹਿੰਮ ਪਹਿਲੇ ਹੀ ਦੌਰ ਵਿੱਚ ਖਤਮ ਹੋ ਗਈ। ਰੋਹਨ ਕਪੂਰ ਅਤੇ ਰੂਤਵਿਕਾ ਗਾਡੇ ਦੀ ਜੋੜੀ ਨੂੰ ਫਰਾਂਸ ਦੇ ਥੌਮ ਗਿਕੁਲ ਅਤੇ ਡੇਲਫਾਈਨ ਡੇਲਰੂ ਨੇ 21-9, 22-20 ਨਾਲ ਹਰਾਇਆ। ਇਸੇ ਤਰ੍ਹਾਂ ਧਰੁਵ ਕਪਿਲਾ ਅਤੇ ਤਨੀਸ਼ਾ ਕ੍ਰਾਸਟੋ ਦੀ ਜੋੜੀ ਨੂੰ ਵੀ ਫਰਾਂਸ ਦੇ ਹੀ ਜੂਲੀਅਨ ਮੇਇਓ ਅਤੇ ਲੀ ਪਾਲੇਰਮੋ ਹੱਥੋਂ ਤਿੰਨ ਸੈੱਟਾਂ ਦੇ ਸੰਘਰਸ਼ ਤੋਂ ਬਾਅਦ ਹਾਰ ਦਾ ਮੂੰਹ ਦੇਖਣਾ ਪਿਆ।