ਫ੍ਰੈਂਚ ਓਪਨ 2026 : ਜ਼ਵੇਰੇਵ ਕੁਆਰਟਰ ਫਾਈਨਲ ਵਿੱਚ ਪੁੱਜੇ; ਹੁਣ ਰਾਫੇਲ ਜੋਦਾਰ ਨਾਲ ਹੋਵੇਗਾ ਟਾਕਰਾ

ਪੈਰਿਸ [ਫਰਾਂਸ] : ਵਿਸ਼ਵ ਦੇ ਨੰਬਰ 3 ਟੈਨਿਸ ਖਿਡਾਰੀ ਅਲੈਗਜ਼ੈਂਡਰ ਜ਼ਵੇਰੇਵ ਨੇ ਆਪਣੀ ਸ਼ਾਨਦਾਰ ਖੇਡ ਜਾਰੀ ਰੱਖਦਿਆਂ ਰੋਲੈਂਡ ਗੈਰੋਸ (ਫ੍ਰੈਂਚ ਓਪਨ) ਦੇ ਕੁਆਰਟਰ ਫਾਈਨਲ ਵਿੱਚ ਪ੍ਰਵੇਸ਼ ਕਰ ਲਿਆ ਹੈ। ਇਹ ਲਗਾਤਾਰ ਛੇਵਾਂ ਸਾਲ ਹੈ ਜਦੋਂ ਜ਼ਵੇਰੇਵ ਪੈਰਿਸ ਵਿੱਚ ਅੰਤਿਮ ਅੱਠਾਂ ਵਿੱਚ ਪਹੁੰਚਣ ਵਿੱਚ ਸਫਲ ਰਹੇ ਹਨ।

ਸ਼ੁਰੂਆਤੀ ਮੁਸ਼ਕਲਾਂ ਤੋਂ ਬਾਅਦ ਸ਼ਾਨਦਾਰ ਵਾਪਸੀ 
ਕੋਰਟ ਫਿਲਿਪ-ਚੈਟਰੀਅਰ 'ਤੇ ਖੇਡੇ ਗਏ ਮੁਕਾਬਲੇ ਵਿੱਚ ਜਰਮਨੀ ਦੇ ਜ਼ਵੇਰੇਵ ਨੇ ਵਿਸ਼ਵ ਦੇ 106ਵੇਂ ਨੰਬਰ ਦੇ ਖਿਡਾਰੀ ਜੈਸਪਰ ਡੀ ਜੋਂਗ ਨੂੰ 7-6(3), 6-4, 6-1 ਨਾਲ ਹਰਾਇਆ। ਮੈਚ ਦੀ ਸ਼ੁਰੂਆਤ ਵਿੱਚ ਜ਼ਵੇਰੇਵ ਪਹਿਲੇ ਸੈੱਟ ਵਿੱਚ 0-3 ਨਾਲ ਪਿੱਛੇ ਚੱਲ ਰਹੇ ਸਨ, ਪਰ ਉਨ੍ਹਾਂ ਨੇ ਜ਼ਬਰਦਸਤ ਵਾਪਸੀ ਕਰਦਿਆਂ 2 ਘੰਟੇ 14 ਮਿੰਟ ਵਿੱਚ ਜਿੱਤ ਹਾਸਲ ਕੀਤੀ। ਜ਼ਵੇਰੇਵ ਨੇ ਮੈਚ ਤੋਂ ਬਾਅਦ ਕਿਹਾ ਕਿ ਸ਼ੁਰੂਆਤ ਵਿੱਚ ਲੈਅ ਲੱਭਣਾ ਮੁਸ਼ਕਲ ਸੀ, ਪਰ ਇੱਕ ਵਾਰ ਰਿਦਮ ਮਿਲਣ ਤੋਂ ਬਾਅਦ ਉਹ ਕੋਰਟ 'ਤੇ ਕਾਫ਼ੀ ਸਹਿਜ ਮਹਿਸੂਸ ਕਰ ਰਹੇ ਸਨ।

ਰਿਕਾਰਡਾਂ ਦੀ ਸੂਚੀ ਵਿੱਚ ਮਾਰੀ ਛਾਲ 
29 ਸਾਲਾ ਜ਼ਵੇਰੇਵ ਅੱਠਵੀਂ ਵਾਰ ਫ੍ਰੈਂਚ ਓਪਨ ਦੇ ਕੁਆਰਟਰ ਫਾਈਨਲ ਵਿੱਚ ਪਹੁੰਚ ਕੇ 'ਓਪਨ ਏਰਾ' ਵਿੱਚ ਸਭ ਤੋਂ ਵੱਧ ਵਾਰ ਇਸ ਮੁਕਾਮ 'ਤੇ ਪਹੁੰਚਣ ਵਾਲੇ ਖਿਡਾਰੀਆਂ ਦੀ ਸੂਚੀ ਵਿੱਚ ਸਾਂਝੇ ਤੌਰ 'ਤੇ ਛੇਵੇਂ ਸਥਾਨ 'ਤੇ ਆ ਗਏ ਹਨ। ਉਹ ਇਸ ਸਮੇਂ ਪੁਰਸ਼ ਸਿੰਗਲਜ਼ ਡਰਾਅ ਵਿੱਚ ਬਚੇ ਹੋਏ ਸਿਰਫ਼ ਦੋ 'ਟਾਪ-10' ਖਿਡਾਰੀਆਂ ਵਿੱਚੋਂ ਇੱਕ ਹਨ, ਦੂਜੇ ਖਿਡਾਰੀ ਵਿਸ਼ਵ ਨੰਬਰ 6 ਫੇਲਿਕਸ ਔਗਰ-ਅਲੀਆਸੀਮ ਹਨ।

ਅਗਲੀ ਚੁਣੌਤੀ : 19 ਸਾਲਾ ਰਾਫੇਲ ਜੋਦਾਰ 
ਕੁਆਰਟਰ ਫਾਈਨਲ ਵਿੱਚ ਜ਼ਵੇਰੇਵ ਦਾ ਸਾਹਮਣਾ ਪਹਿਲੀ ਵਾਰ ਉਭਰਦੇ ਹੋਏ ਸਿਤਾਰੇ ਰਾਫੇਲ ਜੋਦਾਰ ਨਾਲ ਹੋਵੇਗਾ। 19 ਸਾਲਾ ਜੋਦਾਰ ਨੇ ਪਾਬਲੋ ਕੈਰੇਨੋ ਬੁਸਤਾ ਨੂੰ ਪੰਜ ਸੈੱਟਾਂ ਦੇ ਰੋਮਾਂਚਕ ਮੁਕਾਬਲੇ ਵਿੱਚ 4-6, 4-6, 6-1, 6-2, 6-2 ਨਾਲ ਹਰਾ ਕੇ ਕੁਆਰਟਰ ਫਾਈਨਲ ਦਾ ਟਿਕਟ ਹਾਸਲ ਕੀਤਾ ਹੈ।

ਜੋਆਓ ਫੋਂਸੇਕਾ ਦਾ ਸੁਪਨਮਈ ਸਫ਼ਰ ਜਾਰੀ 
ਦੂਜੇ ਪਾਸੇ, ਬ੍ਰਾਜ਼ੀਲ ਦੇ ਨੌਜਵਾਨ ਖਿਡਾਰੀ ਜੋਆਓ ਫੋਂਸੇਕਾ ਨੇ ਵੀ ਕੈਸਪਰ ਰੂਡ ਨੂੰ 7-5, 7-6(8), 5-7, 6-2 ਨਾਲ ਹਰਾ ਕੇ ਪਹਿਲੀ ਵਾਰ ਕਿਸੇ ਗ੍ਰੈਂਡ ਸਲੈਮ ਦੇ ਕੁਆਰਟਰ ਫਾਈਨਲ ਵਿੱਚ ਜਗ੍ਹਾ ਬਣਾਈ ਹੈ । ਫੋਂਸੇਕਾ ਨੇ ਦੋ ਦਿਨ ਪਹਿਲਾਂ ਹੀ 24 ਵਾਰ ਦੇ ਮੇਜਰ ਚੈਂਪੀਅਨ ਨੋਵਾਕ ਜੋਕੋਵਿਚ ਨੂੰ ਹਰਾ ਕੇ ਸਭ ਨੂੰ ਹੈਰਾਨ ਕਰ ਦਿੱਤਾ ਸੀ।