ਕਾਰਲੋਸ ਅਲਕਾਰਾਜ਼ ਨੇ ਰਚਿਆ ਇਤਿਹਾਸ : ਨੋਵਾਕ ਜੋਕੋਵਿਚ ਨੂੰ ਹਰਾ ਕੇ ਜਿੱਤਿਆ ਆਸਟ੍ਰੇਲੀਅਨ ਓਪਨ ਖਿਤਾਬ

ਮੈਲਬੌਰਨ : ਸਪੇਨ ਦੇ 22 ਸਾਲਾ ਸਟਾਰ ਖਿਡਾਰੀ ਕਾਰਲੋਸ ਅਲਕਾਰਾਜ਼ ਨੇ ਨੋਵਾਕ ਜੋਕੋਵਿਚ ਨੂੰ ਹਰਾ ਕੇ ਆਸਟ੍ਰੇਲੀਅਨ ਓਪਨ ਦਾ ਖਿਤਾਬ ਆਪਣੇ ਨਾਮ ਕਰ ਲਿਆ ਹੈ। ਇਸ ਇਤਿਹਾਸਕ ਜਿੱਤ ਦੇ ਨਾਲ ਹੀ ਅਲਕਾਰਾਜ਼ ਪੁਰਸ਼ ਟੈਨਿਸ ਵਿੱਚ 'ਕਰੀਅਰ ਗ੍ਰੈਂਡ ਸਲੈਮ' (ਚਾਰੇ ਮੁੱਖ ਖਿਤਾਬ ਜਿੱਤਣਾ) ਪੂਰਾ ਕਰਨ ਵਾਲਾ ਦੁਨੀਆ ਦਾ ਸਭ ਤੋਂ ਘੱਟ ਉਮਰ ਦਾ ਖਿਡਾਰੀ ਬਣ ਗਿਆ ਹੈ। ਉਸ ਨੇ 22 ਸਾਲ ਅਤੇ 272 ਦਿਨਾਂ ਦੀ ਉਮਰ ਵਿੱਚ ਇਹ ਉਪਲਬਧੀ ਹਾਸਲ ਕਰਕੇ ਡੌਨ ਬਜ (Don Budge) ਦੇ 1938 ਦੇ ਰਿਕਾਰਡ ਨੂੰ ਤੋੜ ਦਿੱਤਾ ਹੈ।

ਜੋਕੋਵਿਚ ਦਾ 25ਵਾਂ ਖਿਤਾਬ ਜਿੱਤਣ ਦਾ ਸੁਪਨਾ ਟੁੱਟਿਆ 
ਦੁਨੀਆ ਦੇ ਨੰਬਰ ਇੱਕ ਖਿਡਾਰੀ ਅਲਕਾਰਾਜ਼ ਨੇ ਪਹਿਲਾ ਸੈੱਟ ਗੁਆਉਣ ਤੋਂ ਬਾਅਦ ਸ਼ਾਨਦਾਰ ਵਾਪਸੀ ਕੀਤੀ ਅਤੇ ਜੋਕੋਵਿਚ ਨੂੰ 2-6, 6-2, 6-3, 7-5 ਨਾਲ ਸ਼ਿਕਸਤ ਦਿੱਤੀ। ਜ਼ਿਕਰਯੋਗ ਹੈ ਕਿ ਜੋਕੋਵਿਚ ਮੈਲਬੌਰਨ ਪਾਰਕ ਵਿੱਚ ਆਪਣੇ ਪਿਛਲੇ ਸਾਰੇ 10 ਫਾਈਨਲ ਜਿੱਤ ਚੁੱਕੇ ਸਨ, ਪਰ ਇਸ ਵਾਰ ਅਲਕਾਰਾਜ਼ ਨੇ ਉਨ੍ਹਾਂ ਦੇ 25ਵੇਂ ਮੇਜਰ ਖਿਤਾਬ ਦੇ ਰਾਹ ਵਿੱਚ ਰੋੜਾ ਅਟਕਾ ਦਿੱਤਾ। ਤਿੰਨ ਘੰਟੇ ਤੋਂ ਵੱਧ ਚੱਲੇ ਇਸ ਮੁਕਾਬਲੇ ਵਿੱਚ ਦੋਵਾਂ ਖਿਡਾਰੀਆਂ ਨੇ ਆਪਣੀ ਗਤੀਸ਼ੀਲਤਾ ਅਤੇ ਫਿਟਨੈੱਸ ਦਾ ਬੇਮਿਸਾਲ ਪ੍ਰਦਰਸ਼ਨ ਕੀਤਾ। ਜਿੱਤ ਤੋਂ ਬਾਅਦ ਅਲਕਾਰਾਜ਼ ਕਾਫ਼ੀ ਭਾਵੁਕ ਨਜ਼ਰ ਆਏ ਅਤੇ ਕੋਰਟ 'ਤੇ ਹੀ ਲੇਟ ਗਏ, ਜਿਸ ਤੋਂ ਬਾਅਦ ਉਨ੍ਹਾਂ ਨੇ ਜੋਕੋਵਿਚ ਨਾਲ ਹੱਥ ਮਿਲਾਇਆ ਅਤੇ ਆਪਣੇ ਕੋਚਾਂ ਤੇ ਪਰਿਵਾਰ ਨਾਲ ਜਿੱਤ ਦਾ ਜਸ਼ਨ ਮਨਾਇਆ। ਅਲਕਾਰਾਜ਼ ਕੋਲ ਹੁਣ ਕੁੱਲ 7 ਗ੍ਰੈਂਡ ਸਲੈਮ ਖਿਤਾਬ ਹੋ ਗਏ ਹਨ।