ਕੈਨੇਡਾ ਦੀ ਐਮਬੋਕੋ ਨੇ ਰਿਬਾਕਿਨਾ ਨੂੰ ਹਰਾ ਕੇ ਮਾਂਟਰੀਅਲ ਵਿੱਚ ਫਾਈਨਲ ਵਿੱਚ ਬਣਾਈ ਜਗ੍ਹਾ

ਮਾਂਟਰੀਅਲ- ਕੈਨੇਡੀਅਨ ਨਾਬਾਲਗਾ ਵਿਕਟੋਰੀਆ ਐਮਬੋਕੋ ਨੇ ਬੁੱਧਵਾਰ ਨੂੰ ਇੱਥੇ ਨੌਵਾਂ ਦਰਜਾ ਪ੍ਰਾਪਤ ਏਲੇਨਾ ਰਿਬਾਕਿਨਾ ਨੂੰ ਹਰਾ ਕੇ ਨੈਸ਼ਨਲ ਬੈਂਕ ਓਪਨ ਟੈਨਿਸ ਟੂਰਨਾਮੈਂਟ ਦੇ ਫਾਈਨਲ ਵਿੱਚ ਪ੍ਰਵੇਸ਼ ਕੀਤਾ। ਕੈਨੇਡਾ ਦੀ 18 ਸਾਲਾ ਐਮਬੋਕੋ ਨੇ ਰਿਬਾਕਿਨਾ ਨੂੰ ਤਿੰਨ ਸੈੱਟਾਂ ਦੇ ਸਖ਼ਤ ਮੈਚ ਵਿੱਚ 1-6, 7-5, 7-6 ਨਾਲ ਹਰਾਇਆ। 

ਐਮਬੋਕੋ ਨੇ ਤੀਜੇ ਅਤੇ ਫੈਸਲਾਕੁੰਨ ਸੈੱਟ ਵਿੱਚ ਇੱਕ ਮੈਚ ਪੁਆਇੰਟ ਬਚਾਇਆ ਅਤੇ ਰਿਬਾਕਿਨਾ ਦੀ ਸਰਵਿਸ ਦੋ ਵਾਰ ਤੋੜ ਕੇ ਸੈੱਟ ਨੂੰ ਟਾਈਬ੍ਰੇਕਰ ਵਿੱਚ ਲੈ ਗਈ ਅਤੇ ਫਿਰ ਜਿੱਤ ਪ੍ਰਾਪਤ ਕੀਤੀ। ਵੀਰਵਾਰ ਨੂੰ ਹੋਣ ਵਾਲੇ ਫਾਈਨਲ ਵਿੱਚ, ਐਮਬੋਕੋ ਦਾ ਸਾਹਮਣਾ ਜਾਪਾਨ ਦੀ ਸਟਾਰ ਨਾਓਮੀ ਓਸਾਕਾ ਨਾਲ ਹੋਵੇਗਾ, ਜਿਸਨੇ ਦੂਜੇ ਸੈਮੀਫਾਈਨਲ ਵਿੱਚ ਡੈਨਮਾਰਕ ਦੀ 16ਵੀਂ ਸੀਡ ਕਲਾਰਾ ਟੌਸਨ ਨੂੰ 6-2, 7-6 ਨਾਲ ਹਰਾਇਆ। ਵਿਸ਼ਵ ਦੀ 85ਵੀਂ ਨੰਬਰ ਦੀ ਮਬੋਕੋ ਆਪਣਾ ਪਹਿਲਾ WTA ਖਿਤਾਬ ਜਿੱਤਣ ਅਤੇ ਫੇ ਅਰਬਨ (1969) ਅਤੇ ਬਿਆਨਕਾ ਐਂਡਰੀਸਕੂ (2019) ਤੋਂ ਬਾਅਦ ਓਪਨ ਯੁੱਗ ਵਿੱਚ ਘਰੇਲੂ ਖਿਤਾਬ ਜਿੱਤਣ ਵਾਲੀ ਤੀਜੀ ਕੈਨੇਡੀਅਨ ਬਣਨ ਦੀ ਕੋਸ਼ਿਸ਼ ਕਰੇਗੀ।