ਭਾਰਤੀ ਫੁੱਟਬਾਲ ''ਚ ਵੱਡਾ ਫੈਸਲਾ: ਸੀਨੀਅਰ ਖਿਡਾਰੀ ਬਾਹਰ, ਕੋਚ ਬੋਲੇ- "ਚੋਣ ਸਿਰਫ਼ ਯੋਗਤਾ ''ਤੇ"

ਨਵੀਂ ਦਿੱਲੀ : ਭਾਰਤੀ ਫੁੱਟਬਾਲ ਟੀਮ ਦੇ ਮੁੱਖ ਕੋਚ ਖਾਲਿਦ ਜਮੀਲ ਨੇ ਆਉਣ ਵਾਲੇ ਬ੍ਰਾਜ਼ੀਲ, ਉਰੂਗਵੇ ਅਤੇ ਪਨਾਮਾ ਵਿਰੁੱਧ ਹਾਈ-ਪ੍ਰੋਫਾਈਲ ਦੋਸਤਾਨਾ (ਫ੍ਰੈਂਡਲੀ) ਮੈਚਾਂ ਲਈ ਐਲਾਨੀ ਗਈ ਟੀਮ ਵਿੱਚੋਂ ਕਈ ਦਿੱਗਜ ਖਿਡਾਰੀਆਂ ਨੂੰ ਬਾਹਰ ਰੱਖਣ ਦੇ ਆਪਣੇ ਫੈਸਲੇ ਦਾ ਜ਼ੋਰਦਾਰ ਬਚਾਅ ਕੀਤਾ ਹੈ। ਜਮੀਲ ਨੇ ਸਪੱਸ਼ਟ ਕੀਤਾ ਕਿ ਉਨ੍ਹਾਂ ਨੇ 26 ਸੰਭਾਵਿਤ ਖਿਡਾਰੀਆਂ ਦੀ ਚੋਣ ਪੂਰੀ ਤਰ੍ਹਾਂ ਨਾਲ ਯੋਗਤਾ (ਮੈਰਿਟ) ਅਤੇ ਪ੍ਰਦਰਸ਼ਨ ਦੇ ਆਧਾਰ 'ਤੇ ਕੀਤੀ ਹੈ ਅਤੇ ਸਾਰੇ ਖਿਡਾਰੀਆਂ ਨੂੰ ਬਰਾਬਰ ਅਤੇ ਲੋੜੀਂਦਾ ਮੌਕਾ ਦਿੱਤਾ ਗਿਆ ਹੈ।

ਕਈ ਦਿੱਗਜ ਖਿਡਾਰੀ ਟੀਮ 'ਚੋਂ ਬਾਹਰ
ਇਸ ਹਫ਼ਤੇ ਐਲਾਨੀ ਗਈ ਟੀਮ ਵਿੱਚੋਂ ਸਾਬਕਾ ਭਾਰਤੀ ਕਪਤਾਨ ਸੰਦੇਸ਼ ਝਿੰਗਨ, ਰਾਹੁਲ ਭੇਕੇ, ਐਫਪੀਏਆਈ  ਪਲੇਅਰ ਆਫ਼ ਦ ਯੀਅਰ ਲਾਲੀਅਨਜ਼ੁਆਲਾ ਚਾਂਗਤੇ, ਮੋਹਨ ਬਾਗਾਨ ਦੇ ਸਟਾਰ ਗੋਲਕੀਪਰ ਵਿਸ਼ਾਲ ਕੈਥ (ਡੂਰੰਡ ਕੱਪ ਵਿੱਚ ਗੋਲਡਨ ਗਲੋਵ ਜੇਤੂ), ਲਿਸਟਨ ਕੋਲਾਸੋ ਅਤੇ ਈਸਟ ਬੰਗਾਲ ਦੇ ਮਿਡਫੀਲਡਰ ਜੈਕਸਨ ਸਿੰਘ ਵਰਗੇ ਵੱਡੇ ਨਾਵਾਂ ਨੂੰ ਬਾਹਰ ਰੱਖਿਆ ਗਿਆ ਹੈ। ਇਸ 'ਤੇ ਪ੍ਰਤੀਕਿਰਿਆ ਦਿੰਦਿਆਂ ਕੋਚ ਜਮੀਲ ਨੇ ਕਿਹਾ ਕਿ ਰਾਸ਼ਟਰੀ ਟੀਮ ਵਿੱਚ ਕੋਈ ਸੀਨੀਅਰ ਜਾਂ ਜੂਨੀਅਰ ਨਹੀਂ ਹੁੰਦਾ ਅਤੇ ਇੱਕ ਸੰਤੁਲਿਤ ਟੀਮ ਬਣਾਉਣ ਲਈ ਨਵੇਂ ਅਤੇ ਪੁਰਾਣੇ ਖਿਡਾਰੀਆਂ ਦਾ ਮਿਸ਼ਰਣ ਕਰਨਾ ਜ਼ਰੂਰੀ ਹੈ। ਉਨ੍ਹਾਂ ਕਿਹਾ ਕਿ ਜਿਹੜੇ ਖਿਡਾਰੀ ਮੌਕੇ ਮਿਲਣ 'ਤੇ ਪ੍ਰਦਰਸ਼ਨ ਨਹੀਂ ਕਰ ਸਕਣਗੇ, ਉਨ੍ਹਾਂ ਨੂੰ ਬਾਹਰ ਜਾਣਾ ਪਵੇਗਾ, ਪਰ ਉਨ੍ਹਾਂ ਨੂੰ ਭਵਿੱਖ ਵਿੱਚ ਦੁਬਾਰਾ ਮੌਕਾ ਜ਼ਰੂਰ ਮਿਲੇਗਾ।

ਟੀਚਾ : 2027 ਏਸ਼ੀਅਨ ਕੱਪ ਕੁਆਲੀਫਿਕੇਸ਼ਨ
ਕੋਚ ਅਨੁਸਾਰ ਇਹ ਵੱਡੇ ਬਦਲਾਅ ਭਾਰਤ ਨੂੰ ਸਾਲ 2027 ਦੇ ਏਸ਼ੀਅਨ ਕੱਪ ਲਈ ਕੁਆਲੀਫਾਈ ਕਰਵਾਉਣ ਦੀ ਲੰਬੇ ਸਮੇਂ ਦੀ ਯੋਜਨਾ ਦਾ ਹਿੱਸਾ ਹਨ। ਉਨ੍ਹਾਂ ਜ਼ੋਰ ਦੇ ਕੇ ਕਿਹਾ ਕਿ ਖਿਡਾਰੀਆਂ ਨੂੰ ਹਰ ਸਥਿਤੀ ਵਿੱਚ, ਚਾਹੇ ਉਹ ਡਿਫੈਂਸ ਹੋਵੇ ਜਾਂ ਅਟੈਕ, ਮਜ਼ਬੂਤ ਹੋਣਾ ਪਵੇਗਾ ਅਤੇ ਮੈਦਾਨ 'ਤੇ ਜ਼ਿੰਮੇਵਾਰੀ ਲੈਣੀ ਪਵੇਗੀ। ਜਮੀਲ ਕਿਸੇ ਇੱਕ ਖ਼ਾਸ ਰਣਨੀਤੀ 'ਤੇ ਟਿਕੇ ਰਹਿਣ ਦੀ ਬਜਾਏ ਹਾਲਾਤ ਅਨੁਸਾਰ 3-4-3 ਜਾਂ 5-4-1 ਵਰਗੇ ਬਦਲਾਅ ਕਰਨ ਲਈ ਤਿਆਰ ਹਨ। ਉਨ੍ਹਾਂ ਕਿਹਾ, "ਸਾਡਾ ਨਿਸ਼ਾਨਾ ਹਮੇਸ਼ਾ ਜਿੱਤ ਹੋਵੇਗਾ, ਅਸੀਂ ਕਦੇ ਵੀ ਸਿਰਫ਼ ਘੱਟ ਗੋਲ ਖਾਣ ਬਾਰੇ ਨਹੀਂ ਸੋਚਾਂਗੇ"। ਉਨ੍ਹਾਂ ਨੇ ਹਾਲ ਹੀ ਵਿੱਚ ਈਰਾਨ, ਓਮਾਨ, ਤਾਜਿਕਸਤਾਨ, ਜ਼ਿੰਬਾਬਵੇ ਅਤੇ ਜਮੈਕਾ ਵਰਗੀਆਂ ਮਜ਼ਬੂਤ ਟੀਮਾਂ ਵਿਰੁੱਧ ਭਾਰਤ ਦੇ ਪ੍ਰਦਰਸ਼ਨ ਦਾ ਹਵਾਲਾ ਦਿੰਦਿਆਂ ਕਿਹਾ ਕਿ ਟੀਮ ਦਾ ਪ੍ਰਦਰਸ਼ਨ ਹਾਲ ਹੀ ਦੇ ਸਮੇਂ ਵਿੱਚ ਮਾੜਾ ਨਹੀਂ ਰਿਹਾ ਹੈ।