ਬ੍ਰਿਸਬੇਨ ਇੰਟਰਨੈਸ਼ਨਲ: ਅਰੀਨਾ ਸਬਾਲੇਂਕਾ ਅਤੇ ਬ੍ਰੈਂਡਨ ਨਕਾਸ਼ੀਮਾ ਫਾਈਨਲ ਵਿੱਚ

ਸਪੋਰਟਸ ਡੈਸਕ- ਵਿਸ਼ਵ ਦੀ ਨੰਬਰ ਇੱਕ ਖਿਡਾਰਨ ਅਤੇ ਮੌਜੂਦਾ ਚੈਂਪੀਅਨ ਅਰੀਨਾ ਸਬਾਲੇਂਕਾ ਨੇ ਸ਼ਾਨਦਾਰ ਪ੍ਰਦਰਸ਼ਨ ਜਾਰੀ ਰੱਖਦਿਆਂ ਬ੍ਰਿਸਬੇਨ ਇੰਟਰਨੈਸ਼ਨਲ ਦੇ ਫਾਈਨਲ ਵਿੱਚ ਜਗ੍ਹਾ ਬਣਾ ਲਈ ਹੈ। ਸਬਾਲੇਂਕਾ ਨੇ ਸ਼ਨੀਵਾਰ ਨੂੰ ਖੇਡੇ ਗਏ ਸੈਮੀਫਾਈਨਲ ਮੁਕਾਬਲੇ ਵਿੱਚ ਕੈਰੋਲੀਨਾ ਮੁਚੋਵਾ ਨੂੰ 6-3, 6-4 ਨਾਲ ਮਾਤ ਦਿੱਤੀ। ਪੈਟ ਰਾਫਟਰ ਏਰੀਨਾ ਵਿੱਚ ਹੋਏ ਇਸ ਮੈਚ ਵਿੱਚ ਸਬਾਲੇਂਕਾ ਨੇ ਚੌਥੇ ਮੈਚ ਪੁਆਇੰਟ 'ਤੇ ਜਿੱਤ ਹਾਸਲ ਕੀਤੀ। ਹੁਣ ਐਤਵਾਰ ਨੂੰ ਫਾਈਨਲ ਵਿੱਚ ਉਸ ਦਾ ਮੁਕਾਬਲਾ ਮਾਰਤਾ ਕੋਸਤਯੁਕ ਨਾਲ ਹੋਵੇਗਾ, ਜਿਸ ਨੇ ਚੌਥੀ ਦਰਜਾ ਪ੍ਰਾਪਤ ਜੈਸਿਕਾ ਪੇਗੁਲਾ ਨੂੰ 6-0, 6-3 ਨਾਲ ਹਰਾ ਕੇ ਵੱਡਾ ਉਲਟਫੇਰ ਕੀਤਾ ਹੈ। ਜ਼ਿਕਰਯੋਗ ਹੈ ਕਿ ਸਬਾਲੈਂਕਾ ਨੇ ਇਸ ਤੋਂ ਪਹਿਲਾਂ ਕੁਆਰਟਰ ਫਾਈਨਲ ਵਿੱਚ ਮੈਡਿਸਨ ਕੀਜ਼ ਨੂੰ ਹਰਾਇਆ ਸੀ, ਜਿਸ ਨੇ ਪਿਛਲੇ ਸਾਲ ਆਸਟ੍ਰੇਲੀਅਨ ਓਪਨ ਦੇ ਫਾਈਨਲ ਵਿੱਚ ਸਬਾਲੈਂਕਾ ਨੂੰ ਹਰਾ ਕੇ ਆਪਣਾ ਪਹਿਲਾ ਗ੍ਰੈਂਡ ਸਲੈਮ ਜਿੱਤਿਆ ਸੀ।

ਪੁਰਸ਼ ਵਰਗ ਵਿੱਚ, ਅਮਰੀਕਾ ਦੇ ਬ੍ਰੈਂਡਨ ਨਕਾਸ਼ੀਮਾ ਨੇ ਵੀ ਆਪਣੀ ਜੇਤੂ ਮੁਹਿੰਮ ਜਾਰੀ ਰੱਖਦਿਆਂ ਫਾਈਨਲ ਵਿੱਚ ਪ੍ਰਵੇਸ਼ ਕਰ ਲਿਆ ਹੈ। ਉਨ੍ਹਾਂ ਨੇ ਸੈਮੀਫਾਈਨਲ ਵਿੱਚ ਆਪਣੇ ਹੀ ਦੇਸ਼ ਦੇ ਐਲੇਗਜ਼ੈਂਡਰ ਕੋਵਾਸੇਵਿਚ ਨੂੰ 7-6, 6-4 ਨਾਲ ਹਰਾਇਆ। ਨਕਾਸ਼ੀਮਾ ਹੁਣ ਐਤਵਾਰ ਨੂੰ ਹੋਣ ਵਾਲੇ ਫਾਈਨਲ ਵਿੱਚ ਉਸ ਜੇਤੂ ਨਾਲ ਭਿੜਨਗੇ ਜੋ ਦਾਨਿਲ ਮੇਦਵੇਦੇਵ ਅਤੇ ਐਲੇਕਸ ਮਿਸ਼ੇਲਸਨ ਵਿਚਕਾਰ ਹੋਣ ਵਾਲੇ ਦੂਜੇ ਸੈਮੀਫਾਈਨਲ ਵਿੱਚੋਂ ਨਿਕਲੇਗਾ। ਮੇਦਵੇਦੇਵ ਪਹਿਲਾਂ ਹੀ ਸ਼ਾਨਦਾਰ ਫਾਰਮ ਵਿੱਚ ਹਨ ਅਤੇ ਹਾਰਡ ਕੋਰਟ 'ਤੇ ਆਪਣੇ 52ਵੇਂ ਟੂਰ-ਲੈਵਲ ਸੈਮੀਫਾਈਨਲ ਵਿੱਚ ਪਹੁੰਚ ਕੇ ਇਤਿਹਾਸ ਰਚ ਚੁੱਕੇ ਹਨ।