ਅਰਜੁਨ ਨੇ ਕਾਰਲਸਨ ਨੂੰ ਡਰਾਅ ''ਤੇ ਰੋਕਿਆ, ਗੁਕੇਸ਼ ਦੀ ਖਰਾਬ ਸ਼ੁਰੂਆਤ

ਵਾਰਸਾ, (ਭਾਸ਼ਾ) ਫੀਡੇ ਉਮੀਦਵਾਰ ਚੈਂਪੀਅਨ ਡੀ ਗੁਕੇਸ਼ ਦੀ ਸੁਪਰਬੇਟ ਰੈਪਿਡ ਅਤੇ ਬਲਿਟਜ਼ ਸ਼ਤਰੰਜ ਟੂਰਨਾਮੈਂਟ ਵਿਚ ਚੰਗੀ ਸ਼ੁਰੂਆਤ ਨਹੀਂ ਰਹੀ ਪਰ ਇਕ ਹੋਰ ਭਾਰਤੀ ਖਿਡਾਰੀ ਐਰੀਗੈਸੀ ਅਰਜੁਨ ਨੇ ਨਾਰਵੇ ਦੇ ਵਿਸ਼ਵ ਚੈਂਪੀਅਨ ਨੂੰ ਡਰਾਅ 'ਤੇ ਰੋਕ ਦਿੱਤਾ। ਵਿਸ਼ਵ ਦੇ ਸੱਤਵੇਂ ਨੰਬਰ ਦੇ ਖਿਡਾਰੀ ਅਰਜੁਨ ਨੇ ਵੀ ਆਪਣੇ ਦੋ ਹੋਰ ਮੈਚ ਡਰਾਅ ਦੇ ਰੂਪ ਵਿੱਚ ਖੇਡੇ, ਜਿਸ ਨਾਲ ਉਹ ਰੋਮਾਨੀਆ ਦੇ ਕਿਰਿਲ ਸ਼ੇਵਚੇਂਕੋ ਤੋਂ ਕਾਫੀ ਪਿੱਛੇ ਰਹਿ ਗਿਆ, ਜੋ ਮੁਕਾਬਲੇ ਦੇ ਤੀਜੇ ਦੌਰ ਤੋਂ ਬਾਅਦ ਸਿਖਰ 'ਤੇ ਸੀ। 

ਗੁਕੇਸ਼ ਨੇ ਆਪਣੀਆਂ ਪਹਿਲੀਆਂ ਦੋ ਗੇਮਾਂ ਗੁਆ ਲਈਆਂ ਸਨ ਜਦਕਿ ਤੀਜੇ ਗੇਮ ਵਿੱਚ ਉਸ ਨੇ ਅੰਕ ਸਾਂਝੇ ਕੀਤੇ ਸਨ। ਉਹ ਇਕ ਅੰਕ ਨਾਲ ਦਸ ਖਿਡਾਰੀਆਂ ਵਿਚ ਆਖਰੀ ਸਥਾਨ 'ਤੇ ਹੈ। ਇੱਕ ਹੋਰ ਭਾਰਤੀ ਖਿਡਾਰੀ ਆਰ ਪ੍ਰਗਿਆਨੰਦਾ ਨੇ ਉਜ਼ਬੇਕਿਸਤਾਨ ਦੇ ਨੋਦਿਰਬੇਕ ਅਬਦੁਸਤੋਰੋਵ ਨੂੰ ਹਰਾ ਕੇ ਤੀਜੇ ਦੌਰ ਵਿੱਚ ਵਾਪਸੀ ਕੀਤੀ। ਅਰਜੁਨ ਅਤੇ ਪ੍ਰਗਿਆਨੰਦਾ ਦੇ ਇੱਕੋ ਜਿਹੇ ਤਿੰਨ ਅੰਕ ਹਨ। ਸ਼ੇਵਚੇਂਕੋ ਛੇ ਅੰਕਾਂ ਨਾਲ ਇਕੱਲੇ ਬੜ੍ਹਤ 'ਤੇ ਹੈ। ਉਨ੍ਹਾਂ ਤੋਂ ਬਾਅਦ ਕਾਰਲਸਨ ਅਤੇ ਅਬਦੁਸਾਤੁਰੋਵ ਹਨ ਜਿਨ੍ਹਾਂ ਦੇ ਚਾਰ-ਚਾਰ ਅੰਕ ਹਨ।