ਨਾ ਕੀਤੀ ਬੈਟਿੰਗ ਤੇ ਨਾ ਕੱਢੀ ਵਿਕਟ, ਫ਼ਿਰ ਵੀ 'ਮੈਨ ਆਫ਼ ਦਿ ਮੈਚ' ਬਣਿਆ ਇਹ ਕ੍ਰਿਕਟਰ ! ਹੈਰਾਨ ਕਰੇਗਾ ਰਿਕਾਰਡ

ਸਪੋਰਟਸ ਡੈਸਕ- ਵਨਡੇ ਕ੍ਰਿਕਟ ਹੋਵੇ ਜਾਂ ਕੋਈ ਹੋਰ ਫਾਰਮੈਟ, ਤੁਸੀਂ ਅਕਸਰ ਮੈਚ ਤੋਂ ਬਾਅਦ ਸਭ ਤੋਂ ਵੱਧ ਦੌੜਾਂ ਬਣਾਉਣ ਵਾਲੇ ਜਾਂ ਸਭ ਤੋਂ ਵੱਧ ਵਿਕਟਾਂ ਲੈਣ ਵਾਲੇ ਖਿਡਾਰੀ ਨੂੰ ਪਲੇਅਰ ਆਫ਼ ਦ ਮੈਚ ਵਜੋਂ ਸਨਮਾਨਿਤ ਹੁੰਦੇ ਦੇਖਿਆ ਹੋਵੇਗਾ। ਪਰ ਕੀ ਹੋਵੇਗਾ ਜੇਕਰ ਅਸੀਂ ਤੁਹਾਨੂੰ ਦੱਸੀਏ ਕਿ ਇਹ ਪੁਰਸਕਾਰ ਇੱਕ ਵਾਰ ਅਜਿਹੇ ਖਿਡਾਰੀ ਨੂੰ ਦਿੱਤਾ ਗਿਆ ਸੀ ਜਿਸਨੇ ਨਾ ਤਾਂ ਇੱਕ ਵੀ ਦੌੜ ਬਣਾਈ, ਨਾ ਹੀ ਵਿਕਟ ਲਈ। ਇੱਥੋਂ ਤਕ ਕੀ ਕੋਈ ਕੈਚ ਵੀ ਨਹੀਂ ਲਿਆ? ਇਹ ਕੋਈ ਬਹੁਤ ਪੁਰਾਣੀ ਘਟਨਾ ਨਹੀਂ ਹੈ। ਇਹ 2001 ਵਿੱਚ ਵਾਪਰੀ ਸੀ। ਆਓ ਤੁਹਾਨੂੰ ਦੱਸਦੇ ਹਾਂ ਕਿ ਵਨਡੇ ਕ੍ਰਿਕਟ ਦਾ ਇਹ ਵਿਲੱਖਣ ਅਤੇ ਅਸਾਧਾਰਨ ਰਿਕਾਰਡ ਕਦੋਂ ਬਣਿਆ ਸੀ।

2001 ਵਿੱਚ ਜ਼ਿੰਬਾਬਵੇ ਅਤੇ ਵੈਸਟਇੰਡੀਜ਼ ਵਿਚਕਾਰ ਖੇਡਿਆ ਗਿਆ ਸੀ ਮੁਕਾਬਲਾ

ਇਹ ਜੂਨ 2001 ਦੀ ਗੱਲ ਹੈ। ਵੈਸਟਇੰਡੀਜ਼ ਅਤੇ ਜ਼ਿੰਬਾਬਵੇ ਦੀਆਂ ਟੀਮਾਂ ਹਰਾਰੇ ਕ੍ਰਿਕਟ ਸਟੇਡੀਅਮ ਵਿੱਚ ਆਹਮੋ-ਸਾਹਮਣੇ ਸਨ। ਪਹਿਲਾਂ ਬੱਲੇਬਾਜ਼ੀ ਕਰਦੇ ਹੋਏ, ਵੈਸਟਇੰਡੀਜ਼ ਨੇ 50 ਓਵਰਾਂ ਵਿੱਚ 5 ਵਿਕਟਾਂ ਦੇ ਨੁਕਸਾਨ 'ਤੇ 266 ਦੌੜਾਂ ਬਣਾਈਆਂ। ਓਪਨਰ ਡੈਰੇਨ ਗੰਗਾ ਨੇ 66 ਦੌੜਾਂ ਬਣਾਈਆਂ, ਜਦੋਂ ਕਿ ਕ੍ਰਿਸ ਗੇਲ ਨੇ 53 ਦੌੜਾਂ ਬਣਾਈਆਂ। ਸ਼ਿਵਨਾਰਾਇਣ ਚੰਦਰਪਾਲ ਨੇ ਵੀ 51 ਦੌੜਾਂ ਦੀ ਪਾਰੀ ਖੇਡੀ। ਕੋਈ ਹੋਰ ਬੱਲੇਬਾਜ਼ 50 ਦੌੜਾਂ ਦਾ ਅੰਕੜਾ ਪਾਰ ਨਹੀਂ ਕਰ ਸਕਿਆ। ਇਹ ਉਸ ਸਮੇਂ ਦੇ ਹਿਸਾਬ ਨਾਲ ਠੀਕ-ਠਾਕ ਸਕੋਰ ਸੀ। ਇਹ ਹਾਸਲ ਕੀਤਾ ਜਾ ਸਕਦਾ ਸੀ। 

ਵੈਸਟ ਇੰਡੀਜ਼ ਨੇ 27 ਦੌੜਾਂ ਨਾਲ ਜਿੱਤ ਲਿਆ ਮੁਕਾਬਲਾ

ਇਸ ਤੋਂ ਬਾਅਦ, ਜਦੋਂ ਜ਼ਿੰਬਾਬਵੇ ਇਸ ਟੀਚੇ ਦਾ ਪਿੱਛਾ ਕਰਨ ਲਈ ਉਤਰਿਆ, ਤਾਂ ਓਪਨਰ ਅਲਿਸਟੇਅਰ ਕੈਂਪਬੈਲ ਨੇ 68 ਦੌੜਾਂ ਦੀ ਸ਼ਾਨਦਾਰ ਪਾਰੀ ਖੇਡੀ। ਉਨ੍ਹਾਂ ਤੋਂ ਇਲਾਵਾ ਕੋਈ ਹੋਰ ਬੱਲੇਬਾਜ਼ ਜ਼ਿਆਦਾ ਦੌੜਾਂ ਨਹੀਂ ਬਣਾ ਸਕਿਆ। ਜ਼ਿੰਬਾਬਵੇ 50 ਓਵਰਾਂ ਵਿੱਚ 9 ਵਿਕਟਾਂ 'ਤੇ ਸਿਰਫ਼ 239 ਦੌੜਾਂ ਹੀ ਬਣਾ ਸਕਿਆ। ਇਸ ਤਰ੍ਹਾਂ, ਵੈਸਟ ਇੰਡੀਜ਼ ਨੇ ਆਸਾਨੀ ਨਾਲ 27 ਦੌੜਾਂ ਨਾਲ ਮੈਚ ਜਿੱਤ ਲਿਆ। ਵੈਸਟ ਇੰਡੀਜ਼ ਲਈ ਮਾਰਵਿਨ ਢਿਲੋਂ ਨੇ ਤਿੰਨ ਵਿਕਟਾਂ ਲਈਆਂ। ਪਰ ਜਦੋਂ ਪਲੇਅਰ ਆਫ਼ ਦ ਮੈਚ ਦਾ ਐਲਾਨ ਕੀਤਾ ਗਿਆ ਤਾਂ ਹਰ ਕੋਈ ਹੈਰਾਨ ਰਹਿ ਗਿਆ। ਇਹ ਪੁਰਸਕਾਰ ਕੈਮਰਨ ਕੌਫੀ ਨੂੰ ਦਿੱਤਾ ਗਿਆ।

ਕੈਮਰਨ ਕੌਫੀ ਨੇ ਕੀ ਕੀਤਾ, ਜਿਸ ਕਾਰਨ ਉਸਨੂੰ ਇਹ ਪੁਰਸਕਾਰ ਮਿਲਿਆ?

ਕੈਮਰਨ ਕੌਫੀ ਨੇ ਬੱਲੇਬਾਜ਼ੀ ਨਹੀਂ ਕੀਤੀ ਕਿਉਂਕਿ ਉਹ ਇੱਕ ਗੇਂਦਬਾਜ਼ ਹੈ ਅਤੇ ਵੈਸਟ ਇੰਡੀਜ਼ ਦੀਆਂ ਸਿਰਫ਼ 5 ਵਿਕਟਾਂ ਹੀ ਡਿੱਗੀਆਂ ਸਨ। ਪਰ ਉਸਨੇ ਗੇਂਦਬਾਜ਼ੀ ਕੀਤੀ, ਹਾਲਾਂਕਿ ਉਸਨੂੰ ਕੋਈ ਵਿਕਟ ਨਹੀਂ ਮਿਲੀ। ਪਰ ਫਿਰ ਉਸਨੂੰ ਮੈਨ ਆਫ਼ ਦ ਮੈਚ ਕਿਉਂ ਘੋਸ਼ਿਤ ਕੀਤਾ ਗਿਆ? ਜਵਾਬ ਕਿਫ਼ਾਇਤੀ ਗੇਂਦਬਾਜ਼ੀ ਹੈ। ਕੈਮਰਨ ਕੌਫੀ ਨੇ 10 ਓਵਰਾਂ ਵਿੱਚ ਸਿਰਫ਼ 20 ਦੌੜਾਂ ਦਿੱਤੀਆਂ। ਉਸਦੇ ਦੋ ਓਵਰ ਮੇਡਨ ਸਨ, ਜਿਸ ਵਿੱਚ ਕੋਈ ਦੌੜ ਨਹੀਂ ਦਿੱਤੀ ਗਈ। ਮਾਰਵਿਨ ਢਿੱਲੋਂ ਨੇ ਭਾਵੇਂ ਤਿੰਨ ਵਿਕਟਾਂ ਲਈਆਂ ਹੋਣ, ਪਰ ਉਸਨੇ 10 ਓਵਰਾਂ ਵਿੱਚ 48 ਦੌੜਾਂ ਦਿੱਤੀਆਂ, ਜੋ ਉਸ ਸਮੇਂ ਬਹੁਤ ਜ਼ਿਆਦਾ ਮੰਨਿਆ ਜਾਂਦਾ ਸੀ। ਇੰਨਾ ਹੀ ਨਹੀਂ, ਕੈਮਰਨ ਕੌਫੀ ਨੇ ਕੋਈ ਕੈਚ ਵੀ ਨਹੀਂ ਲਿਆ। ਇਸਦਾ ਮਤਲਬ ਹੈ ਕਿ ਉਸਨੂੰ ਇਹ ਪੁਰਸਕਾਰ ਸਿਰਫ਼ ਘੱਟ ਦੌੜਾਂ ਦੇ ਕੇ ਓਵਰ ਕਰਨ ਲਈ ਦਿੱਤਾ ਗਿਆ ਸੀ। ਉਸ ਸਮੇਂ, ਇਸ ਮੈਚ ਅਤੇ ਕੈਮਰਨ ਕੌਫੀ ਦੀ ਬਹੁਤ ਚਰਚਾ ਹੋਈ ਸੀ।