ਪਿਸਤੋਲ ਦੀ ਨੋਕ ਤੇ ਪਹਿਲਾਂ ਮੋਟਰਸਾਈਕਲ ਅਤੇ ਫਿਰ ਕਾਰ ਖੋਹੀ

ਸਾਦਿਕ (ਪਰਮਜੀਤ ਸੋਨੀ) : ਸਾਦਿਕ ਇਲਾਕੇ ਵਿਚ ਹੋ ਰਹੀਆਂ ਲੁੱਟ-ਖੋਹ-ਚੋਰੀ ਦੀਆਂ ਵਾਰਦਾਤਾ ਰੁਕਣ ਦਾ ਨਾਮ ਨਹੀਂ ਲੈ ਰਹੀਆਂ ਹਨ। ਨਵਾਂ ਮਾਮਲਾ ਬੀਤੀ ਰਾਤ ਅਣਪਛਾਤੇ ਲੁਟੇਰਿਆ ਵੱਲੋਂ ਪਿਸਤੋਲ ਦੀ ਨੋਕ ਤੇ ਪਹਿਲਾਂ ਮੋਟਰਸਾਈਕਲ ਤੇ ਫੇਰ ਕਾਰ ਖੋਹ ਕੇ ਲੈ ਜਾਣ ਦਾ ਸਾਹਮਣੇ ਆਇਆ ਹੈ। ਇਕੱਤਰ ਕੀਤੀ ਜਾਣਕਾਰੀ ਅਨੁਸਾਰ ਦਰਸ਼ਨ ਸਿੰਘ ਗਾਵੜੀ ਪੁੱਤਰ ਤਾਰਾ ਸਿੰਘ ਮੁਕਤਸਰ ਰੋਡ ਸਾਦਿਕ ਤੇ ਲੋਹੇ ਦੀਆਂ ਚਗਾਠਾ ਬਣਾਉਣ ਦਾ ਕੰਮ ਕਰਦਾ ਹੈ, ਉਹ ਆਪਣੇ ਪੀ.ਬੀ 04 ਜੈੱਡ 4124 ਸਪਲੈਡਰ ਮੋਟਰਸਾਇਕਲ ਤੇ ਸ਼ਾਮ 7 ਕੁ ਵਜੇ ਸਵਾਰ ਹੋ ਕੇ ਪਿੰਡ ਕਾਉਣੀ ਨੂੰ ਜਾ ਰਿਹਾ ਸੀ ਤਾਂ ਜਦੋਂ ਉਹ ਪਿੰਡ ਰੁਪਈਆ ਵਾਲਾ ਕੱਸੀ ਕੋਲ ਪੁੱਜਾ ਤਾਂ ਪਹਿਲਾਂ ਹੀ ਕੁਝ ਨੌਜਵਾਨ ਪੁਲੀ ਤੇ ਮੌਜੂਦ ਹਨ ਨੇ ਮੋਟਰਸਾਈਕਲ ਰੋਕ ਕੇ ਧੱਕਾ ਮਾਰ ਕੇ ਹੇਠਾ ਡੇਗ ਦਿੱਤਾ ਤੇ ਦੂਜੇ ਨੇ ਪਿਸਤੋਲ ਕੱਢ ਕੇ ਜੇਬ ਵਿਚੋਂ ਮੋਬਾਇਲ ਤੇ 8500 ਰੁਪਏ ਨਗਦੀ ਖੋਹ ਕੇ ਮੋਟਰਸਾਇਕਲ ਤੇ ਸਾਦਿਕ ਵੱਲ ਨੂੰ ਫਰਾਰ ਹੋ ਗਏ।

ਉਪਰੰਤ ਲੁਟੇਰਿਆਂ ਨੇ ਸਾਦਿਕ ਫਰੀਦਕੋਟ ਸੜਕ ਤੇ ਮਾਨੀਸਿੰਘਵਾਲਾ ਕੋਲ ਨੀਰਇੰਦਰ ਸਿੰਘ ਪੁੱਤਰ ਪਰਮਜੀਤ ਸਿੰਘ ਵਾਸੀ ਸ਼ੇਰ ਸਿੰਘਵਾਲਾ ਹਾਲ ਆਬਾਦ ਨਿਊ ਕੈਂਟ ਰੋਡ ਫਰੀਦਕੋਟ ਤੇ ਖੜ੍ਹਾ ਸੀ ਦੀ ਕਾਰ ਪੀ.ਬੀ 04 ਏਬੀ 8887 ਹਵਾਈ ਫਾਇਰ ਕਰਕੇ ਖੋਹ ਲਈ ਤੇ ਪਿੰਡ ਰੁਪਈਆ ਵਾਲਾ ਕੱਸੀ ਕੋਲੋ ਖੋਹ ਕੇ ਲਿਆਦਾ ਮੋਟਰਸਾਈਕਲ ਕਾਰ ਲੁੱਟਣ ਵਾਲੀ ਜਗ੍ਹਾ ਤੇ ਛੱਡ ਗਏ। ਥਾਣਾ ਸਾਦਿਕ ਵਿਖੇ ਮੁਕੱਦਮਾ ਨੰਬਰ 98 ਧਾਰਾ, 382, 338, 25, 27 ਤਹਿਤ ਦਰਜ ਕਰ ਲਿਆ ਹੈ। ਇਸ ਮਾਮਲੇ ਦੀ ਤਫਤੀਸ਼ ਚਰਨਜੀਤ ਸਿੰਘ ਏ.ਐੱਸ.ਆਈ ਕਰ ਰਹੇ ਹਨ।  ਪੁਲਸ ਮੁਲਜ਼ਮਾਂ ਦੀ ਭਾਲ ਤੇਜ਼ੀ ਨਾਲ ਕਰ ਰਹੀ ਹੈ।