KBC ''ਚ ਪੰਜਾਬੀ ਨੇ ਪਾਈਆਂ ਧਮਾਲਾਂ, ਅਮਿਤਾਭ ਨੂੰ ਯਾਦ ਕਰਵਾਏ ਨਾਨਕੇ (ਤਸਵੀਰਾਂ)
09/12/2019 6:53:39 PM
ਸ੍ਰੀ ਆਨੰਦਪੁਰ ਸਾਹਿਬ (ਚੋਵੇਸ਼ ਲਟਾਵਾ)— ਬੇਸ਼ੱਕ ਹਰ ਇਨਸਾਨ ਦਾ ਕਰੋੜਪਤੀ ਬਣਨ ਦਾ ਸੁਪਨਾ ਹੁੰਦਾ ਹੈ ਪਰ ਮਹਿਜ਼ ਸੁਆਲਾਂ ਦਾ ਜਵਾਬ ਦੇ ਕੇ ਕਰੋੜਪਤੀ ਤੱਕ ਦਾ ਸਫਰ ਤੈਅ ਕਰਨਾ ਜਿੰਨਾ ਰੋਮਾਂਚਕ ਹੁੰਦਾ ਹੈ, ਓਨਾ ਹੀ ਔਖਾ ਵੀ ਹੁੰਦਾ ਹੈ। ਕੁਝ ਅਜਿਹਾ ਹੀ ਕਰ ਦਿਖਾਇਆ ਸ੍ਰੀ ਆਨੰਦਪੁਰ ਸਾਹਿਬ ਦੇ ਹਿਮਾਂਸ਼ੂ ਧੂੜੀਆ ਨੇ। ਹਿਮਾਂਸ਼ੂ ਸ੍ਰੀ ਆਨੰਦਪੁਰ ਸਾਹਿਬ ਚੋਈ ਬਾਜ਼ਾਰ ਦਾ ਰਹਿਣ ਵਾਲਾ ਹੈ ਅਤੇ ਦਸਮੇਸ਼ ਅਕੈਡਮੀ ਅਤੇ ਦਿੱਲੀ 'ਚ ਪੜ੍ਹਿਆ ਹੈ। ਟੀ. ਵੀ. 'ਤੇ ਦਿਖਾਏ ਜਾਣ ਵਾਲੇ ਪ੍ਰੋਗਰਾਮ ਕੇ. ਬੀ. ਸੀ. 'ਚ ਹਿਮਾਂਸ਼ੂ ਨੇ ਇਕ ਕਰੋੜ ਦੇ ਸਵਾਲ ਦਾ ਸਹੀ ਜਵਾਬ ਤਾਂ ਦੇ ਦਿੱਤਾ ਪਰ ਰਿਸਕ ਨਾ ਲੈਣ ਕਰਕੇ 50 ਲੱਖ 'ਤੇ ਹੀ ਸਬਰ ਕਰਨ ਨੂੰ ਤਰਜੀਹ ਦਿੱਤੀ।
ਦੋਹਤੇ ਨੇ ਕੀਤਾ ਪਰਿਵਾਰ ਦਾ ਸਿਰ ਉੱਚਾ
ਸ੍ਰੀ ਆਨੰਦਪੁਰ ਸਾਹਿਬ ਵਿਖੇ ਰਹਿੰਦੀ ਹਿਮਾਂਸ਼ੂ ਧੂੜੀਆ ਦੀ ਨਾਨੀ ਜੀਵਨ ਲਤਾ ਦਾ ਕਹਿਣਾ ਹੈ ਕਿ ਮੇਰੇ ਦੋਹਤੇ ਨੇ ਅੱਜ ਸਾਡੇ ਪਰਿਵਾਰ ਦਾ ਸਿਰ ਬੁਹਤ ਉੱਚਾ ਚੁੱਕ ਦਿੱਤਾ ਹੈ। ਨਾਨੀ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਹਿਮਾਂਸ਼ੂ 'ਤੇ ਬਚਪਨ ਤੋਂ ਲੈ ਕੇ ਬਹੁਤ ਉਮੀਦਾਂ ਹਨ। ਬੇਸ਼ੱਕ ਹਿਮਾਂਸ਼ੂ ਨੇ ਪਹਿਲੇ ਸਵਾਲ 'ਚ ਲਾਈਫ ਲਾਈਨ ਦੀ ਵਰਤੋਂ ਪਰ ਉਹ ਵੀ ਬਹੁਤ ਹੀ ਵਧੀਆ ਖੇਡਿਆ। ਉਸ ਨੇ ਨਾ ਸਿਰਫ ਕੇ. ਬੀ. ਸੀ. ਦੇ ਸੈੱਟ 'ਤੇ ਪਹੁੰਚੇ ਕੇ 50 ਲੱਖ ਰੁਪਏ ਦੇ ਸਵਾਲ ਦਾ ਸਹੀ ਜਵਾਬ ਹੀ ਨਹੀਂ ਦਿੱਤਾ ਬਲਕਿ ਆਪਣੀ ਜਨਮ ਭੂਮੀ ਅਤੇ ਮੁਕੱਦਸ ਧਰਤੀ ਸ੍ਰੀ ਆਨੰਦਪੁਰ ਸਾਹਿਬ ਦਾ ਜ਼ਿਕਰ ਕਰਕੇ ਸਦੀ ਦੇ ਮਹਾਂਨਾਇਕ ਅਮਿਤਾਬ ਬੱਚਨ ਨੂੰ ਵੀ ਉਨ੍ਹਾਂ ਦੇ ਸ੍ਰੀ ਆਨੰਦਪੁਰ ਸਾਹਿਬ ਨਾਲ ਸਬੰਧਤ ਨਾਨਕੇ ਪਰਿਵਾਰ ਦੀ ਯਾਦ ਤਾਜ਼ਾ ਕਰਵਾ ਦਿੱਤੀ।
ਹਿਮਾਂਸ਼ੂ ਧੂੜੀਆ ਇਕ ਪਾਇਲਟ ਹੈ। ਹਿਮਾਂਸ਼ੂ ਨੇ ਕੌਣ ਬਣੇਗਾ ਕਰੋੜਪਤੀ ਤੱਕ ਦਾ ਸਫਰ ਤੈਅ ਹੀ ਨਹੀਂ ਕੀਤਾ ਬਲਕਿ ਬੁਹਤ ਹੀ ਵਧੀਆ ਢੰਗ ਦੇ ਨਾਲ ਖੇਡਦੇ ਹੋਏ 50 ਲੱਖ ਰੁਪਏ ਤੱਕ ਦੇ ਸਹੀ ਜਵਾਬ ਵੀ ਦਿੱਤੇ। ਇਕ ਕਰੋੜ ਦਾ ਸਵਾਲ ਕੇ. ਬੀ. ਸੀ. ਦੇ ਸੈੱਟ 'ਤੇ ਮੰਗਲਵਾਰ ਨੂੰ ਅਮਿਤਾਬ ਬੱਚਨ ਵੱਲੋਂ ਹਿਮਾਂਸ਼ੂ ਤੋਂ ਪੁੱਛਿਆ ਗਿਆ ਸੀ ਪਰ ਹਿਮਾਂਸ਼ੂ ਦਾ ਕੇ. ਬੀ. ਸੀ. ਦਾ ਸਫਰ ਪੂਰਾ ਹੋ ਚੁੱਕਾ ਸੀ ਕਿਉਂਕਿ ਉਸ ਨੇ 50 ਲੱਖ ਤੋਂ ਬਾਅਦ ਇਕ ਕਰੋੜ ਵਾਸਤੇ ਪੁੱਛੇ ਸਵਾਲ ਦਾ ਸਹੀ ਜਵਾਬ ਦੇ ਦਿੱਤਾ ਸੀ ਅਤੇ ਜਦੋਂ ਅਮਿਤਾਬ ਬੱਚਨ ਨੇ ਹਿਮਾਂਸ਼ੂ ਨੂੰ ਉੱਤਰ ਲੌਕ ਕਰਨ ਬਾਰੇ ਪੁੱਛਿਆ ਤਾਂ ਹਿਮਾਂਸ਼ੂ ਨੇ ਗੇਮ ਨੂੰ ਛੱਡਣਾ ਬਿਹਤਰ ਸਮਝਿਆ ਪਰ ਦਿੱਤਾ ਉੱਤਰ ਬਿਲਕੁਲ ਠੀਕ ਸੀ।
ਉਥੇ ਹੀ ਸ਼ਹਿਰ ਨਿਵਾਸੀਆਂ 'ਚ ਇਸ ਗੱਲ ਨੂੰ ਲੈ ਕੇ ਖੁਸ਼ੀ ਪਾਈ ਜਾ ਰਹੀ ਹੈ ਕਿ ਉਨ੍ਹਾਂ ਦੇ ਅਤਿ ਪੱਛੜੇ ਹੋਏ ਸ਼ਹਿਰ ਦਾ ਜੰਮਿਆ ਇਕ ਨੌਜਵਾਨ 'ਕੌਣ ਬਣੇਗਾ ਕਰੋੜਪਤੀ' 'ਚ ਇਕ ਕਰੋੜ ਤੱਕ ਪਹੁੰਚਿਆ ਹੀ ਨਹੀਂ ਸਗੋਂ ਉਸ ਨੇ ਬੁਹਤ ਹੀ ਮਾਣ ਨਾਲ ਸ੍ਰੀ ਆਨੰਦਪੁਰ ਸਾਹਿਬ ਨਾਲ ਆਪਣਾ ਨਾਤਾ ਸੰਸਾਰ ਭਰ ਅੱਗੇ ਨਸ਼ਰ ਕੀਤਾ। ਇਸੇ ਦੌਰਾਨ ਅਮਿਤਾਬ ਬੱਚਨ ਨੇ ਵੀ ਦੱਸਿਆ ਕਿ ਉਨ੍ਹਾਂ ਦੀ ਦਾਦੀ ਦਾ ਵੀ ਇਥੋਂ ਦੇ ਇਕ ਖਾਨਦਾਨ ਦੇ ਨਾਲ ਨਾਤਾ ਸੀ।
